തമിഴ് സൂപ്പര്‍ സ്റ്റാര്‍ ധനുഷ് ഗ്യാങ്സ്റ്റര്‍ ആയി വേഷമിട്ട ഹിറ്റ് ചിത്രം മാരിയുടെ രണ്ടാം ഭാഗം മാരി 2 റിലീസിംഗിന് ഒരുങ്ങുന്നു. ചിത്രത്തിലെ ആദ്യ ഗാനം ‘റൗഡി ബേബി’ നാളെ റിലീസ് ചെയ്യും. ചിത്രത്തിന്റെ അണിയറ പ്രവര്‍ത്തകര്‍ തന്നെയാണ് ഇക്കാര്യം പുറത്തു വിട്ടത്.
യുവാന്‍ ശങ്കര്‍ രാജയുടേതാണ് സംഗീതം. സെന്‍സറിംഗ് പൂര്‍ത്തിയായ ചിത്രത്തിന് യുഎ സര്‍ട്ടിഫിക്കറ്റാണ് ലഭിച്ചിരിക്കുന്നത്. ബാലാജി മോഹന്‍ സംവിധാനം ചെയ്യുന്ന ചിത്രത്തിനായി ആകാംക്ഷയോടെ കാത്തിരിക്കുകയാണ് ആരാധകര്‍.
മാരി 2 വിനെ വളരെ പ്രതീക്ഷയോടെയാണ് മലയാളി പ്രേക്ഷകരും കാത്തിരിക്കുന്നത്. 2015 ല്‍ പുറത്തിറങ്ങിയ മാരിയില്‍ ഗായകന്‍ വിജയ് യേശുദാസ് വില്ലനായി എത്തിയപ്പോള്‍ മാരി 2 വില്‍ യുവതാരം ടൊവീനോ തോമസാണ് ധനുഷിന്റെ വില്ലനായെത്തുന്നത്.
ടോവിനോയുടെ ചിത്രത്തിലെ മെയ്‌ക്കോവര്‍ ഏറെ ശ്രദ്ധ നേടിയിരുന്നു.തമിഴില്‍ ടോവിനോ തന്നെയാണ് ചിത്രത്തിന് ഡബ് ചെയ്യുന്നത്.
ചിത്രത്തില്‍ സായി പല്ലവിയാണ് നായിക. ഓട്ടോ ഡ്രൈവറായാണ് സായ് വേഷമിടുന്നത്. റോബോ ശങ്കര്‍, കല്ലൂരി വിനോദ്, വരലക്ഷ്മി ശരത്കുമാര്‍, കൃഷ്ണ, ടോവിനോ തോമസ് എന്നിവരും ചിത്രത്തില്‍ മുഖ്യവേഷങ്ങളില്‍ എത്തുന്നു. ബാലാജി മോഹന്‍ തന്നെയാണ് ചിത്രത്തിന് തിരക്കഥ എഴുതിയിരിക്കുന്നത്. ഡിസംബറില്‍ ചിത്രം തിയേറ്ററുകളിലെത്തും.
