ലോകം 91-ാമത് ഓസ്‌കര്‍ പ്രഖ്യാപനത്തിന് സാക്ഷ്യം വഹിച്ചിരിക്കുകയാണ് . ഇന്ത്യന്‍ സിനിമകളൊന്നും പട്ടികയില്‍ ഉണ്ടായിരുന്നില്ലെങ്കിലും സിനിമയെ സ്‌നേഹിക്കുന്നവരുടെ ശ്രദ്ധമുഴുവന്‍ ഓസ്‌കര്‍ പ്രഖ്യാപന ചടങ്ങിലേക്കായിരുന്നു.
ഇതിനിടെ തന്റെ ഫെയ്‌സ്ബുക്ക് പോസ്റ്റിലൂടെ കേരളത്തിലെ സിനിമ പ്രേമികളെയും ത്രസിപ്പിച്ചിരിക്കുകയാണ് യുവനടന്‍ ടൊവീനോ തോമസ്.
ഓസ്‌കര്‍ വേദിയില്‍ സദസ്സിലിരിക്കുന്ന ചിത്രം പങ്കുവെച്ചാണ് ടൊവീനോ ആരാധകരുടെ കൈയ്യടി നേടിയത്. എന്നാല്‍ ആ ചിത്രം തന്റെ പുതിയ ചിത്രമായിരുന്ന ‘ആന്‍ഡ് ദി ഓസ്‌കാര്‍ ഗോസ് ടു’ പോസ്റ്റര്‍ ആയിരുന്നെന്ന് മാത്രം. പോസ്റ്റര്‍ പങ്കുവെച്ച ടൊവീനോ ഓസ്‌കര്‍ വിജയികള്‍ക്ക് ആശംസകളും നേര്‍ന്നു.
പത്തേമാരിക്ക് ശേഷം സലീം അഹമ്മദ് സംവിധാനം ചെയ്യുന്ന ചിത്രമാണ് ‘ആന്‍ഡ് ദി ഓസ്‌കാര്‍ ഗോസ് ടു’. സിനിമയ്ക്കുള്ളിലെ സിനിമയാണ് ചിത്രത്തിന്റെ പ്രമേയം. കഴിഞ്ഞ ഓസ്‌കാര്‍ പുരസ്‌കാര പ്രഖ്യാപനത്തോട് അനുബന്ധിച്ച് ചിത്രത്തിന്റെ പേരും ഫസ്റ്റ് ലുക്ക് പോസ്റ്ററും പുറത്തുവിട്ടിരുന്നു.
അനു സിത്താരയാണ് ചിത്രത്തില്‍ നായിക. ചിത്രത്തില്‍ ഒരു ചലച്ചിത്ര സംവിധായകന്റെ വേഷത്തില്‍ ടൊവിനോ എത്തുമ്പോള്‍ പത്രപ്രവവര്‍ത്തകയുടെ വേഷത്തിലാണ് അനു സിത്താര എത്തുന്നത്.
സിദ്ധിഖ്, സലിം കുമാര്‍, ശ്രീനിവാസന്‍, ലാല്‍, അപ്പാനി രവി എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. മധു അമ്പാട്ടാണ് ആന്‍ഡ് ദ് ഓസ്‌കാര്‍ ഗോസ് ടുവിന്റെ ഛായാഗ്രഹണം നിര്‍വഹിക്കുന്നത്. ശബ്ദസംവിധാനം റസൂല്‍ പൂക്കുട്ടി. ബിജിബാലാണ് സംഗീത സംവിധാനം.
