ഉണ്ടയുടെ ടീസർ ഇന്നെത്തും: പുറത്തുവിടുന്നത് മമ്മൂട്ടിയും മോഹൻലാലും ചേർന്ന്

സിനിമാ ആരാധകർ ഏറെ ആകാംക്ഷയോടെ കാത്തിരിക്കുന്ന മമ്മൂട്ടി ചിത്രം ഉണ്ടയുടെ ടീസർ ഇന്നെത്തും. വൈകിട്ട് ഏഴു മണിയ്ക്കാണ് ടീസർ റിലീസ് ചെയ്യുക.

നടൻ മോഹൻലാലും മമ്മൂട്ടിയുമാണ് ടീസർ റിലീസ് ചെയ്യുക. ഇരുവരുടെയും ഒഫീഷ്യൽ ഫെയ്സ്ബുക്ക് പേജിലൂടെ ടീസർ റിലീസ് ചെയ്യപ്പെടും.

നിരവധി പൊലീസ് വേഷങ്ങളിലൂടെ പ്രേക്ഷകരെ അത്ഭുതപ്പെടുത്തിയിട്ടുള്ള മമ്മൂട്ടിയുടെ വ്യത്യസ്തമായൊരും പൊലീസ് ഭാവമാണ് ‘ഉണ്ട’യിലൂടെ ആരാധകർ പ്രതീക്ഷിക്കുന്നത്.

സബ് ഇൻസ്പെക്ടർ മണികണ്ഠൻ സിപി എന്ന കഥാപാത്രത്തെയാണ് മമ്മൂട്ടി ചിത്രത്തിൽ അവതരിപ്പിക്കുക. അനുരാഗ കരിക്കിൻവെള്ളത്തിനു ശേഷം ഖാലിദ് റഹമാൻ സംവിധാനം ചെയ്യുന്ന ചിത്രം ഛത്തീസ്ഗഢിലേക്ക് തിരഞ്ഞെടുപ്പ് ജോലിക്ക് പോകുന്ന മലയാളി പൊലീസ് സംഘത്തിന്റെ കഥയാണ് പറയുന്നത്.

ഹർഷാദാണ് ചിത്രത്തിന് തിരക്കഥ ഒരുക്കിയിരിക്കുന്നത്. ആക്ഷനും ഹാസ്യത്തിനും തുല്യ പ്രാധാന്യമുള്ള ചിത്രമാവും ഉണ്ട.

ജിഗർദണ്ടയിൽ ക്യാമറ ചലിപ്പിച്ച ഗ്വെമിക് യൂ.ആരിയാണ് ഛായാഗ്രഹണം. പ്രശാന്ത് പിള്ളയാണ് ചിത്രത്തിന് സംഗീതമൊരുക്കുന്നത്.

ബോളിവുഡിൽ നിന്നും ഷാം കൗശലാണ് സംഘട്ടന രംഗങ്ങൾ ചിട്ടപ്പെടുത്തുക. ജെമിനി സ്റ്റുഡിയോക്കൊപ്പം മൂവി മില്ലിലെ കൃഷ്ണൻ സേതുകുമാറാണ് ചിത്രം നിർമ്മിക്കുന്നത്.

ഷൈൻ ടോം ചാക്കോ, ജേക്കബ് ഗ്രിഗറി, സുധി കോപ്പ, ദിലീഷ് പോത്തൻ, അലൻസിയർ, അർജുൻ അശോകൻ, ലുക്മാൻ തുടങ്ങിയവർ ചിത്രത്തിലുണ്ട്. ചിത്രം ഈദ് റിലീസായി തിയേറ്ററുകളിലെത്തും.