ഐപിഎല്‍ പന്ത്രണ്ടാം സീസണിന് ഇനി വെറും ദിവസങ്ങള്‍ മാത്രമാണ് ശേഷിക്കുന്നത്. മാര്‍ച്ച് 23 ന് വിരാട് കോഹ്ലിയുടെ റോയല്‍ ചലഞ്ചേഴ്സ് ബാംഗ്ലൂരും എം എസ് ധോണിയുടെ ചെന്നൈ സൂപ്പര്‍ കിങ്സും തമ്മിലുള്ള പോരാട്ടത്തോടെയാണ് ടൂര്‍ണമെന്റിന് തുടക്കമാവുക.
അതിനിടെ ഈ സീസണില്‍ കിരീടം ബംഗ്ലൂര്‍ റോയല്‍ ചലഞ്ചേഴ്സ് സ്വന്തമാക്കുമെന്ന് പ്രവചിച്ചിരിക്കുകയാണ് മുന്‍ ഇംഗ്ലണ്ട് താരം കൂടിയായ മൈക്കിള്‍ വോഗന്‍ .
ബാംഗ്ലൂരും കിങ്സ് ഇലവന്‍ പഞ്ചാബും ഡല്‍ഹി ക്യാപിറ്റല്‍സും മാത്രമാണ് കഴിഞ്ഞ പതിനൊന്ന് സീസണിലും കിരീടം നേടാന്‍ സാധിക്കാത്ത ടീമുകള്‍.
കഴിഞ്ഞ സീസണില്‍ വിരാട് കോഹ്ലി, എബി ഡിവില്ലിയേഴ്സ്, ബ്രണ്ടന്‍ മക്കല്ലം, ക്വിന്റണ്‍ ഡീകോക്ക് തുടങ്ങിയ വമ്പന്‍ താരങ്ങള്‍ ഉണ്ടായിട്ടും ആറാം സ്ഥാനത്തെത്താന്‍ മാത്രമാണ് ബാംഗ്ലൂരിന് സാധിച്ചത്.
ഇക്കുറിയും കിരീടപ്രതീക്ഷകളുമായാണ് കോഹ്ലിയും കൂട്ടരും എത്തുന്നത് . ഓസ്ട്രേലിയന്‍ ഓള്‍ റൗണ്ടര്‍ മാര്‍ക്കസ് സ്റ്റോയിനിസ്, വെസ്റ്റിന്‍ഡീസ് വെടിക്കെട്ട് താരം ഷിംറോന്‍ ഹെറ്റ്മയര്‍, സൗത്താഫ്രിക്കന്‍ താരം ഹെയ്ന്റിച്ച് ക്ളാസന്‍ തുടങ്ങിയ വമ്പന്‍ താരങ്ങള്‍ ഇക്കുറിയും ബാംഗ്ലൂരിനൊപ്പമുണ്ട്.
