താരരാജാവ് മോഹന്‍ലാല്‍ നായകനായി അഭിനയിക്കാനിരുന്ന മലയാള സിനിമയുടെ അഭിമാനമായി മാറേണ്ടിയിരുന്ന രണ്ടാമൂഴം എന്ന സിനിമ അനിശ്ചിതത്വത്തില്‍. സംവിധായകന്‍ ശ്രീകുമാര്‍ മേനോനില്‍ ഉണ്ടായിരുന്ന വിശ്വാസം നഷ്ടപ്പെട്ടുവെന്നും അതിനാല്‍ ഇനി അയാളുമായി സഹകരിക്കില്ലെന്നുമാണ് തിരക്കഥയെഴുതിയ എം ടി വാസുദേവന്‍ നായരുടെ തീരുമാനം.
എംടിയെ അനുനയിപ്പിക്കാന്‍ ശ്രീകുമാര്‍ മേനോന്‍ ശ്രമങ്ങള്‍ തുടരുന്നതിനിടെയാണ് തിരക്കഥ തിരിച്ചു കിട്ടിയേ പറ്റു എന്ന് എംടി ആവര്‍ത്തിച്ച്‌ പറഞ്ഞിരിക്കുന്നത്.
ശ്രീകുമാര്‍ മേനോനുമായി ഇനി ഒരു തരത്തിലും സഹകരിക്കില്ലെന്നാണ് എംടിയുടെ നിലപാടെന്ന് അദ്ദേഹത്തിന്റെ അഭിഭാഷകന്‍ ശിവ രാമകൃഷ്ണന്‍ പറഞ്ഞതായി മനോരമ ഓണ്‍ലൈന്‍ റിപ്പോര്‍ട്ട് ചെയ്യുന്നു.
കരാറുപ്രകാരമുള്ള സമയം കഴിഞ്ഞപ്പോള്‍ വക്കീല്‍ നോട്ടീസ് അയച്ചുവെങ്കിലും ശ്രീകുമാര്‍ മേനോന്‍ മറുപടി നല്‍കാന്‍ തയാറാകാത്തതിനെ തുടര്‍ന്നാണ് കേസിനു പോയത്.
രണ്ടാമൂഴം സിനിമയാക്കുകയെന്നതാണ് എംടിയുടെ ജീവിതാഭിലാഷമാണ്. അതിനുള്ള ശ്രമങ്ങള്‍ തുടരുമെന്നും ശിവ രാമകൃഷ്ണന്‍ വ്യക്തമാക്കി.
