മലയാളികളുടെ പ്രിയതാരമാണ് മോഹൻലാൽ. നാനാതുറകളിലുമുള്ളവർ ആരാധിക്കുന്ന താരം വ്യത്യസ്തമായ കഥാപാത്രങ്ങൾ കൊണ്ട് വിസ്മയിപ്പിക്കുന്നതും തുടരുകയാണ്. തമിഴിന്റെ അഭിമാന താരമാണ് സൂപ്പർസ്റ്റാർ രജനികാന്ത്. ഇന്ത്യൻ സിനിമയുടെ തന്നെ അഭിമാന താരങ്ങളായ ഇരുവരും ജയിലർ സിനിമയിൽ ഒന്നിക്കുകയാണ് ഇപ്പോൾ. രജനികാന്തിന്റെ ഏറ്റവും പുതിയ ചിത്രമാണ് ജയിലർ.
ജയിലറിന്റെ ട്രെയിലർ കഴിഞ്ഞദിവസമാണ് പുറത്തുവിട്ടത്. രജനികാന്ത് നിറഞ്ഞാടിയ ട്രെയിലറിൽ മോഹൻലാലിനെ ഉൾപ്പെടുത്താത്തതാണ് വലിയ ചർച്ചയായിരുന്നു.. മലയാളികൾ ഉൾപ്പടെയുള്ള ആരാധകരെ നിരാശരാക്കിയാണ് ട്രെയിലറിൽ നിന്നും മോഹൻലാലിനെ ഒഴിവാക്കിയത്.
മോഹൻലാലും രജനിയും ഒന്നിക്കുന്നു എന്ന് വിളംബരം ചെയ്തിട്ടും ചിത്രത്തിന്റെ ഓഡിയോ ലോഞ്ചിലും മോഹൻലാൽ എത്താതിരുന്നത് ആരാധകർ ചോദ്യം ചെയ്തിരുന്നു. മോഹൻലാൽ എവിടെ എന്ന ചോദ്യവുമായി ആരാധകരും സോഷ്യൽമീഡിയയിൽ എത്തിയിരുന്നു.
പിന്നാലെ ഇപ്പോൾ ഇതാ ആരാധകർക്ക് മറുപടിയുമായി എത്തിയിരിക്കുകയാണ് സിനിമയുടെ നിർമാതാക്കളായ സൺപിക്‌ചേഴ്‌സ്. രജനിക്കൊപ്പമുള്ള മോഹൻലാലിന്റെ ഏറ്റവും പുതിയ പോസ്റ്റർ സൺപിക്‌ചേഴ്‌സ് എക്‌സ് അക്കൗണ്ടിലൂടെ പങ്കുവച്ചു. സൂപ്പർസ്റ്റാർ ലാലേട്ടൻ എന്നാണ് ചിത്രത്തിനു നൽകിയിരിക്കുന്ന ക്യാപ്ഷൻ.
അതേസമയം, ചിത്രത്തിൽ മാത്യു എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്. ചിത്രം റിലീസാകുമ്പോൾ ‘ജയിലറി’ൽ മോഹൻലാലിന്റെയും മാസ് രംഗങ്ങൾ ഉണ്ടാകുമെന്നാണ് ആരാധകർ പ്രതീക്ഷിക്കുന്നത്.
Superstar – Lalettan 😍
Yarellam indha combo paaka waiting? 5 days to go for #Jailer storm in theatres! #JailerFromAug10 @rajinikanth @Mohanlal @Nelsondilpkumar @anirudhofficial @NimmaShivanna @bindasbhidu @tamannaahspeaks @meramyakrishnan @suneeltollywood @iYogiBabu… pic.twitter.com/nuDxhjv8qP
— Sun Pictures (@sunpictures) August 5, 2023
ജയിലർ ചിത്രത്തിന്റെ സംവിധായകൻ നെൽസണാണ്. സൺ പിക്‌ചേഴ്‌സിന്റെ ബാനറിൽ കലാനിധി മാരൻ നിർമിക്കുന്ന ജയിലർ ഓഗസ്റ്റ് 10നാണ് തിയറ്ററുകളിൽ എത്തുന്നത്. രജനികാന്തിനോടുള്ള സ്‌നേഹത്താൽ കഥ പോലും കേൾക്കാതെയാണ് മോഹൻലാൽ ജയിലറിൽ അഭിനയിക്കാനെത്തിയത് എന്നാണ് നെൽസൺ പറയുന്നത്. തന്നെ നേരിട്ട് വിളിച്ചാണ് താൻ ചിത്രത്തിൽ അഭിനയിക്കുന്ന കാര്യം മോഹൻലാൽ സാർ പറഞ്ഞതെന്നും നെൽസൺ വെളിപ്പെടുത്തിയിരുന്നു.
അതേസമയം രജനിയുടെ കരിയറിലെ 169-ാം ചിത്രമാണ് ജയിലർ. തമന്നയാണ് ചിത്രത്തിൽ നായികയായി എത്തുന്നത്. ശിവരാജ് കുമാർ, ജാക്കി ഷ്രോഫ്,രമ്യ കൃഷ്ണൻ, ജാക്കി ഷ്രോഫ്, സുനിൽ, വസന്ത് രവി, കിഷോർ, ജി മാരിമുത്തു, നമോ നാരായണ, റിത്വിക്, ആനന്ത്, ശരവണൻ, ഉദയ് മഹേഷ്, നാഗ ബാബു മിർണ രവി തുടങ്ങിയവരും ‘ജയിലറി’ൽ വേഷമിട്ടിരിക്കുന്നു.
