മലയാളികളുടെ ടെലിവിഷന്‍ രംഗത്തെ പ്രിയപ്പെട്ട സീരിയലായിരുന്നു സാന്ത്വനം. ഏഷ്യാനെറ്റില്‍ സംപ്രേക്ഷണം ചെയ്തിരുന്ന സീരിയല്‍ സാന്ത്വനം എന്ന വീട്ടിലെ കുടുംബത്തിന്റെ പശ്ചാത്തലത്തിലായിരുന്നു ഒരുങ്ങിയത്. ഈ പരമ്പര വളരെ പെട്ടെന്ന് തന്നെ പ്രേക്ഷകരുടെ പ്രിയപ്പട്ട പരമ്പരയായി മാറുകയായിരുന്നു.
നടി ചിപ്പി അവതരിപ്പിക്കുന്ന ദേവി എന്ന കഥാപാത്രത്തെ ചുറ്റിപ്പറ്റിയാണ് ആദ്യം കഥ മുന്നോട്ട് പോയത്. പിന്നീട് ബാലന്റേയും സഹോദരങ്ങളുടേയും കഥയായി സീരിയല്‍ പരിണമിച്ചു. ശിവന്‍, ഹരി, അപ്പു, അഞ്ജലി തുടങ്ങിയ കഥാപാത്രങ്ങള്‍ ഈ പരമ്പരയിലൂടെ ആരാധകരുടെ ഹൃദയം കവര്‍ന്നവരാണ്.
തമിഴ് പരമ്പരയായ പാണ്ഡ്യന്‍ സ്റ്റോഴ്‌സിന്റെ മലയാളം റീമേക്കാണ് സാന്ത്വനം. ഈ സീരിയലിലെ ചെറിയ കഥാപാത്രങ്ങള്‍ പോലും ഏറെ ശ്രദ്ധനേടിയിരുന്നു. അടുത്തിടെയായിരുന്നു സീരിയല്‍ അവസാനിച്ചത്. പ്രേക്ഷകരെ ഇത് വളരെ വേദനയിലാഴ്ത്തിയിരുന്നു.
ഇപ്പോഴിതാ ആരാധകര്‍ക്ക് സന്തോഷം പകരുന്ന വാര്‍ത്തയാണ് പുറത്തുവരുന്നത്. സാന്ത്വനത്തിന്റെ രണ്ടാംഭാഗം വരുന്നുവെന്നാണ് വാര്‍ത്ത. നേരത്തെ സാന്ത്വനത്തിലെ താരങ്ങളെല്ലാം ഒത്തുകൂടിയതിന്റെ ചിത്രങ്ങള്‍ സോഷ്യല്‍മീഡിയയില്‍ വൈറലായിരുന്നു.
ഇതിന് താഴെ ഒത്തിരിപേരാണ് സാന്ത്വനത്തിന്റെ രണ്ടാംഭാഗം വരുന്നുണ്ടോ എന്ന ചോദ്യവുമായി എത്തിയത്. ഇതിനുള്ള മറുപടിയായി സീരിയലിന്റെ രണ്ടാംഭാഗത്തിന്റെ പ്രൊമോ പുറത്തുവിട്ടിരിക്കുകയാണ് ചാനല്‍. അകമേ അടുത്തും, പുറമെ അകന്നും സാന്ത്വനം 2 ഉടന്‍ വരുന്നു എന്നാണ് പ്രോമോ വീഡിയോക്ക് നല്‍കിയ ക്യാപ്ഷന്‍.
