മലയാളത്തിന്റെ നടന വിസ്മയം മോഹൻലാൽ സിനിമ സംവിധാനം ചെയ്യാനൊരുങ്ങുന്നുന്നുവെന്ന വാർത്ത ആരാധകരെ ഏറെ സന്തോഷിപ്പിക്കുന്നതായിരുന്നു.
പുതിയ ബ്ലോഗിലൂടെയാണ് മോഹൻലാൽ വാർത്ത പുറം ലോകത്തെ അറിയിച്ചത്. ബറോസ്സ് എന്ന് പേരിട്ടിരിക്കുന്ന ഈ ചിത്രം കുട്ടികൾക്കും വലിയവർക്കും ഒരുപോലെ ആസ്വദിക്കാൻ കഴിയുന്ന ഒരു 3ഡി സിനിമയാണെന്ന് മോഹൻലാൽ ബ്ലോഗിലൂടെ വ്യക്തമാക്കിയിരുന്നു.
ഇപ്പോൾ മോഹൻലാൽ സംവിധാനം ചെയ്യുന്നതിനെ കുറിച്ച് പ്രതികരിക്കുകയാണ് സംവിധായകരായ സത്യൻ അന്തിക്കാടും, പ്രിയദർശനും.
ഒരു സ്വകാര്യ ചാനലിന്റെ അവാർഡ് വേദിയിലായിരുന്നു ഇരുവരുടെയും പ്രതികരണം. മോഹൻലാൽ സംവിധായകനാവുന്നു.
എന്താണ് അഭിപ്രായം ഇതായിരുന്നു സത്യൻ അന്തിക്കാടിനോടും പ്രിയദർശനോടുമുള്ള ചോദ്യം. മോഹൻലാലിന് ഇതു തന്നെ വരണം സത്യൻ അന്തിക്കാട് ചിരിച്ചു കൊണ്ട് പറഞ്ഞു.
സംവിധായകൻ ചിന്തിക്കുന്നതിന്റെ എത്രയോ ഇരട്ടി തിരിച്ചു നൽകുന്ന മോഹൻലാലിന്റെ ഉള്ളിൽ ഒരു സംവിധായകനുണ്ടെന്ന കാര്യം നേരത്തെ വ്യക്തമാണെന്ന് സത്യൻ വിശദമാക്കി.
സത്യൻ പറഞ്ഞത് 100% ശരിയാണെന്ന് പ്രിയദർശനും പറഞ്ഞു. പ്രിയൻ എടുത്ത സിനിമകൾ തന്റേതാണെന്നും തന്റെ സിനിമകൾ പ്രിയന്റേതാണെന്നും വ്യാപകമായി തെറ്റിദ്ധരിക്കപ്പെട്ടിട്ടുണ്ടെന്ന് സത്യൻ അന്തിക്കാട് പറഞ്ഞു.
താൻ കാണാൻ ആഗ്രഹിക്കുന്ന തരം സിനിമകളാണ് എന്നും എടുത്തിട്ടുള്ളതെന്നും ഇനിയെടുക്കുന്ന സിനിമയും അങ്ങനെ തന്നെയാവുമെന്നും പ്രിയദർശൻ വ്യക്തമാക്കി.
