ഈ വിഷു മധ്യവേനൽ അവധിക്കാലത്ത് മലയാളത്തിൽ റിലീസിനെത്തുന്ന ഓരോ സിനിമകളും ഹിറ്റായി മാറുന്ന കാഴ്ചയാണ് കണ്ട് വന്നത്. പ്രേക്ഷകർ ഏത് സിനിമ കാണാൻ പോവണമെന്ന സംശത്തിലാണ് .
അവധിക്കാലം ലക്ഷ്യമാക്കി മമ്മൂട്ടിയുടെയും മോഹൻലാലിന്റെയുമെല്ലാം സിനിമകളായിരുന്നു തിയറ്ററുകളിലേക്ക് എത്തിയിരിരുന്നത്.
ബിഗ് ബജറ്റിലൊരുക്കിയിരിക്കുന്നതും ബിഗ് റിലീസ് ലഭിച്ചതുമായ സിനിമകളും അക്കൂട്ടത്തിലുണ്ട്. കുടുംബ പ്രേക്ഷകരുടെ പൂർണ പിന്തുണ ലഭിച്ചതോടെ ബോക്സോഫീസിൽ അതിഗംഭീര പ്രകടനമാണ് ഓരോ ചിത്രങ്ങളും കാഴ്ച വെച്ച് കൊണ്ടിരിക്കുന്നത്.
താരരാജാക്കന്മാരുടെ രണ്ട് ഹിറ്റ് സിനിമകളും യുവതാരങ്ങളുടെ നിരവധി സിനിമകളുമായി വിഷു, ഈസ്റ്റർ കാലഘട്ടം അതിഗംഭീരമായിരിക്കുകയാണ്.
മലയാള സിനിമയുടെ ചരിത്രത്തിലെ ഏറ്റവും വലിയ വിഷു സീസണായി മാറിയിരിക്കുകയാണ് ഇക്കൊല്ലം. മുൻകാലങ്ങളിൽ ലഭിക്കാത്ത അത്രയും വലിയ പിന്തുണയാണ് ഈ വർഷം ലഭിച്ചിരിക്കുന്നത്.
ബോക്സോഫീസിൽ ഇതുവരെ ലഭിക്കാത്ത പല റെക്കോർഡുകളും തിരുത്തി കുറിച്ച് കൊണ്ടാണ് താരങ്ങളുടെ വരവ്.
മോഹൻലാലിന്റെ കരിയറിലെ ഏറ്റവും വമ്പൻ ചിത്രമായി ലൂസിഫർ മാറി. പൃഥ്വിരാജ് സംവിധാനം ചെയ്ത ചിത്രം മാർച്ച് 28 നായിരുന്നു റിലീസ് ചെയ്തത്.
ബിഗ് ബജറ്റിൽ ആന്റണി പെരുമ്പാവൂർ നിർമ്മിച്ച സിനിമ റിലീസ് ചെയ്ത ആദ്യ ദിവസങ്ങളിൽ കേരളത്തിലെ സകല റെക്കോർഡുകളും തിരുത്തി.
കേവലം എട്ട് ദിവസങ്ങൾ കൊണ്ടാണ് നൂറ് കോടി ക്ലബ്ബിലെത്തിയത്. 21 ദിവസം കഴിയുമ്പോൾ നൂറ്റിയമ്പത് കോടിയും ആഗോളതലത്തിൽ നിന്നും ലൂസിഫറിന് ലഭിച്ചു.
റിലീസിനെത്തി ഒരു മാസം കഴിഞ്ഞിട്ടും റെക്കോർഡ് പ്രദർശനമാണ് ലൂസിഫർ കാഴ്ച വെച്ച് കൊണ്ടിരിക്കുന്നത്.
ഇതിനകം ഇരുന്നൂറ് കോടി ക്ലബ്ബിലെത്താൻ സിനിമയ്ക്ക് കഴിഞ്ഞിട്ടുണ്ടാവുമെന്നാണ് സൂചന. ലൂസിഫറിന്റെ പുതിയ കളക്ഷൻ വിവരം ഔദ്യോഗികമായി പുറത്ത് വിടുന്നതിന് വേണ്ടിയുള്ള കാത്തിരിപ്പിലാണ് സിനിമാപ്രേമികൾ.
ലൂസിഫർ തിയറ്ററുകളിൽ കത്തി നിൽക്കുമ്പോഴായിരുന്നു മമ്മൂട്ടിയുടെ മധുരരാജ എത്തിയത്. പോക്കിരിരാജയുടെ രണ്ടാം ഭാഗമായി വൈശാഖ് സംവിധാനം ചെയ്ത മധുരരാജ ഏപ്രിൽ പന്ത്രണ്ടിനായിരുന്നു റിലീസ്.
തുടക്കത്തിൽ ലൂസിഫറിന് ലഭിച്ചത്രയും പിന്തുണ കിട്ടിയിരുന്നില്ലെങ്കിലും പിന്നീടുള്ള ദിവസങ്ങളിൽ അതിശയിപ്പിക്കുന്ന പ്രകടനമായിരുന്നു.
ആദ്യ പത്ത് ദിവസം കഴിയുമ്പോൾ 58 കോടിയോളമായിരുന്നു മധുരരാജയുടെ കളക്ഷൻ. ഇപ്പോഴും മധുരാരജ പലയിടങ്ങളിലും ഗംഭീര സ്‌ക്രീനിംഗ് നടക്കുകയാണ്.
മമ്മൂട്ടിയുടെ കരിയറിലെ പുതിയൊരു റെക്കോർഡ് സൃഷ്ടിക്കാൻ ഈ ചിത്രത്തിന് കഴിയുമെന്നാണ് സൂചനകൾ.
ലൂസിഫർ ആദ്യ എട്ട് ദിവസങ്ങൾ കൊണ്ട് നൂറ് കോടി ക്ലബ്ബിലെത്തി. മധുരാരജയുടെ കാര്യമെടുക്കുമ്പോൾ ആദ്യ പത്ത് ദിവസം കൊണ്ട് അറുപത് കോടിയ്ക്ക് അടുത്ത് വരെ എത്തിയിരുന്നു.
അങ്ങനെ എങ്കിൽ പിന്നിടുള്ള ദിവസങ്ങളിലെ പ്രകടനം കണക്കിലെടുത്ത് മധുരരാജയും നൂറ് കോടി ക്ലബ്ബിൽ എത്തിയിട്ടുണ്ടാവുമെന്നാണ് ട്രേഡ് അനലിസ്റ്റുകൾ വിലയിരുത്തുന്നത്.
ഔദ്യോഗിക റിപ്പോർട്ടുകളൊന്നും വന്നിട്ടില്ലെങ്കലിും മധുരരാജയിലൂടെ ആദ്യ നൂറ് കോടി സ്വന്തമാക്കാൻ മമ്മൂട്ടിയ്ക്ക് കഴിയുമെന്ന സൂചനയാണിപ്പോൾ ഉള്ളത്.
അതേ സമയം ലൂസിഫർ ഇരുന്നൂറ് കോടിയിലേക്കുള്ള യാത്രയിലാണ്.
