മലയാള സിനിമയെ വര്‍ഷങ്ങളായി ഭരിച്ചുകൊണ്ടിരിക്കുന്ന നടനാണ് മമ്മൂട്ടി. ഇതിനോടകം ഒത്തിരി സിനിമകള്‍ സമ്മാനിച്ച താരം മലയാള സിനിമാപ്രേമികളുടെ എക്കാലത്തെയും പ്രിയപ്പെട്ട നടന്മാരില്‍ ഒരാളാണ്. മമ്മൂക്ക എന്നാണ് സ്‌നേഹത്തോടെ മമ്മൂട്ടിയെ വിളിക്കുന്നത്.
ലക്ഷക്കണക്കിന് ആരാധകരാണ് താരത്തിനുള്ളത്. ആരാധകര്‍ക്ക് വലിയ പ്രാധാന്യം കൊടുക്കുന്ന താരം കൂടിയാണ് മമ്മൂക്ക. തന്റെ സിനിമകള്‍ കാണുകയും ആര്‍ത്തുല്ലസിക്കുകയും ചെയ്യുന്നവരെ തനിക്ക അറിയില്ലെന്നും അവര്‍ക്കുവേണ്ടി താന്‍ ഒരുപകാരവും ചെയ്തിട്ടില്ലെന്നും അങ്ങനെയുള്ളവരുടെ സ്‌നേഹം കിട്ടുകയെന്നത് മഹാഭാഗ്യമാണെന്നും മമ്മൂക്ക പറഞ്ഞിരുന്നു.
പറ്റുമ്പോഴൊക്കെ തന്റെ ആരാധകരെ കാണാനും സംസാരിക്കാനും മമ്മൂക്ക സമയം കണ്ടെത്താറുണ്ട്. ഇപ്പോഴിതാ മമ്മൂക്കയുടെ ഒരു ഫാന്‍ വീഡിയോയാണ് സോഷ്യല്‍മീഡിയയില്‍ ഒന്നടങ്കം പ്രചരിക്കുന്നത്. ഒരു സ്‌പെഷ്യല്‍ ചൈല്‍ഡാണ് വീഡിയോയിലെ മമ്മൂക്കയുടെ കടുത്ത ആരാധിക.
മമ്മൂട്ടിയെ കണ്ടതും തുള്ളിച്ചാടുകയാണ് പെണ്‍കുട്ടി. പിന്നാലെ അദ്ദേഹത്തെ കെട്ടിപ്പിടിക്കുന്നതും വീഡിയോയില്‍ കാണാം. വില്ലന്മാര്‍ക്കെല്ലാം നല്ല ഇടി കൊടുക്കണമെന്നും പെണ്‍കുട്ടി മമ്മൂക്കയോട് പറയുന്നുണ്ട്. തന്റെ ആരാധികയെ ചേര്‍ത്തുനിര്‍ത്തി ഫോട്ടോ എടുത്ത ശേഷമായിരുന്നു മമ്മൂക്ക മടങ്ങിയത്.
മമ്മൂക്കയുടെ പിആര്‍ഒ ആയ റോബര്‍ട്ട് കുര്യാക്കോസാണ് ഈ മനസ്സുനിറയ്ക്കുന്ന വീഡിയോ സോഷ്യല്‍മീഡിയയില്‍ പങ്കുവെച്ചത്. വീഡിയോ ഇതിനോടകം വൈറലായിക്കഴിഞ്ഞു. അതാണ് മ്മടെ മമ്മൂക്ക എന്നാണ് പലരും കമന്റായി കുറിച്ചത്.
