മലയാള സിനിമാ ലോകത്തെ എന്നും ചിരിപ്പിച്ചിട്ടുള്ള സൗഹൃദത്തിന്റെ മൂല്യം എന്നു കാത്തുസൂക്ഷിച്ചിട്ടുള്ള താരമാണ് ഇന്നസെന്റ്. പ്രേക്ഷകരെ പോലെ തന്നെ സിനിമാ ലോകത്തെ സുഹൃത്തുക്കൾക്കും പ്രിയപ്പെട്ട വ്യക്തിയായിരുന്നു ഇന്നസെന്റ്. അദ്ദേഹം ചെയ്ത സഹായങ്ങളെ കുറിച്ച് പല സുഹൃത്തുക്കളും മുൻപും തുറന്നുപറഞ്ഞിട്ടുണ്ട്.
ഇന്നസെന്റിന്റെ ചേതനയറ്റ ശരീരം കേരളക്കരയെ ഒന്നാകെ കരയിപ്പിക്കുകയാണ്. താരത്തിന് അന്ത്യാഞ്ജലി അർപ്പിക്കാനെത്തിയ മമ്മൂട്ടിയും ജയറാമും ദിലീപും ഉൾപ്പടെയുള്ള താരങ്ങൾക്ക് കരച്ചിലടക്കാൻ സാധിക്കുന്നുണ്ടായിരുന്നില്ല. ഇന്നസെന്റ് എല്ലാവരോടും കാണിച്ച സ്‌നേഹമായിരുന്നു ആ കണ്ണീരിന് പിന്നിലുണ്ടായിരുന്നത്.
സുഹൃത്തുക്കളുടെ ആവശ്യങ്ങൾക്ക് പണത്തിന്റെ കണക്ക് നോക്കാതെ കൈയ്യയച്ച് സഹായം നൽകാൻ മടിക്കാത്ത താരമായിരുന്നു ഇന്നസെന്റ്.മുൻപ് പണത്തിനായി ഒരുപാട് കഷ്ടപ്പെട്ടിട്ടുണ്ട് എന്നതുകൊണ്ട് തന്നെ അടുപ്പക്കാർക്ക് ഒരാവശ്യം വന്നാൽ ഒന്നും നോക്കാതെ പണം നൽകാൻ അദ്ദേഹം ശ്രദ്ധിച്ചിരുന്നു.
തന്റെ അടുത്ത സുഹൃത്തായ ശ്രീനിവാസന്റെ വിവാഹത്തിന് ഇന്നസെന്റ് നൽകിയ മൂല്യമേറിയ ഒരു സഹായത്തെക്കുറിച്ച് അദ്ദേഹം തന്നെ പല അഭിമുഖങ്ങളിലും പറയാറുണ്ട്. 1984 ൽ ആയിരുന്നു ശ്രീനിവാസന്റെ വിവാഹം. അന്ന് ഇന്നസെന്റും ഡേവിഡ് കാച്ചപ്പിള്ളിയും ചേർന്ന് നിർമ്മിച്ച ഒരു കഥ ഒരു നുണക്കഥ എന്ന സിനിമയുടെ സെറ്റിൽ വച്ചാണ് ശ്രീനിവാസൻ വിവാഹക്കാര്യം ഉറപ്പിച്ചത്.
ആരോയും അറിയിക്കാതെ ഒരു രജിസ്റ്റർ വിവാഹമാണ് പദ്ധതിയിട്ടത്. പക്ഷേ അതിനും കൈയിൽ പണമില്ല. ഇതോടെ ഇക്കാര്യം ആദ്യം ഇന്നസെന്റിനോടാണ് പറഞ്ഞത്. അന്ന് ലൊക്കേഷനിൽ നിന്ന് പോകുന്നേരം ശ്രീനിവാസന്റെ കൈയിൽ ഇന്നസെന്റ് ഒരു പൊതി ഏൽപ്പിച്ചു. പണമായിരുന്നു അത്. 400 രൂപ. അന്നത്തെ മൂല്യം വച്ച് നോക്കുമ്പോൾ ഒരു നല്ല തുക.
ഇതോടെ ഈ പണം എവിടെനിന്ന് സംഘടിപ്പിച്ചെന്ന ശ്രീനിയുടെ ചോദ്യത്തിന് ഭാര്യയുടെ രണ്ട് വള കൂടി വിറ്റു എന്നായിരുന്നു ഇന്നസെന്റിന്റെ മറുപടി. ഇന്നസെന്റ് അന്ന് നൽകിയ പണം കൊണ്ടാണ് വധുവിനുള്ള സാരിയും മറ്റുമൊക്കെ വാങ്ങിയതെന്ന് ശ്രീനിവാസൻ പറയാറുണ്ട് പലപ്പോഴും.
ആ പണവും തികയാതെ വന്നതോടെയാണ് മമ്മൂട്ടിയോട് 2000 രൂപ കൂടി വാങ്ങിയാണ് കല്യാണം നടത്തിയതെന്നും ശ്രീനിവാസൻ പറഞ്ഞിരുന്നു. ഇപ്പോഴിതാ ഇന്നസെന്റിനെ അനുസ്മരിച്ച് വിനീത് ശ്രീനിവാസൻ ഫേസ്ബുക്കിൽ ഇട്ട കുറിപ്പിലും ഇക്കാര്യം പറയുന്നുണ്ട്.
വിനീത് ശ്രീനിവാസന്റെ കുറിപ്പ്:
‘എന്തു പറയണം എന്നറിയില്ല.. ഒരുപാട് ഓർമ്മകളുണ്ട്.. കുട്ടിക്കാലം തൊട്ട് സ്ഥിരമായി കാണുന്ന, ഒരുപാടു കഥകൾ പറയുകയും ചിരിപ്പിക്കുകയും ചെയ്തിട്ടുള്ള മനുഷ്യനാണ്.. അച്ഛന്റെയും അമ്മയുടെയും കല്യാണത്തിനു മുന്നേ, ആലീസാന്റിയുടെ വള വിറ്റ കാശു കയ്യിലേൽപ്പിച്ചാണ് അച്ഛനെ തലശ്ശേരിയിലേക്കു വണ്ടി കേറ്റി വിട്ടത് എന്നു കേട്ടിട്ടുണ്ട്. എന്റെ കുട്ടിക്കാലത്ത്, അച്ഛന്റെ ചുറ്റും കണ്ടിരുന്ന കൂട്ടുകാരോരോരുത്തരായി അരങ്ങൊഴിയുകയാണ്.. ഗീത് ഹോട്ടലിനു വെളിയിൽ, ഷൂട്ട് കഴിഞ്ഞു വൈകുന്നേരത്തെ ട്രങ്ക് കോളിനുവേണ്ടി കാത്തുനിന്ന പ്രതിഭാശാലികളോരോരുത്തരെയും ഓർക്കുന്നു. മറുകരയിൽ ചിരിപ്പിക്കുകയും ചിന്തിപ്പിക്കുകയും ചെയ്ത ഒരുപാടു പേരുണ്ട്. നഷ്ടം നമുക്കു മാത്രമാണ്.. ‘,
