മലയാളത്തിലെ താരരാജാക്കന്‍മാരായ മമ്മൂട്ടിയും മോഹന്‍ലാലുംഒരുകാലത്ത് നിരവധി സിനിമകളില്‍ ഒന്നിച്ചഭിനയിച്ച താരങ്ങളാണ്.
എന്നാല്‍, കുറച്ച് വര്‍ഷങ്ങളായി അത് നടക്കാറില്ലെങ്കിലും ഇരുവരുടെയും സിനിമകള്‍ ഒരേ സമയം റിലീസ് ചെയ്ത് ബോക്‌സോഫീസില്‍ ഏറ്റുമുട്ടാറുണ്ട്.
അത്തരത്തിലൊരു മത്സരത്തിനു കളമൊരുങ്ങുകയാണ് വീണ്ടും. ഇത്തവണ മത്സരം അങ്ങ് തമിഴ്നാട്ടിലാണ്.
മോഹന്‍ലാല്‍ സൂര്യ എന്നിവരെ കേന്ദ്ര കഥാപാത്രങ്ങളാക്കി കെവി ആനന്ദ് സംവിധാനം ചെയ്യുന്ന തമിഴ് ചിത്രമാണ് കാപ്പാന്‍. രാഷ്ട്രീയക്കാരന്റെ വേഷമാണ് മോഹന്‍ലാല്‍ ചെയ്യുന്നത്.
ഒരു മാസ് മൂവിയാണ് ഇതെന്നാണ് റിപ്പോര്‍ട്ട്. സൂര്യയും മോഹന്‍ലാലും ഒരുമിച്ചെത്തുമ്പോള്‍ മമ്മൂട്ടി തനിച്ചാണ് വരുന്നത്.
റാം സംവിധാനം ചെയ്യുന്ന മമ്മൂട്ടി ചിത്രം പേരന്‍പ് ഫെബ്രുവരിയില്‍ റിലീസ് ആവുകയാണ്. അമുദവനെന്ന ടാക്‌സി ഡ്രൈവറായിട്ടാണ് മമ്മൂട്ടി എത്തുന്നത്.
മാസ് അഭിനയവുമായി മോഹന്‍ലാല്‍ എത്തുമ്പോള്‍ ഒരു ക്ലാസ് ഹിറ്റിലേക്കാണ് പേരന്‍പ് ചുവടുകള്‍ വെയ്ക്കുന്നത്.
