കൈയില്‍ മദ്യം നിറച്ച ഗ്ലാസുമായിരിക്കുന്ന ചിത്രം സമൂഹമാധ്യമങ്ങളില്‍ പങ്കുവച്ചതോടെ പുലിവാല് പിടിച്ചിരിക്കുകയാണ് ടെലിവിഷന്‍ താരവും മോഡലുമായ ശ്വേത സാല്‍വെ.
ചിത്രത്തിനു താഴെ തെറിവിളിയും ഉപദേശവുമായി രംഗത്ത് എത്തിയിരിക്കുകയാണ് സദാചാര ആങ്ങളമാര്‍. ഇത്തരം സ്വഭാവത്തിലൂടെ സ്വന്തം മകള്‍ക്ക് മോശം ഉദാഹരണമാകുമെന്നാണ് പലരും പറഞ്ഞത്. എന്നാല്‍ ഒരു ഫോട്ടോയുടെ പേരില്‍ രൂക്ഷമായ ആക്രമണത്തിന് ഇരയായതോടെ വിമര്‍ശകര്‍ക്ക് മറുപടിയുമായി എത്തിയിരിക്കുകയാണ് താരം.
താന്‍ മദ്യപിക്കുകയും പുകവലിക്കുകയും ചെയ്യുമെന്നും എന്നാല്‍ ഇതിന്റെ പേരില്‍ താന്‍ എന്ന വ്യക്തിയെ ജഡ്ജ് ചെയ്യാന്‍ ആര്‍ക്കും അധികാരമില്ലെന്നും ഇന്‍സ്റ്റഗ്രാമിലെ കുറിപ്പിലൂടെ ശ്വേത വ്യക്തമാക്കി. അതിനൊപ്പം ഒരു കൈയില്‍ എരിയുന്ന സിഗററ്റും മറ്റൊരു കൈയില്‍ മദ്യത്തിന്റെ ഗ്ലാസുമായി ഇരിക്കുന്ന ചിത്രത്തിനൊപ്പമാണ് കുറിപ്പ് പോസ്റ്റ് ചെയ്തിരിക്കുന്നത്.
‘ഞാന്‍ കുടിക്കും വലിക്കും, ഞാന്‍ ഇങ്ങനെയാണ്. എന്നുവെച്ച്‌ ഇത് ഞാന്‍ എന്ന വ്യക്തിയേയോ അമ്മയേയോ ജഡ്ജ് ചെയ്യാനുള്ള കാരണമല്ല. ഇതെല്ലാം ചെയ്യുന്ന മറ്റുള്ളവരെ ഞാന്‍ ചോദ്യം ചെയ്യുന്നില്ലല്ലോ.’
വലിക്കുകയും കുടിക്കുകയും ചെയ്യുന്നവര്‍ മോശം വ്യക്തിയും അമ്മയും ആവുന്നത് എങ്ങനെയാണെന്നും താരം ചോദിക്കുന്നു. ഞാന്‍ തൊഴില്‍ ചെയ്യാതെ ഇരിക്കുന്നതൊ, എന്റെ കുഞ്ഞിനെ നോക്കാതെയിരിക്കുന്നത് കണ്ടിട്ടുണ്ടോ? ഞാനൊരു അഭിനയത്രിയാണ്, ഡാന്‍സറാണ്, സംരംഭകയാണ്.
രാജ്യത്തെ രണ്ട് പ്രമുഖ നഗരങ്ങളില്‍ വിജയകരമായിട്ടാണ് ഞാന്‍ ജീവിക്കുന്നത്. എന്റെ സംസാരം ആക്രമണോത്സുകമാണെന്ന് ചിലപ്പോള്‍ നിങ്ങള്‍ക്ക് തോന്നിയേക്കാം. പക്ഷേ ഒരിക്കലുമെന്റെ കഴിവുകളെ ചോദ്യം ചെയ്യുകയോ ഞാനെന്റെ കുഞ്ഞിന് മോശം ഉദാഹരണമാണ് നല്‍കുന്നതെന്നോ പറയരുതെന്നും ശ്വേത കുറിക്കുന്നു.
