മലയാളത്തിന്റെ മെഗാസ്റ്റാര്‍ മമ്മൂട്ടിയുടെ എക്കാലത്തെയും മികച്ച ചിത്രങ്ങളില്‍ ഒന്നാണ് ജയരാജ് ഒരുക്കിയ ജോണി വാക്കര്‍. മലയാള സിനിമയിലെ ഹിറ്റ് മേക്കര്‍ രഞ്ജിത്ത് ആയിരുന്നു ചിത്രത്തിന് തിരക്കഥയെഴുതിയ ത്. മികച്ച ഗാനങ്ങളും ഗാനരംഗങ്ങളും കൊണ്ട് വളരെ കളര്‍ഫുള്‍ ആയ ഒരു സിനിമയായിരുന്നു ജോണിവാക്കര്‍.
എന്നാല്‍ ജയരാജ് മനസ്സില്‍ കണ്ടതുപോലെ ഒരു സിനിമയായിരുന്നില്ല ജോണി വാക്കര്‍ പൂര്‍ത്തിയായപ്പോള്‍. ഒരു സൂപ്പര്‍ എന്റര്‍ടെയ്‌നറായിരുന്നു ജയരാജ് ലക്ഷ്യമിട്ടത്. പക്ഷേ, അവസാനം ട്രാജഡിയാക്കേണ്ടി വന്നതോടെ ജയരാജിന് ആകെ നിരാശയായി.
മമ്മൂട്ടി കോളജില്‍ പഠിക്കുന്നതായി കഥയുണ്ടാക്കിയാല്‍ ശരിയാകുമോ എന്ന പലരുടെയും സംശയമാണ് കഥയില്‍ മാറ്റം വരുത്താന്‍ കാരണമായത്. എന്നാല്‍ കഥയില്‍ ഒരു മാറ്റവും വരുത്താതെ അടിപൊളി എന്റര്‍ടൈനറായി ഈ ചിത്രം ഹിന്ദിയില്‍ ചെയ്യാന്‍ ജയരാജ് പ്ലാന്‍ ചെയ്തിരുന്നു.
പക്ഷേ ജയരാജോ മമ്മൂട്ടിയോ അറിയാതെ ഈ കഥ ഹിന്ദിയിലേക്ക് റീമേക്ക് ചെയ്യപ്പെട്ടു. ‘മേം ഹൂ നാ’ എന്ന പേരില്‍ ഷാരുഖ് ഖാന്‍ നായകനായ ആ സിനിമ സംവിധാനം ചെയ്തത് ഫറാ ഖാന്‍ ആയിരുന്നു. മേം ഹൂ നാ മെഗാഹിറ്റായി മാറുകയും ചെയ്തു.
മലയാളം ജോണിവാക്കറിലെ ശാന്തമീ രാത്രിയില്‍ വാദ്യഘോഷാദികള്‍ കൊണ്ടുവാ എന്ന ഗാനം അക്കാലത്ത് എല്ലാ ഹിറ്റ് ചാര്‍ട്ടുകളിലും സ്ഥാനം പിടിച്ച സൂപ്പര്‍ ഗാനമായിരുന്നു.
