ലോകകപ്പ് ക്രിക്കറ്റിൽ ബംഗ്ലാദേശിനെതിരായ മത്സരത്തിൽ ഈ ലോകപ്പിലെ തന്റെ നാലാം സെഞ്ചുറി നേടിയ ഇന്ത്യൻ വൈസ് ക്യാപ്റ്റൻ രോഹിത് ശർമയെ അഭിനന്ദനങ്ങൾകൊണ്ട് മൂടി സഹ ഓപ്പണർ കെഎൽ രാഹുൽ. രോഹിത്തിനെ പോലെ കളിക്കാൻ തനിക്കാവില്ലെന്ന് പറഞ്ഞ രാഹുൽ അദ്ദേഹം വേറെ ക്ലാസ് ആണെന്നും വ്യക്തമാക്കി. രോഹിത്തിനെ അനുകരിക്കാൻ ശ്രമിക്കുന്നത് വെറും വിഡ്ഢിത്തമായിരിക്കുമെന്നും രാഹുൽ പറഞ്ഞു.
രോഹിത്തിനെ പോലെ ബാറ്റ് ചെയ്യാൻ ശ്രമിക്കുന്നത് വിഡ്ഢിത്തമെന്നെ പറയാൻ കഴിയൂ. കാരണം അദ്ദേഹം വേറെ ക്ലാസാണ്. ഫോമിലായാൽ രോഹിത് ശരിക്കും അന്യഗ്രഹത്തിൽ നിന്ന് വന്നൊരാളെപ്പോലെയാണ്. ബംഗ്ലാദേശിനെതിരെ രോഹിത്തിന്റെ പ്രകടനം അത്രത്തോളം അനായസമായിരുന്നു.
ചില പന്തുകൾ ഉയർന്നും ചിലത് താഴ്ന്നും വരുന്ന ഈ പിച്ചിൽ ബാറ്റിംഗ് അത്ര അനായാസമായിരുന്നില്ല. പന്ത് ബാറ്റിലേക്ക് അനായാസം എത്തിയിരുന്നുമില്ല. പക്ഷെ ഇതൊന്നും രോഹിത്തിനെ സംബന്ധിച്ച് പ്രശ്‌നമല്ല. ഓരോ തവണ ക്രീസിലിറങ്ങുമ്പോഴും രോഹിത്തിൽ നിന്ന് നമ്മൾ ഒരുപാട് പ്രതീക്ഷിക്കുന്നുണ്ട്. ഒരിക്കലും അദ്ദേഹം ആ പ്രതീക്ഷ തെറ്റിച്ചിട്ടുമില്ല.
രോഹിത്തിനൊപ്പം ബാറ്റ് ചെയ്യുക അത്രേൽ അനായാസമാണ്. അദ്ദേഹം എപ്പോഴും ബൗണ്ടറികൾ നേടി നമ്മുടെ സമ്മർദ്ദം അകറ്റും. അദ്ദേഹത്തിനൊപ്പം നിന്ന് കൊടുത്താൽ മാത്രം മതി. ലോകകപ്പ് നേട്ടത്തിന് രണ്ട് ജയം മാത്രം അകലെയാണ് ഇപ്പോൾ ഇന്ത്യയെന്നും കഴിഞ്ഞ നാലുവർഷത്തെ സ്വപ്നം സഫലമാവുമെന്ന് തന്നെയാണ് പ്രതീക്ഷയെന്നും രാഹുൽ പറഞ്ഞു.
