യുവതാരം ഋഷഭ് പന്തിനെ ഇംഗ്ലണ്ടിനെതിരായ ലോകകപ്പ് മത്സരത്തിൽ കളിപ്പിച്ചത് ക്രിക്കറ്റ് പ്രേമികളെ തൃപ്തിപ്പെടുത്തുന്ന തീരുമാനമായിരുന്നു . അരങ്ങേറ്റ മത്സരത്തിൽ ഇംഗ്ലണ്ടിനെതിരെ ഭേദപ്പെട്ട പ്രകടനം നടത്താൻ താരത്തിന് സാധിച്ചു.
മികച്ച റൺറേറ്റ് ആവശ്യമുള്ളപ്പോൾ ഫോമിലുള്ള ഹർദ്ദിക് പാണ്ഡ്യയെ മറികടന്ന് നാലാം നമ്ബറിലാണ് പന്ത് ക്രീസിലെത്തിയത്. ആരാധകരിൽ ചിലരെ ഈ നീക്കം നിരാശപ്പെടുത്തുകയും ചെയ്തു.
അപ്രതീക്ഷിതമായി പന്ത് ക്രീസിൽ എത്തിയത് അത്ഭുതപ്പെടുത്തിയോ എന്ന് ചോദിച്ച മാധ്യമപ്രവർത്തകന് രസകരമായ മറുപടി നൽകിയ രോഹിത് ശർമ്മയുടെ വാക്കുകളാണ് ഇപ്പോൾ വൈറലാകുന്നത്.
അത്ഭുതപ്പെടുത്തിയോ എന്നതിന് ഒരിക്കലുമില്ല എന്നായിരുന്നു ഹിറ്റ്മാന്റെ മറുപടി. പന്ത് ലോകകപ്പിൽ കളിക്കണമെന്ന് നിങ്ങളെല്ലാവരും ആഗ്രഹിച്ചു എന്നത് ശരിയല്ലേ ? പന്ത് എവിടെയാണ് കളിക്കാത്തത് എന്തുകൊണ്ട് എന്നീ ചോദ്യങ്ങളാണ് കൂടുതൽ ഉയർന്നു കേട്ടത്. അതിനുള്ള ഉത്തരമാണിത് എന്നായിരുന്നു രോഹിത്തിന്റെ വാക്കുകൾ.
