ഒരു സമയത്ത് തമിഴ് സിനിമയിൽ നിറഞ്ഞു നിന്നിരുന്ന നടിമാരിലൊരാളാണ് സ്‌നേഹ. മലയാളത്തിലൂടെയാണ് സ്‌നേഹ സിനിമയിൽ അരങ്ങേറ്റം കുറിച്ചത്. ഇങ്ങനെ ഒരു നിലാപക്ഷി എന്നായിരുന്നു ചിത്രത്തിന്റെ പേര്. പിന്നീട് നിരവധി മലയാള സിനിമകളിൽ സ്‌നേഹ അഭിനയിച്ചു. ശിക്കാർ, തുറുപ്പു ഗുലാൻ, പ്രമാണി, ദ് ഗ്രേറ്റ് ഫാദർ തുടങ്ങി നിരവധി മലയാള ചിത്രങ്ങളിൽ സ്‌നേഹ നായികയായെത്തി.
അഭിനയത്തിലൂടെ മലയാളികളുടെയും പ്രിയങ്കരിയാകാൻ സ്‌നേഹയ്ക്ക് കഴിഞ്ഞു. മൂന്ന് തവണ തമിഴ്‌നാട് സർക്കാരിന്റെ മികച്ച നടിക്കുള്ള അവാർഡും സ്‌നേഹയ്ക്ക് കിട്ടിയിട്ടുണ്ട്. ഇടയ്ക്ക് ഗ്ലാമർ വേഷങ്ങളിലും സ്‌നേഹ സിനിമയിൽ തിളങ്ങിയിരുന്നു. ഇപ്പോൾ മോഡലിങ് രംഗത്ത് സജീവമാണ് താരം.
ALSO READ
മകൻ വേദാന്ത് ഇന്ത്യയ്ക്ക് വേണ്ടി സ്വർണം നേടിയ സന്തോഷം പങ്കു വച്ച് നടൻ മാധവൻ
നിരവധി പരസ്യ ചിത്രങ്ങളിലും സ്‌നേഹ ഇതിനോടകം അഭിനയിച്ചു കഴിഞ്ഞു. ഇടയ്ക്കിടെ കുടുംബത്തോടൊപ്പമുള്ള ആഘോഷ ചിത്രങ്ങളും താരം പങ്കുവയ്ക്കാറുണ്ട്. ഇപ്പോഴിതാ തന്റെ പുതിയ ചിത്രങ്ങൾ പങ്കുവച്ചിരിക്കുകയാണ് സ്‌നേഹ.
പുതുവർഷ ആശംസകൾ നേർന്നു കൊണ്ടാണ് കുടുംബത്തോടൊപ്പമുള്ള ചിത്രങ്ങൾ സ്‌നേഹ പങ്കുവച്ചിരിക്കുന്നത്. ചിത്തിര മാസത്തിലെ ആദ്യ ദിനമാണ് തമിഴ്‌നാട്ടിൽ പുതുവർഷമായി ആഘോഷിക്കാറുള്ളത്. വീടുകളിൽ കോലം വരച്ചും ക്ഷേത്രങ്ങൾ സന്ദർശിച്ചുമൊക്കെയാണ് തമിഴർ പുതുവർഷം ആഘോഷിക്കുന്നത്. മക്കൾക്കും ഭർത്താവ് പ്രസന്നയ്ക്കുമൊപ്പമാണ് സ്‌നേഹ പുതുവർഷ ചിത്രങ്ങളുമായെത്തിയിരിക്കുന്നത്.
സ്‌നേഹ കുടുംബത്തോടൊപ്പം പങ്കുവച്ചിരിക്കുന്ന ചിത്രങ്ങൾക്ക് നിരവധി പേരാണ് കമന്റുമായെത്തിയിരിക്കുന്നത്. നടിമാരായ ശ്രീദേവി വിജയകുമാർ, കനിഹ തുടങ്ങി നിരവധി താരങ്ങളും കുടുംബത്തിന് പുതുവർഷ ആശംസകൾ നേർന്നിട്ടുണ്ട്. ചിത്രങ്ങൾ നല്ല ക്യൂട്ടാണെന്നും അഴകാണെന്നുമൊക്കെയാണ് കമന്റുകളിലധികവും. സാരിയുടുത്ത് മുല്ലപ്പൂ ചൂടിയാണ് സ്‌നേഹ ചിത്രങ്ങളിൽ. ഷർട്ടും മുണ്ടുമാണ് പ്രസന്നയുടെ വേഷം.
പട്ടാസ്, വാൻ എന്നിവയായിരുന്നു സ്‌നേഹയുടേതായി ഒടുവിൽ തീയേറ്ററുകളിലെത്തിയ ചിത്രം. ആർ.എ ഋത്വിക് ആയിരുന്നു വാൻ സംവിധാനം ചെയ്തത്. ദുൽഖർ സൽമാൻ, കല്യാണി പ്രിയദർശൻ, പ്രിയ ഭവാനി ശങ്കർ എന്നിവരായിരുന്നു ചിത്രത്തിൽ പ്രധാന വേഷത്തിലെത്തിയത്. ധനുഷിനൊപ്പം പട്ടാസ് എന്ന ചിത്രത്തിലും സ്‌നേഹ അഭിയച്ചിരുന്നു. വിവാഹ ശേഷം പൊതുവേ നടിമാർ സിനിമയിൽ നിന്ന് ഇടവേള എടുക്കാറുണ്ടെങ്കിലും അധിക നാൾ സ്‌നേഹ സിനിമ മേഖലയിൽ നിന്ന് വിട്ടു നിന്നിട്ടില്ല.
ALSO READ
നീണ്ട നാളത്തെ പ്രണയത്തിനൊടുവിൽ 2012 ലാണ് സ്‌നേഹയും പ്രസന്നയും തമ്മിൽ വിവാഹിതരാകുന്നത്. രണ്ട് കുട്ടികളാണ് ഈ താരദമ്പതിമാർക്കുള്ളത്. 2020 ജനുവരിയിലാണ് തനിക്ക് ഒരു മകൾ കൂടി ജനിച്ച വിവരം സ്‌നേഹ ആരാധകരെ അറിയിച്ചത്. വിഹാൻ, ആദ്യന്ത എന്നിങ്ങനെയാണ് മക്കളുടെ പേര്. മക്കളുടെ പിറന്നാൾ ആഘോഷ ചിത്രങ്ങൾ സ്‌നേഹ ആരാധകരുമായി പങ്കിടാറുണ്ട്.
