മലയാളികളുടെ പ്രിയപ്പെട്ട താരദമ്പതികളാണ് നടനും സംവിധായകനുമായ പൃഥ്വിരാജും ഭാര്യ സുപ്രിയ മേനോനും. വര്‍ഷങ്ങള്‍ക്ക് മുമ്പ് ആരാധകരെയും പ്രേക്ഷകരെയും എല്ലാം ഞെട്ടിച്ചുകൊണ്ട് സര്‍പ്രൈസ് ആയിട്ടായിരുന്നു ഇവരുടെ വിവാഹ ചിത്രങ്ങള്‍ പുറത്തുവന്നത്. പാലക്കാട് വെച്ച് വളരെ ലളിതമായ ചടങ്ങുകളോടെയാണ് വിവാഹം നടന്നത്.
ഇവരുടെ വിവാഹത്തിന്റെ വീഡിയോ അടുത്തിടെയും സമൂഹ മാധ്യമങ്ങളില്‍ വൈറല്‍ ആയി മാറിയിരുന്നു. പാലക്കാട് തേന്‍കുറുശ്ശി കണ്ടാത്ത് ഹെറിറ്റേജ് വില്ലയില്‍ വെച്ചായിരുന്നു വിവാഹം. അടുത്ത ബന്ധുക്കള്‍ ഉള്‍പ്പെടെ 45 പേര്‍ മാത്രമാണ് വിവാഹ ചടങ്ങില്‍ പങ്കെടുത്തതെന്നും പിന്നീട് പൃഥ്വിരാജിന്റെ അമ്മ മല്ലിക സുകുമാരന്‍ പറഞ്ഞിരുന്നു.
മാധ്യമപ്രവര്‍ത്തകയായിരുന്ന സുപ്രിയ വിവാഹശേഷം ഈ ഫീല്‍ഡില്‍ നിന്നും വിട്ടുനില്‍ക്കുകയാണ്. ബിസിനസ്സും കാര്യങ്ങളുമൊക്കെയായി തിരക്കിലാണ് സുപ്രിയ ഇപ്പോള്‍. ഇപ്പോഴിതാ സുപ്രിയ സോഷ്യല്‍മീഡിയയില്‍ പങ്കുവെച്ച ഒരു പോസ്റ്റാണ് ശ്രദ്ധിക്കപ്പെടുന്നത്.
അച്ഛന്റെ ഓര്‍മ്മദിവസം ഹൃദയസ്പര്‍ശിയായ കുറിപ്പാണ് സുപ്രിയ പങ്കുവെച്ചത്. അച്ഛനെ പോലെ തന്നെ പിന്തുണയ്ക്കാന്‍ ഈ ലോകത്ത് മറ്റാര്‍ക്കും കഴിയില്ലെന്നും ഈ കടന്നുപോയ ഒരു വര്‍ഷം അച്ഛന്‍ മരിച്ചുവെന്ന് വിശ്വസിക്കാന്‍ കഴിയാത്തതായിരുന്നുവെന്നും സുപ്രിയ പറയുന്നു.
തന്റെ അച്ഛന്റെ ശബ്ദം കേള്‍ക്കുകയോ ആലിംഗനത്തിന്റെ ഊഷ്മളത അനുഭവിക്കുകയോ ചെയ്തിട്ട് ഒരുവര്‍ഷം ആയിരിക്കുന്നുവെന്നും തന്റെയും അമ്മയുടെയും ജീവിതം ഇനിയൊരിക്കലും മാറ്റാനാവാത്തവിധം മാറിമറിഞ്ഞുപോയെന്നും കുറിപ്പില്‍ സുപ്രിയ പറയുന്നു.
സുപ്രിയയുടെ കുറിപ്പിന്റെ പൂര്‍ണരൂപം
”അച്ഛന്‍ ഞങ്ങളെ വിട്ടു പോയിട്ട് ഒരു വര്‍ഷം പിന്നിടുന്നു. ഞാന്‍ ഏറ്റവും കൂടുതല്‍ കണ്ണുനീരൊഴുക്കിയ വര്‍ഷമാണ് കടന്നുപോയത്. എന്റെ ഫോണിലെ സ്പീഡ് ഡയല്‍ ലിസ്റ്റിലെ ആദ്യത്തെ നമ്പറായ അച്ഛന്റെ നമ്പര്‍ ഡയല്‍ ചെയ്യുന്ന ശീലം നിര്‍ത്താനെനിക്ക് ഇതുവരെ കഴിഞ്ഞിട്ടില്ല.
എന്റെ ഫോണിലെ ചിത്രങ്ങളും വിഡിയോകളും സ്‌ക്രോള്‍ ചെയ്ത് അച്ഛന്റെ നല്ല നിമിഷങ്ങളും ഞാന്‍ ഇതുവരെ കണ്ടിട്ടില്ലാത്ത ചിത്രങ്ങളും തിരയുന്ന ശീലവും ഉപേക്ഷിക്കാന്‍ കഴിയുന്നില്ല. ഈ കഴിഞ്ഞ വര്‍ഷത്തില്‍ കൂടുതല്‍ ദിവസവും സംഭവിച്ചത് വിശ്വസിക്കാന്‍ കഴിയാതെ ആരോടെക്കെയോ ഉള്ള ദേഷ്യത്തില്‍ കഴിച്ചുകൂട്ടുകയായിരുന്നു.
എന്തുകൊണ്ടാണ് എനിക്ക് ഇങ്ങനെ സംഭവിച്ചത്? എന്തുകൊണ്ട് എന്റെ അച്ഛന്‍, എന്തുകൊണ്ട് അതിനു പകരം മറ്റാരെങ്കിലുമായില്ല? അച്ഛന്റെ ശബ്ദം കേള്‍ക്കുകയോ ആലിംഗനത്തിന്റെ ഊഷ്മളത അനുഭവിക്കുകയോ ചെയ്തിട്ട് ഒരുവര്‍ഷമായിരിക്കുന്നു.
നമ്മള്‍ പരസ്പരം സംസാരിക്കുകയോ കാണുകയോ ചെയ്യാത്ത ഏറ്റവും ദൈര്‍ഘ്യമേറിയ സമയമാണിത്. ഈ ഒരു വര്‍ഷത്തില്‍ അച്ഛനെക്കുറിച്ച് പറയാതെയോ ചിന്തിക്കാതെയോ ചെയ്യാതെ ഒരു ദിവസംപോലും കടന്നുപോയിട്ടില്ല. എല്ലാ രാത്രികളിലും അച്ഛന്‍ എന്റെ സ്വപ്നങ്ങളില്‍ വരുമെന്നും നമ്മള്‍ ഒരുമിച്ചിരിക്കുമെന്നും പ്രതീക്ഷിച്ച ഒരു വര്‍ഷം. ഞാന്‍ ശരിക്കും തനിച്ചായിപ്പോയെന്നും അച്ഛനെപ്പോലെ ആര്‍ക്കും എന്നെ പിന്തുണയ്ക്കാന്‍ കഴിയില്ലെന്നും മനസ്സില്ലാമനസ്സോടെ അംഗീകരിച്ച ഒരു വര്‍ഷം.
എല്ലാവരും അവരവരുടെ ജീവിതത്തിലെ തിരക്കില്‍ മുഴുകുമ്പോള്‍ എന്റെയും എന്റെ അമ്മയുടെയും ജീവിതം ഇനിയൊരിക്കലും മാറ്റാനാവാത്തവിധം മാറിമറിഞ്ഞു. അച്ഛാ, എന്റെയും അമ്മയുടെയും ജീവിതത്തിലെ ഏറ്റവും പ്രയാസമേറിയ ഒരു വര്‍ഷമാണ് കടന്നുപോയത്.
മുന്നോട്ടുള്ള പാതയില്‍ അച്ഛന്‍ ഒപ്പമില്ലെന്നുള്ള ഓര്‍മ പോലും ഭയാനകമാണ്. പക്ഷേ ഒരു കാര്യത്തില്‍ എനിക്കുറപ്പുണ്ട്, അച്ഛനെ രക്തം എന്റെ സിരകളില്‍ ഓടുന്നതുകൊണ്ട് ഏതു പ്രതിസന്ധികളെയും നേരിടാന്‍ എനിക്ക് കഴിമെന്നും അച്ഛന്‍ തെളിച്ചു തന്നതാണെന്നും വഴിയിലൂടെയാണ് മുന്നോട്ടുള്ള പ്രയാണമെന്നും. ഈ ഒരു വര്‍ഷം ഞങ്ങള്‍ അച്ഛനെ വല്ലാതെ മിസ് ചെയ്യുകയും ഒരുപാട് സ്‌നേഹിക്കുകയും ചെയ്തു. എന്ന് എന്റെ അച്ഛന്റെ മകള്‍.”-സുപ്രിയ കുറിച്ചു.
