മിന്നുന്ന ഫോമിലാണ് ഇന്ത്യയുടെ ഹിറ്റ്മാൻ രോഹിത് ശർമ്മ ഈ ലോകകപ്പിൽ . അഞ്ച് സെഞ്ചുറികളുമായി ഇന്ത്യൻ വിജയങ്ങളുടെ മുഖ്യശിൽപി ആയി മാറി രോഹിത്.
ഇപ്പോൾ ഇതിഹാസ താരം സച്ചിൻ ടെൻഡുൽക്കർ ലോകകപ്പിൽ കുറിച്ചിട്ട രണ്ട് റെക്കോർഡുകൾ തകർക്കുന്നതിൻറെ തൊട്ടടുത്താണ് രോഹിത് ശർമ്മ.
നാളെ നടക്കുന്ന ന്യൂസിലൻഡിനെതിരായ സെമിയിൽ തന്നെ ഇതുണ്ടാകുമെന്ന പ്രതീക്ഷയിലാണ് ആരാധകർ. ഒരു ലോകകപ്പിൽ ഏറ്റവും കൂടുതൽ റൺസെന്ന റെക്കോർഡ് സച്ചിൻറെ പേരിലാണ്.
2003 ലോകകപ്പിൽ നേടിയ 673 റൺസ് തകർക്കാൻ ഇതുവരെ ആർക്കും സാധിച്ചിട്ടില്ല. ഇന്ത്യൻ ഓപ്പണർ രോഹിത് ശർമ്മയ്ക്ക് ഈ ലോകകപ്പിൽ ഇതുവരെ 647 റൺസായി.
27 റൺസ് കൂടി നേടിയാൽ സച്ചിനെ മറികടക്കാനാകും. സെമിയിൽ ഇംഗ്ലണ്ടിനെ നേരിടുന്ന ഓസ്‌ട്രേലിയയുടെ ഓപ്പണർ ഡേവിഡ് വാർണർക്ക് 638 റൺസുണ്ട്. സച്ചിനെ മറികടക്കാൻ 36 റൺസ് കൂടി മതി.
507 റൺസുള്ള ഓസ്‌ട്രേലിയൻ നായകൻ ആരോൺ ഫിഞ്ചും 500 റൺസുള്ള ഇംഗ്ലണ്ട് താരം ജോ റൂട്ടും സച്ചിൻറെ റെക്കോർഡ് മറികടക്കാനുള്ള ശ്രമത്തിലാണ്. ലോകകപ്പുകളിൽ ഏറ്റവും കൂടുതൽ സെഞ്ചുറിയെന്ന റെക്കോർഡ് സച്ചിനും രോഹിത്തും പങ്കിടുകയാണിപ്പോൾ.
ആറ് സെഞ്ചുറിയാണ് ഇരുവർക്കുമുള്ളത്. ഒരു സെഞ്ചുറി കൂടി നേടിയാൽ ഈ റെക്കോർഡ് രോഹിത്തിൻറെ മാത്രം പേരിലാകും.
