തന്റെ പേരിൽ സോഷ്യൽ മീഡിയയിൽ പ്രചരിക്കുന്ന ഫേസ്ബുക്ക് പോസ്റ്റ് വ്യാജമാണെന്ന് വ്യക്തമാക്കി നടി പാർവതി തിരുവോത്ത്. പാർവതി ടി കെ എന്ന അക്കൗണ്ടിൽ നിന്നുള്ള പോസ്റ്റാണ് വൈറലാവുന്നത്. വടക്കൻ കേരളത്തെ മഴക്കെടുതിയിൽ നിന്ന് രക്ഷപ്പെടാൻ തെക്കൻ കേരളത്തിലുള്ളവർ അമാന്തിച്ച് നിൽക്കരുതെന്നും സഹായിക്കണം എന്നും പറഞ്ഞുകൊണ്ടാണ് വ്യാജ പ്രൊഫൈലിൽ നിന്ന് പോസ്റ്റിട്ടിരിക്കുന്നത്.
സോഷ്യൽ മീഡിയയിൽ വടക്കൻ കേരളവും തെക്കൻ കേരളവും തമ്മിലുള്ള തർക്കം രൂക്ഷമായിരിക്കുന്ന സാഹചര്യത്തിൽ പാർവതിയുടെ പേരിൽ വന്ന പോസ്റ്റ് വലിയ ചർച്ചയായിരുന്നു. ഇതിന് പിന്നാലെയാണ് വ്യാജ പ്രൊഫൈലാണെന്ന് വ്യക്തമാക്കി താരം തന്നെ രംഗത്തെത്തിയത്.
തന്റേതെന്ന പേരിൽ ഒരു വ്യാജ പ്രൊഫൈൽ തെറ്റിധാരണ ജനിപ്പിക്കുന്നതും ആളുകൾക്കിടയിൽ ഭിന്നതയും ദൂരങ്ങളും സൃഷ്ടിക്കുന്നതുമായ പോസ്റ്റുകൾ ഇടുന്നത് ശ്രദ്ധയിൽ പെട്ടെന്നാണ് താരം തന്റെ ഫേയ്സ്ബുക്ക് പോസ്റ്റിൽ കുറിച്ചത്. പ്രസ്തുത പേജുമായി ഞങ്ങൾ ബന്ധപ്പെട്ടെങ്കിലും മറുപടിയൊന്നും ലഭിച്ചില്ലെന്നും താരം വ്യക്തമാക്കി.
കേരളത്തെ തന്നെ ഭിന്നിപ്പിക്കുന്ന തരത്തിലുള്ള നിരുത്തരവാദപരമായ പോസ്റ്റുകൾ കണ്ടതിനാലാണ് കുറിപ്പിടുന്നതെന്നും തറ്റായതും വ്യാജമായതും ആയ സന്ദേശങ്ങളും വാർത്തകളും പ്രചരിപ്പിക്കരുതെന്നും താരം കൂട്ടിച്ചേർത്തു. പാർവതി ടികെ എന്ന അക്കൗണ്ടിൽ പോസ്റ്റ് ചെയ്ത കുറിപ്പും പാർവതിയുടെ സോഷ്യൽ മീഡിയ മാനേജറായ സംഗീത വ്യാജ പ്രൊഫൈലുമായി ബന്ധപ്പെട്ട സന്ദേശവും ഇതിനൊപ്പം ചേർത്തിട്ടുണ്ട്.
പാർവതിയുടെ ഫേസ്ബുക്ക് പോസ്റ്റ് വായിക്കാം
നമ്മുടെ നാട് വീണ്ടും ഒരു മഹാമാരിയെയും പ്രളയത്തെയും ഒറ്റക്കെട്ടായി നിന്ന് അതിജീവിക്കാൻ ശ്രമിക്കുകയാണ്. ഇതിനിടയിലാണ് എന്റേത് എന്ന പേരിൽ ഒരു വ്യാജ പ്രൊഫൈൽ ഈ അവസരത്തിൽ തെറ്റിധാരണ ജനിപ്പിക്കുന്നതും ആളുകൾക്കിടയിൽ ഭിന്നതയും ദൂരങ്ങളും സൃഷ്ടിക്കുന്നതുമായ പോസ്റ്റുകൾ ഇടുന്നത് ശ്രദ്ധയിൽ പെട്ടത്.
ഇതറിഞ്ഞയുടനെ പ്രസ്തുത പേജുമായി ഞങ്ങൾ ബന്ധപ്പെട്ടെങ്കിലും മറുപടിയൊന്നും ലഭിച്ചില്ല. കേരളത്തെ തന്നെ ഭിന്നിപ്പിക്കുന്ന തരത്തിലുള്ള നിരുത്തരവാദപരമായ പോസ്റ്റുകൾ കണ്ടതിനാലാണ് ഇങ്ങനെ ഒരു കുറിപ്പ്. നമുക്ക് ദയവായി തെറ്റായതും വ്യാജമായതും ആയ സന്ദേശങ്ങളും വാർത്തകളും പ്രചരിപ്പിക്കാതെ ഇരിക്കാം. സോഷ്യൽ മീഡിയയെ നല്ല രീതിയിൽ ഉപയോഗിച്ചു രക്ഷാപ്രവർത്തനങ്ങൾക്ക് പിന്തുണ നൽകാം. അതിജീവിക്കാം ഒരിക്കൽ കൂടി. ഒരുമിച്ച് !
