ആൻഡ്രോയ്ഡ് കുഞ്ഞപ്പൻ എന്ന സിനിമയുടെ സംവിധായകനും നിർമാതാവും ഒന്നിക്കുന്ന ‘ന്നാ താൻ കേസ്‌കൊട്’ എന്ന ചിത്രത്തിലേക്ക് അഭിനേതാക്കളെ തേടുന്നു. ചിത്രത്തിൽ നായകനാകുന്ന കുഞ്ചാക്കോ ബോബൻ പങ്കുവെച്ച കാസ്റ്റിംഗ് കോൾ വൈറലാവുന്നു.
രതീഷ് ബാലകൃഷ്ണൻ പൊതുവാളിന്റെ സംവിധാനത്തിൽ സന്തോഷ് ടി. കുരുവിള നിർമ്മിക്കുന്ന ചിത്രത്തിൽ കേന്ദ്ര കഥാപാത്രമായെത്തുന്നത് കുഞ്ചാക്കോ ബോബനാണ്. സാധാരണ കാസ്റ്റിംഗ് കോളുകളിൽ നിന്നും തികച്ചും വ്യത്യസ്തമായ നിർദ്ദേശങ്ങളും ആവശ്യങ്ങളുമാണ് ‘ന്നാ താൻ കേസ്‌കൊട്’ സിനിമയുടെ കാസ്റ്റിങ് കോൾ പോസ്റ്ററിലുള്ളത്.
ALSO READ
ഒക്ടോബറിൽ ചിത്രീകരണം തുടങ്ങാൻ ആവശ്യമുള്ള സാധനങ്ങൾ എന്ന തലക്കെട്ടോട് കൂടിയാണ് തങ്ങൾക്ക് വേണ്ട അഭിനേതാക്കളെ കുറിച്ച് അണിയറ പ്രവർത്തകർ പറയുന്നത്. രണ്ട് കള്ളന്മാർ, എട്ട് പൊലീസുകാർ, 16 വക്കീലുമാർ, ഒരു മജിസ്‌ട്രേറ്റ്, 3 ബെഞ്ച് ക്ലർക്ക്, 5 ഓട്ടോ ഡ്രൈവർമാർ, ഒരു അംഗൻവാടി ടീച്ചർ, 1 റിട്ടയേഡ് പി.ഡബ്ല്യു.ഡി ടീച്ചർ, നാല് ഷട്ടിൽ കളിക്കാർ, ഒരു ബൈക്കർ എന്നിവരെയാണ് ആദ്യ ഭാഗത്ത് ആവശ്യപ്പെട്ടിരിക്കുന്നത്.
View this post on Instagram
പ്രായമോ മറ്റു ഘടകങ്ങളോ ഒന്നും ഈ ഭാഗത്ത് വ്യക്തമാക്കിയിട്ടില്ല. രണ്ടാമത്തെ സെറ്റ് അഭിനേതാക്കളെയും ഇതുപോലെ ചിരി പടർത്തും വിധത്തിൽ തന്നെയാണ് ആവശ്യപ്പെട്ടിരിക്കുന്നത്. ഏതെങ്കിലും കേസിൽ കോടതി കയറിവർ, യൗവനം വിട്ടുകളയാത്ത വൃദ്ധദമ്പതികൾ, മുഖ്യമന്ത്രി, മന്ത്രിയും ഭാര്യയും മന്ത്രിയുടെ പി.എയെയും വിദേശത്ത് പഠിച്ച നാട്ടിൻപുറത്തുകാരൻ. തൊഴിൽരഹിതർ, നിരപരാധികൾ എന്നിവരെയാണ് അടുത്തതായി ചിത്രത്തിലേക്ക് ക്ഷണിച്ചിരിക്കുന്നത്.
കാസർഗോഡ്, കണ്ണൂർ, കോഴിക്കോട് ജില്ലകളിൽ ജീവിക്കുന്നവരെയാണ് ചിത്രത്തിലേക്ക് വിളിച്ചിരിക്കുന്നത്. തങ്ങൾ നിർദേശിച്ചിരിക്കുന്ന വിഭാഗത്തിൽ ഉൾപ്പെടുന്നുവെന്ന് സ്വയം തോന്നുന്നുന്നവർക്കും നാട്ടുകാർ ആരോപിക്കുന്നവർക്കും പങ്കെടുക്കാമെന്നും പോസ്റ്ററിലുണ്ട്. താൽപര്യമുള്ളവർ ഒരു മിനിറ്റിൽ കവിയാത്ത വീഡിയോയും കളർ ഫോട്ടോയും [email protected] എന്ന മെയിലിലേക്ക് അയച്ചുതരണമെന്നാണ് അറിയിച്ചിരിക്കുന്നത്.
ALSO READ
ഒടുവിൽ കാത്തിരിപ്പിന് വിരാമമായി! ; ആരാധകരോട് ആ സന്തോഷവാർത്ത് പങ്കു വച്ച് മണിക്കുട്ടൻ
ടാ തടിയാ, മഹേഷിന്റെ പ്രതികാരം, മായാനദി, ഈ മാ യൗ, വൈറസ്, ആൻഡ്രോയിഡ് കുഞ്ഞപ്പൻ, ആർക്കറിയാം, മരക്കാർ അറബിക്കടലിന്റെ സിംഹം എന്നീ ചിത്രങ്ങൾക്ക് ശേഷം സന്തോഷ് ടി കുരുവിളി നിർമ്മിക്കുന്ന ഈ ചിത്രത്തിൽ കുഞ്ചാക്കോ ബോബനൊപ്പം വിനയ് ഫോർട്ട്, ഗായത്രി ശങ്കർ, സൈജു കുറുപ്പ്, ജാഫർ ഇടുക്കി എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.
‘ആൻഡ്രോയ്ഡ് കുഞ്ഞപ്പനു’ ശേഷം നിവിൻ പോളിയെ നായകനാക്കി ‘കനകം കാമിനി കലഹം’ എന്ന ചിത്രം രതീഷ് സംവിധാനം ചെയ്തിരുന്നു. മാർച്ചിലാണ് ‘ന്നാ താൻ കേസ്‌കൊട്’ എന്ന പേര് ചിത്രത്തിന് പ്രഖ്യാപിച്ചിത്. ഇപ്പോൾ കാസ്റ്റിംഗ് കോളിന് വരുന്ന പ്രതികരണങ്ങൾ പോലെ ‘ന്നാ താൻ കേസ്‌കൊട്’ എന്ന പേരും ഏറെ ശ്രദ്ധയാകർഷിച്ചിരുക്കുകയാണ്.
