ഇംഗ്ലണ്ട് ലോകകപ്പിൽ ഇന്ത്യ സെമി ഉറപ്പിച്ചതിന് പിന്നാലെ പുറത്തുവന്ന വാർത്തയായിരുന്നു മുൻ നായകൻ മഹേന്ദ്ര സിംഗ് ധോണി രാജ്യാന്തര ക്രിക്കറ്റിൽ നിന്ന് വിരമിക്കാൻ ഒരുങ്ങുന്നതായി റിപ്പോർട്ട്. ഇന്ത്യൻ ക്രിക്കറ്റ് കൺട്രോൾ ബോർഡിലെ (ബിസിസിഐ) മുതിർന്ന അംഗത്തെ ഉദ്ധരിച്ചാണ് ദേശീയ മാധ്യമങ്ങൾ ഈ വാർത്ത പുറത്തുവിട്ടത്.
പ്രചരിച്ച വാർത്തയ്ക്ക് പിന്നിൽ വലിയൊരു ഗൂഡാലോചന നടന്നുവെന്ന സൂചനകളാണ് ഇപ്പോൾ പുറത്തുവരുന്നത്. ടീമിൽ തന്റെ ഏറ്റവും അടുത്ത സുഹൃത്തായ വിരാട് കോഹ്ലിയോടും പരിശീലകൻ രവി ശാസ്ത്രിയോടും ധോണി ഇങ്ങനെയൊരു കാര്യം പറഞ്ഞിട്ടില്ല. ഇരുവരും അറിയാത്ത വാർത്തകളാണ് ദേശീയ മാധ്യമങ്ങൾ പുറത്തുവിട്ടത്.
ധോണി പ്രധാന കാര്യങ്ങൾ പങ്കുവയ്ക്കാറുള്ള മുൻ ബിസിസിഐ പ്രസിഡന്റ് എൻ. ശ്രീനിവാസൻ പോലും പ്രചരിച്ച വാർത്ത തള്ളിക്കളഞ്ഞു എന്നാണ് ബിസിസിഐ വൃത്തങ്ങൾ വ്യക്തമാക്കുന്നത്. കോഹ്ലിയും ശാസ്ത്രിയുമറിയാതെ ധോണി ഒരു തീരുമാനവും എടുക്കില്ല. എപ്പോഴും ഒപ്പം നിൽക്കുന്ന ധോണിയെ തന്റെ ഗോഡ്ഫാദറായിട്ടാണ് വിരാട് കാണുന്നത്. ഇരുവരും തമ്മിലുള്ള ബന്ധം അത്രയും ശക്തമാണ്.
ഈ സാഹചര്യത്തിൽ ധോണിയുടെ വിരമിക്കൽ വാർത്തയ്ക്ക് പിന്നിൽ മറ്റു താൽപ്പര്യങ്ങൾ ഉണ്ടെന്ന് വ്യക്തമാണ്. വിരമിക്കൽ പ്രഖ്യാപിക്കുന്ന കാര്യത്തിൽ ധോണിയിലേക്ക് സമ്മർദ്ദം എത്തുന്നതിന് വേണ്ടിയു സൃഷ്ടിച്ച വാർത്തകളാണിത്. ഇപ്പോഴത്തെ സിലക്ഷൻ കമ്മിറ്റിയുടെ കാലാവധി ഈ വർഷം അവസാനത്തോടെ തീരും.
അതിന് മുമ്പോ പുതിയ കമ്മിറ്റി വരുന്ന ഉടനെയോ ധോണിയെ പുറത്താക്കാനുള്ള ശ്രമമാണ് ഇപ്പോഴത്തെ വാർത്തകളെന്നുമാണ് ഒരു വിഭാഗം ബിസിസിഐ വൃത്തങ്ങൾ ആരോപിക്കുന്നത്.
രണ്ട് ലോകകപ്പുകളും ഒരു ഐസിസി ചാമ്പ്യൻസ് ട്രോഫിയും ഇന്ത്യക്ക് സമ്മാനിച്ച സൂപ്പർ താരത്തിനെതിരെ അണിയറയിൽ നീക്കം നടക്കുന്നു എന്നതിന്റെ തെളിവാണ് പുറത്തുവന്ന വാർത്തകൾ. ധോണിയുടെ വിരമിക്കൽ സംബന്ധിച്ച് ബിസിസിഐയോ സെലക്ഷൻ കമ്മറ്റിയോ ചർച്ചകൾ നടത്തിയിട്ടില്ലെന്നാണ് വസ്തുത.
