മലയാളത്തിന്റെ യൂത്ത് ഐക്കണ്‍ നടന്‍ പൃഥ്വിരാജിന്റെ സംവിധാനത്തില്‍ താരചക്രമവര്‍ത്തി മോഹന്‍ലാല്‍ നായകനായ ലൂസിഫറിന്റെ ആദ്യ ടീസര്‍ ഇന്ന് രാവിലെ 9 നാണ്് റിലീസ് ചെയ്തത്. മമ്മൂട്ടി തന്റെ ഫേസ്ബുക്ക് പേജിലൂടെ പങ്കുവെച്ച വീഡിയോ ഇപ്പോള്‍ മെഗാ ഹിറ്റായിരിക്കുകയാണ്.
തങ്ങളുടെ ചിത്രത്തിന്റെ ടീസര്‍ റിലീസ് ചെയ്തതിനു ഇപ്പോള്‍ മോഹന്‍ലാലും പൃഥ്വിയും മമ്മൂട്ടിയോട് നന്ദി പറഞ്ഞിരിക്കുകയാണ്.
മമ്മൂട്ടിയുടെ ഒഫീഷ്യല്‍ ഫേസ്ബുക്ക് പേജില്‍ ലൂസിഫര്‍ ടീസറിന് താഴെ ആണ് ഇവര്‍ നന്ദി പറഞ്ഞു കമന്റ് ഇട്ടിരിക്കുന്നത്. റടീസറിലെ മോഹന്‍ലാലിന്റെ ഡയലോഗും ലുക്കും വലിയ ആകാംഷയാണ് പ്രേക്ഷകരിലുണ്ടാക്കിയിരിക്കുന്നത്.
ഈ ചിത്രത്തില്‍ ഒരു നിര്‍ണ്ണായക വേഷം ചെയ്യുന്ന സംവിധായകന്‍ ഫാസിലിന്റെ ഡയലോഗും ടീസറില്‍ കേള്‍ക്കാം.പൊളിറ്റിക്കല്‍ ത്രില്ലര്‍ ഗണത്തില്‍ പെടുന്ന സിനിമയാണ് ലൂസിഫര്‍. സ്റ്റീഫന്‍ നെടുമ്പിള്ളി എന്ന രാഷ്ട്രീയ പ്രവര്‍ത്തകനെയാണ് ലൂസിഫറില്‍ മോഹന്‍ലാല്‍ അവതരിപ്പിക്കുക.
വലിയ മുതല്‍മുടക്കില്‍ ഒരുങ്ങുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് മുരളി ഗോപിയാണ്. മഞ്ജു വാര്യരാണ് ചിത്രത്തില്‍ നായിക. ബോളിവുഡ് താരം വിവേക് ഒബ്റോയി ആണ് വില്ലന്‍. ഇന്ദ്രജിത്ത്, കലാഭവന്‍ ഷാജോണ്‍, ടൊവിനോ, ഫാസില്‍, മംമ്ത, ജോണ്‍ വിജയ് എന്നിവരാണ് മറ്റുതാരങ്ങള്‍.
ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ലൂസിഫര്‍ നിര്‍മ്മിക്കുന്നത്. തിരുവനന്തപുരം, വാഗമണ്‍, വണ്ടിപ്പെരിയാര്‍, എറണാകുളം, ബംഗളൂരു, ദുബായ്, ലക്ഷദ്വീപ്, റഷ്യ തുടങ്ങിയ സ്ഥലങ്ങളാണ് ചിത്രത്തിന്റെ പ്രധാന ലൊക്കേഷന്‍. ഛായാഗ്രഹണം സുജിത്ത് വാസുദേവ്. സംഗീതം ദീപക് ദേവ്. ചിത്രം അടുത്ത വര്‍ഷം മാര്‍ച്ചില്‍ തിയേറ്ററുകളിലെത്തും.
