പ്രണയബന്ധത്തെ തുടർന്നുണ്ടായ തർക്കം മുൻ കാമുകനെ നടി കൊലപ്പെടുത്തി. ടെലിവിഷൻ താരമായ എസ് ദേവിയാണ് സിനിമ ടെക്നീഷ്യനായ എം രവിയെ തലയ്ക്കടിച്ച് കൊലപ്പെടുത്തിയത്. തമിഴ്നാട്ടിലെ കോലത്തൂരിൽ കഴിഞ്ഞ ദിവസമാണ് സംഭവം. ദേവി പോലീസിന് മുന്നിൽ കീഴടങ്ങി. ഇവരുടെ ഭർത്താവ് ബി ശങ്കർ, സഹോദരി എസ് ലക്ഷമി, ഭർത്താവ് സവരിയർ എന്നിവർ അറസ്റ്റിലായി. ഇവരെ റിമാൻഡ് ചെയ്തു.
ചെന്നൈ സ്വദേശിയായ രവിയുമായി ദേവികയ്ക്ക് രണ്ട് വർഷത്തെ പരിചയമുണ്ട്. ഇരുവരും പ്രണയത്തിലായതോടെ കുടുംബം ദേവികയെ ബന്ധത്തിൽ നിന്നും പിന്തിരിപ്പിച്ചു. ഇതിനിടെ ചെറിയ വേഷങ്ങളിൽ ദേവി അഭിനയിച്ചു. ഞായറാഴ്ച രാത്രി കൊലത്തൂരിലെ വീട്ടിലെത്തിയ രവി പുലർച്ചെ 1.30ന് സഹോദരിയുടെ വീട്ടിലെത്തി പ്രണയബന്ധത്തെക്കുറിച്ച് സംസാരിച്ചു.
ബന്ധം തുടരാനുള്ള സാഹചര്യങ്ങൾ ഒരുക്കി തരാമെന്ന് ഇവർ രവിക്ക് വാക്ക് നൽകുകയും ചെയ്തു. തുടർന്ന് വീട്ടിലെ മുറിയിൽ രവിയെ ഒളിപ്പിച്ച ശേഷം ദേവിയെയും ശങ്കറിനെയും ഫോണിലൂടെ വിളിച്ചുവരുത്തുകയായിരുന്നു.
ദേവി എത്തിയതോടെ പ്രണയം തുടരണമെന്നും ബന്ധം അവസാനിപ്പിക്കരുതെന്നും രവി ആവശ്യപ്പെട്ടു. തർക്കത്തിനിടെ ദേവി ഇയാളെ അടിച്ചു വീഴ്ത്തുകയായിരുന്നു. കൈയിലുണ്ടായിരുന്ന ചുറ്റിക ഉപയോഗിച്ച് തലയ്ക്കടിയ്ക്കുകയായിരുന്നു. തലയ്ക്കേറ്റ ക്ഷതം മൂലം രക്തം വാർന്നാണ് മരണം സംഭവിച്ചത്. തുടർന്ന് ദേവി രാജമംഗലം പോലീസ് സ്റ്റേഷനിലെത്തി കീഴടങ്ങുകയായിരുന്നു.
