ലൂസിഫര്‍ മലയാള സിനിമ കണ്ട വന്‍ വിജയത്തിലേക്ക് കുതിക്കുകയാണ്. മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്ത ചിത്രം. അതിന്റെ പ്രഖ്യാപന വേള മുതല്‍ തന്നെ ആരാധകരെ ആവേശക്കൊടുമുടിയിലെത്തിച്ചിരുന്നു.
മോഹന്‍ലാല്‍ എന്ന താരത്തെ അദ്ദേഹത്തിന്റെ ആരാധകര്‍ എങ്ങനെയാണോ കാണാന്‍ ആഗ്രഹിച്ചത് അതു തന്നെയായിരുന്നു പൃഥ്വിരാജ് നല്‍കിയത്.
ഇപ്പോഴിതാ, ലാലുമൊത്ത് ആദ്യദിവസം ലൂസിഫര്‍ കാണാന്‍ പോയ രസകരമായ അനുഭവം തുറന്നു പറയുകയാണ് ചിത്രത്തിന്റെ സംവിധായകന്‍ പൃഥ്വിരാജ്.
പൃഥ്വിയുടെ വാക്കുകള്‍ ഇങ്ങനെ
ഞാന്‍ ആദ്യമായി സംവിധാനം ചെയ്യുന്ന സിനിമയാണ്. ഇനി സംവിധാനം ചെയ്യുമോന്നും അറിയില്ല. എന്തായാലും ഈ സിനിമ ഫസ്റ്റ് ഡേ ഫസ്റ്റ് ഷോ കാണാം എന്ന് വിചാരിച്ച് എറണാകുളത്തെ കവിതാ തിയേറ്ററിലേക്ക് പോവുകയാണ്.
അപ്പോള്‍ എന്നോട് ആന്റണി ചേട്ടന്‍ പറഞ്ഞു, ട്രാവന്‍കൂര്‍ ഹോട്ടലില്‍ വന്നിട്ട് നമുക്ക് ഒരുമിച്ചു പോകാം. അങ്ങനെ ഞാന്‍ ട്രാവന്‍കൂറിലേക്ക് പോയി. ഞാന്‍ നോക്കിയപ്പോള്‍ ലാലേട്ടന്‍ വന്നു വണ്ടിയിലിരിക്കുന്നു. ഞാന്‍ ചോദിച്ചു, ചേട്ടനിതെങ്ങോട്ടാ? അപ്പോ പറഞ്ഞു മോനെ ഞാനും വരുന്നുണ്ട്.
ഞാന്‍ ചോദിച്ചു, കവിതാ തിയേറ്ററിലോ? ചേട്ടന്‍ കവിതാ തിയേറ്ററിലേക്ക് വരുന്നോ? എന്റെ പൊന്നേട്ടാ അത് നടക്കൂല. ഒരു കുഴപ്പവുമില്ല മോനെ. ചേട്ടന്‍ വരുന്നുണ്ട്. മോന് ചേട്ടന്‍ തരുന്ന ഗിഫ്റ്റാണത് എന്ന് ലാലേട്ടന്‍ പറഞ്ഞു. എനിക്കാണെങ്കില്‍ സിനിമ കാണാനും വയ്യ, ലാലേട്ടന്‍ അടുത്തിരിക്കുന്നു.
ചില്ലറപെട്ട കാര്യമൊന്നുമല്ല. മോഹന്‍ലാല്‍ ആണേ പത്തയ്യായിരം ആള്‍ക്കാരുടെ ഇടയിലേക്ക് കൊണ്ടിറങ്ങുമ്പോാള്‍ അതെനിക്കൊരു ലൈഫ് ടൈം എക്സ്പീരിയന്‍സ് ആയിരുന്നു.
സിനിമ ഡയറക്ട് ചെയ്തു എന്നതിന്റെ അത്രയും വലിയ എക്സ്പീരിയന്‍സ് തന്നെയായിരുന്നു നോര്‍മല്‍ ഓഡിയന്‍സിന്റെ ഇടയിലിരുന്ന് ലാലേട്ടന്റെ തൊട്ടടുത്തിരുന്ന് കാണുക എന്നുള്ളത്’.
