തിരുവല്ല: ചൂണ്ടയില്‍ കൊളുത്തിയ മീനിനെ പിടിക്കാന്‍ നദിയിലേയ്ക്ക് എടുത്ത് ചാടിയ യുവാവ് മുങ്ങി മരിച്ചു. നിരണം പനച്ചമൂട് പെരുമുറ്റത്ത് ലക്ഷംവീട് കോളനിയില്‍ പ്രജീഷ് ആണ് മരിച്ചത്. ഇന്ന് വൈകിട്ട് നാലരയ്ക്ക് നീരേറ്റുപുറം പമ്പ ബോട്ട് റെയ്‌സ് സ്റ്റേഡിയത്തിനു സമീപം വരമ്പിനകത്തുമാലി തുരുത്തേല്‍ കടവിലായിരുന്നു സംഭവം.
കൊളുത്തില്‍ കുരുങ്ങി ചൂണ്ടയും വലിച്ചുകൊണ്ടുപോയ മീനിന്റെ പുറകേ പ്രജീഷും ചാടുകയായിരുന്നുവെന്ന് ദൃക്‌സാക്ഷികള്‍ പറയുന്നു. മീനിനൊപ്പം ആറിന്റെ എതിര്‍കര വരെ എത്തിയിരുന്നു. കരയ്ക്ക് ഒന്നര മീറ്റര്‍ അകലെ എത്തിയപ്പോഴേയ്ക്കും കുതച്ച് വെള്ളത്തില്‍ താഴുകയായിരുന്നു. അഗ്‌നിശമനസേന എത്തി തിരച്ചില്‍ നടത്തിയെങ്കിലും കണ്ടെത്തിയില്ല.
തുടര്‍ന്ന് നിരണം പുറന്തടമാലിയില്‍ സന്തോഷ് മുങ്ങി തപ്പിയപ്പോള്‍ ആദ്യം ചൂണ്ടയില്‍ കുരുങ്ങിയ മീനിനെ കിട്ടി. 13 കിലോയിലധികമുള്ള തൂക്കമുള്ള മീനായിരുന്നു ചൂണ്ടയില്‍ കുരുങ്ങിയത്. സമീപത്തു നിന്നും പ്രജീഷിന്റെ മതൃദേഹവും കണ്ടെത്തി. ദുബായില്‍ ജോലിയുള്ള പ്രജീഷ് മൂന്നാഴ്ച മുന്‍പാണ് നാട്ടിലെത്തിയത്. പ്രസന്നന്റെയും ജിജിയുടെയും മകനാണ്. സഹോദരന്‍ പ്രജിത്. സംസ്‌കാരം പിന്നീട്.
