അയോധ്യയിലെ രാമക്ഷേത്ര പ്രതിഷ്ഠയോട് അനുബന്ധിച്ച് പ്രശസ്ത ഗായിക ചിത്ര നടത്തിയ പരാമര്‍ശം വലിയ വിവാദത്തിലായിരുന്നു. പ്രതിഷ്ഠാദിനത്തില്‍ രാമനാപം ജപിക്കണമെന്നായിരുന്നു ചിത്ര പറഞ്ഞത്. നിരവധി പേരാണ് ചിത്രയെ രൂക്ഷമായ ഭാഷയില്‍ വിമര്‍ശിച്ച് സോഷ്യല്‍മീഡിയയിലൂടെയും മറ്റും രംഗത്തെത്തിയത്.
ഗായകന്‍ സൂരജ് സന്തോഷും സംഭവത്തില്‍ ചിത്രക്കെതിരെ പ്രതികരിച്ച് രംഗത്തെത്തിയിരുന്നു. ഇപ്പോഴിതാ ചിത്രക്കെതിരായ സൂരജ് സന്തോഷിന്റെ വാദങ്ങളില്‍ പ്രതികരിച്ച് എത്തിയിരിക്കുകയാണ് നിര്‍മ്മാതാവ് സന്ദീപ് സേനന്‍.
ഫേസ്ബുക്കിലൂടെയായിരുന്നു ഉര്‍വശി തിയ്യേറ്റര്‍ പ്രൊഡക്ഷന്‍ ഹൗസ് മേധാവി സന്ദീപ് സേനന്റെ പ്രതികരണം. ചിത്രയെന്ന അനുഗ്രഹീത ഗായിക ചെയ്ത തെറ്റ് എന്താണെന്നാണ് സൂരജ് കരുതുന്നതെന്നും അവര്‍ ആരാധിക്കുന്ന ദൈവത്തെ പ്രകീര്‍ത്തിച്ചതാണൊ അവര്‍ ചെയ്ത തെറ്റെന്നും സന്ദീപ് ചോദിക്കുന്നു.
നിങ്ങള്‍ക്ക് മൈലേജ് ഉണ്ടാക്കാന്‍ ഉചിതം ചിത്രയാണ്. ജോലിയില്‍ നിന്ന് വിലക്കിയാലും അവസരങ്ങള്‍ ഇല്ലാതായാലുമെന്നൊക്കെ നിങ്ങള്‍ക്ക് പറയാന്‍ പറ്റുന്നത് മതത്തെ വിമര്‍ശിച്ചതുകൊണ്ടാണെന്നും ചിത്രയെ വിമര്‍ശിച്ച് മൈലേജ് ഉണ്ടാക്കിയ സ്വാര്‍ത്ഥമതിയായ ഗായകന്‍ എന്നാവും നാളെ ചരിത്രം നിങ്ങളെ അടയാളപ്പെടുത്തുക എന്നും സന്ദീപ് പറഞ്ഞു.
ഇരവാദം ഉന്നയിക്കുന്നതിനിടക്ക് വല്ലപ്പോഴും ഒന്ന് കണ്ണാടിയില്‍ നോക്കുന്നത് നന്നാവും, പ്രതിബിംബത്തിന് വേട്ടക്കാരന്റെ മുഖച്ഛായയുണ്ടാവുമെന്നും താന്‍ ചിത്രച്ചേച്ചിയെ പിന്തുണക്കുന്നുവെന്നും സന്ദീപ് കുറിപ്പില്‍ പറയുന്നു.
സന്ദീപിന്റെ കുറിപ്പിന്റെ പൂര്‍ണ്ണരൂപം
ലോകം അംഗീകരിക്കുന്ന ഗായികയെ അവരുടെ വിശ്വാസം തുറന്നു പറഞ്ഞതിന്റെ പേരില്‍ അധിക്ഷേപിച്ച്, ആ ചെലവില്‍ പാര്‍ട്ടി പരിപാടി ഉല്‍ഘാടനം ചെയ്യലും , ഗായകരുടെ അസ്സോസിയേഷനില്‍ നിന്ന് രാജിവെക്കലും , പിന്നെ സോഷ്യല്‍ മീഡിയയില്‍ ഇരവാദം ഉന്നയിക്കലും .
ചിത്രയെന്ന അനുഗ്രഹീത ഗായിക ചെയ്ത തെറ്റ് എന്താണെന്നാണ് സൂരജ് കരുതുന്നത് . അവര്‍ ആരാധിക്കുന്ന ദൈവത്തെ പ്രകീര്‍ത്തിച്ചതോ ? , രാമനാമം ജപിക്കണം എന്ന് പറഞ്ഞതോ ? അനീതികളെന്ന് എന്ന് കരുതുന്ന വിശ്വാസ പാരമ്പര്യങ്ങള്‍ കേരളത്തിലെ ന്യൂനപക്ഷ വിഭാഗങ്ങള്‍ക്കിടയിലും ഉണ്ടല്ലോ.
സൂരജ് എവിടെയെങ്കിലും അതിനെ കുറിച്ചു മിണ്ടിയതായി കേട്ടിട്ടില്ല .നിങ്ങള്‍ക്ക് മൈലേജ് ഉണ്ടക്കാന്‍ ചിത്രയാണ് ഉചിതം . ജോലിയില്‍ നിന്ന് വിലക്കിയാലും , അവസരങ്ങള്‍ ഇല്ലാതായാലും എന്നൊക്കെ സൂരജ് സന്തോഷിന് പറയാനെങ്കിലും പറ്റുന്നത് ഈ മതത്തെ വിമര്‍ശിച്ചതുകൊണ്ടു മാത്രമാണ് …
കൈ വെട്ട് കേസിലെ പ്രതി കഴിഞ്ഞ ഒരു ദശാബ്ദം സുഖിച്ചു വാണ നാടാണിത് … ഈ വിമര്‍ശനം നേരെ തിരിച്ചാണെങ്കില്‍ എന്തായിരിക്കും അവസ്ഥ ഒന്ന് ആലോചിച്ചു നോക്കൂ. ഇരവാദം മുഴക്കാന്‍ പോയിട്ട് സാധകം ചെയാന്‍ പോലും അവതില്ലാത്ത അവസ്ഥയിലേക്ക് എത്തിയേനെ. ചിത്രയെ വിമര്‍ശിച്ച് മൈലേജ് ഉണ്ടാക്കിയ സ്വാര്‍ത്ഥമതിയായ ഗായകന്‍ എന്നാവും നാളെ ചരിത്രം നിങ്ങളെ അടയാള പെടുത്തുക … ഇരവാദം ഉന്നയിക്കുന്നതിനിടക്ക് വല്ലപ്പോഴും ഒന്ന് കണ്ണാടിയില്‍ നോക്കുന്നത് നന്നാവും പ്രതിബിംബത്തിന് വേട്ടക്കാരന്റെ മുഖച്ഛായയുണ്ടാവും.
ചിത്ര ചേച്ചിക്ക് നിരുപാധികം പിന്തുണ…!
