പൃഥ്വിരാജ് ചിത്രം നയണിന്റെ ട്രെയിലര്‍ എത്തി. ആകാംക്ഷയും ഭയവും പ്രേക്ഷകരില്‍ ജനിപ്പിക്കുന്നതാണ് ട്രെയിലര്‍.
ഹൊറര്‍ ചിത്രമാണോ അതോ സയന്‍സ് ഫിക്ഷനോ എന്ന് സംശയം ജനിപ്പിക്കുന്ന തരത്തിലുള്ളതാണ് ട്രെയിലര്‍.
ദുല്‍ഖര്‍ സല്‍മാന്‍ നായകനായ 100 ഡേയ്‌സ് ഓഫ് ലവിന് ശേഷം ജെനൂസ് മുഹമ്മദ് ഒരുക്കുന്ന ചിത്രമാണിത്. സിനിമയുടെ തിരക്കഥയും ജെനുസ് തന്നെയാണ് ഒരുക്കിയിരിക്കുന്നത്.
അച്ഛന്റെയും മകന്റെയും വൈകാരികമായ കഥയാണ് ചിത്രം പറയുന്നതെന്ന് പൃഥിരാജ് തന്നെ വെളിപ്പെടുത്തിയിരുന്നു. ‘ഗോദ’യിലൂടെ മലയാളത്തിലെത്തിയ വാമിഖയാണ് ചിത്രത്തിലെ നായിക.
മംമ്ത മോഹന്‍ദാസും ഒരു പ്രധാന വേഷത്തില്‍ എത്തുന്നുണ്ട്. ഡോ. ഇനയത്ത് ഖാന്‍ എന്ന ശ്രദ്ധേയ കഥാപാത്രമായി പ്രകാശ് രാജും ചിത്രത്തിലുണ്ട്. ടോണി ലൂക്ക്, ശേഖര്‍ മേനോന്‍, വിശാല്‍ കൃഷ്ണ, ആദില്‍ ഇബ്രാഹിം എന്നിവരാണ് മറ്റു താരങ്ങള്‍.
അഭിനന്ദ് രാമാനുജം ഛായാഗ്രഹണം നിര്‍വഹിക്കുന്ന ചിത്രത്തിന് സംഗീതം ഒരുക്കുന്നത് ഷാന്‍ റഹമാന്‍ ആണ്. ഫെബ്രുവരി ഏഴിന് ചിത്രം തിയേറ്ററുകളിലെത്തും.
