പോക്കിരിരാജയ്ക്ക് ശേഷം വൈശാഖ് സംവിധാനം ചെയ്ത മധുരരാജ ഏപ്രില്‍ റിലീസിനൊരുങ്ങുകയാണ്. ഏപ്രില്‍ 5ന് ചിത്രത്തിന്റെ ട്രെയിലര്‍ റിലീസ് ചെയ്യും.
കഴിഞ്ഞ ആഴ്ചയാണ് ടീസര്‍ റിലീസ് ആയത്. ആദ്യഭാഗം പോക്കിരിരാജയില്‍ മമ്മൂട്ടിക്കൊപ്പം അഭിനയിച്ചത് പൃഥ്വിരാജ് ആയിരുന്നു. എന്നാല്‍, രണ്ടാം ഭാഗത്തില്‍ ജയ് ആണുള്ളത്.
അടുത്തിടെ ഒരു മാധ്യമത്തിന് നല്‍കിയ അഭിമുഖത്തില്‍ മധുരരാജയില്‍ താനില്ലെന്നും തന്നെ വിളിച്ചില്ലെന്നും താരം വ്യക്തമാക്കിയിരുന്നു.
എന്നാല്‍, ലൂസിഫറിലും താന്‍ അഭിനയിക്കില്ലെന്ന് പറഞ്ഞ പൃഥ്വി ചിത്രത്തിലും ഉണ്ടായിരുന്നു. അതുപോലെ സര്‍പ്രൈസ് എന്‍ട്രിയുമായി പൃഥ്വി എത്തിയേക്കുമോയെന്നാണ് എല്ലാവര്‍ക്കും അറിയേണ്ടത്.
മധുരരാജയില്‍ പൃഥ്വി ഇല്ലെന്ന് പറഞ്ഞാല്‍ ആരും വിശ്വസിക്കില്ലെന്ന അവസ്ഥയാണിപ്പോഴുള്ളത്. ലൂസിഫര്‍ ഒരു കൊച്ചുചിത്രമെന്നായിരുന്നു അദ്ദേഹം തുടക്കത്തില്‍ പറഞ്ഞത്.
അതോടൊപ്പം, സ്വന്തം സിനിമയില്‍ അഭിനയിക്കില്ലെന്ന് പറഞ്ഞയാളാണ് പൃഥ്വി. റിലീസിനോടനുബന്ധിച്ചാണ് ആ രഹസ്യവും പൃഥ്വി പരസ്യമാക്കിയത്.
അത് പോലെ തന്നെയായിരിക്കും ഈ പറച്ചിലെന്നും അദ്ദേഹവും മധുരരാജയിലുണ്ടാവുമെന്നുമാണ് ഒരുവിഭാഗം പറയുന്നത്. ഇതേക്കുറിച്ചറിയാന്‍ റിലീസ് വരെ കാത്തിരിക്കണം.
മധുരരാജയുടെ പോസ്റ്ററുകളും ലൊക്കേഷന്‍ ചിത്രവുമൊക്കെ സോഷ്യല്‍ മീഡിയയിലൂടെ വൈറലായിരുന്നു. ഏപ്രില്‍ 12നാണ് സിനിമയെത്തുന്നതെന്ന തരത്തിലുള്ള റിപ്പോര്‍ട്ടുകളാണ് ഇപ്പോള്‍ പുറത്തുവന്നിട്ടുള്ളത്.
