കെ.ജി.എഫ് 2 എന്ന സിനിമ പ്രതീക്ഷിച്ചതിനേക്കാള്‍ വലിയ വിജയമാണ് സ്വന്തമാക്കിയത്. ബോളിവുഡില്‍ നിന്നുപോലും പ്രശംസാപ്രവാഹമാണ് താരത്തിനിപ്പോള്‍ ലഭിയ്ക്കുന്നത്. കന്നഡയില്‍ മാത്രം അറിയപ്പെട്ടിരുന്ന യാഷ് ഇപ്പോള്‍ സിനിമാലോകത്തിന്റെയാകെ റോക്കി ഭായിയാണ്. കെ.ജി.എഫ് രണ്ടാം ഭാഗം ആര്‍ആര്‍ആര്‍ സിനിമയുടെ റെക്കോര്‍ഡ് പോലും ഭേദിച്ചാണ് വലിയ വിജയം കൊയ്തത്.
കെജിഎഫ് മൂന്നാം ഭാഗത്തിനായി കാത്തിരിക്കുകയാണ് ആരാധകര്‍. ചിത്രത്തിന്റെ ചിത്രീകരണം അടുത്ത വര്‍ഷം തുടങ്ങുകയാണ്. ഇതിനിടെ സിനിമാതിരക്കുകളില്‍നിന്നും ഒഴിഞ്ഞ് വെക്കേഷന്‍ കാലം ആസ്വദിക്കുകയാണ് യാഷും കുടുംബവും. ഭാര്യ രാധിക പണ്ഡിറ്റിനും മക്കള്‍ക്കുമൊപ്പം വെക്കേഷന്‍ കാലം ആസ്വദിക്കുകയാണ് ഇപ്പോള്‍ യാഷ്. ഇടയ്ക്കിടെ മക്കള്‍ക്കൊപ്പമുള്ള രസകരമായ നിമിഷങ്ങളും കുടുംബത്തിലെ ആഘോഷങ്ങളുമെല്ലാം യാഷ് സോഷ്യല്‍ മീഡിയയിലൂടെ പങ്കുവയ്ക്കാറുണ്ട്. ഇപ്പോഴിത യാഷും ഭാര്യ രാധിക പണ്ഡിറ്റും തങ്ങളുടെ ആറാം വിവാഹ വാര്‍ഷികം ആഘോഷമാക്കിയതാണ് ആരാധകര്‍ ഏറ്റെടുത്തിരിക്കുന്നത്.
സോഷ്യല്‍ മീഡിയയില്‍ സജീവമായ രാധിക പണ്ഡിറ്റ് തങ്ങളുടെ സുന്ദരനിമിഷങ്ങള്‍ ആരാധകര്‍ക്കായി പങ്കുവെക്കാറുമുണ്ട്. ഇപ്പോള്‍ വീണ്ടും ഇരുവരും ഒന്നിച്ചുള്ള ചില മനോഹര ചിത്രങ്ങളാണ് ആരാധകര്‍ ഏറ്റെടുത്തിരിക്കുന്നത്. തന്റെ ആദ്യ ചിത്രത്തിലെ നായിക കൂടിയായ രാധികയെ ജീവിതത്തിലും ഒപ്പം ചേര്‍ക്കുകയായിരുന്നു. ഇരുവരും ഒന്നിച്ചുള്ള യാത്രയും അതീവമനോഹരമാണെന്ന് ഈ ചിത്രം പറയുകയാണ്.
അഭിനേതാക്കളായിരുന്നു ഇരുവരുംഏറെ നാളത്തെ പ്രണയത്തിനു ശേഷം 2016 ല്‍ ആയിരുന്നു വിവാഹിതരായത്. 2018 ഡിസംബറില്‍ ഇവര്‍ക്ക് ആദ്യത്തെ കണ്മണി ജനിച്ചു. 2019 ഒക്ടോബറില്‍ ഇവര്‍ക്ക് രണ്ടാമത്തെ കുട്ടിയും പിറന്നു.
ഇപ്പോള്‍ ആറാം വാര്‍ഷികത്തില്‍, ‘ഇതാണ് ഞങ്ങള്‍… നിങ്ങളുമൊത്തുള്ള ഈ ആറ് വര്‍ഷത്തെ ദാമ്പത്യ ജീവിതം മാന്ത്രികവും എന്നാല്‍ യഥാര്‍ത്ഥവുമാക്കിയതിന് നന്ദി’-എന്നാണ് രാധിക ഇന്‍സ്റ്റഗ്രാമില്‍ കുറിച്ചിരിക്കുന്നത്. വിവാഹ വാര്‍ഷിക ആശംസകള്‍, നിങ്ങളെ സ്‌നേഹിക്കുന്നു എന്നും രാധിക കുറിച്ചിട്ടുണ്ട്. യാഷിനൊപ്പമുള്ള ചിത്രങ്ങളും രാധിക പങ്കുവെച്ചിരിക്കുകയാണ്.
നിരവധി ആരാധകരും താരങ്ങളുമാണ് ദമ്പതികള്‍ക്ക് ആശംസകളുമായി എത്തിയിരിക്കുന്നത്. തെന്നിന്ത്യയൊട്ടാകെ ഇളക്കി മറിച്ച ചിത്രമായിരുന്നു പ്രശാന്ത് നീല്‍ ഒരുക്കിയ കെജിഎഫ്. ശ്രീനിധി ഷെട്ടിയാണ് ചിത്രത്തില്‍ നായികയായെത്തിയത്.
