പ്രേക്ഷകരെ ആകര്‍ഷിച്ചു കൊണ്ട് റെക്കോഡ് കളക്ഷന്‍ നേടി മുന്നേറുകയാണ് മെഗാ സ്റ്റാര്‍ മമ്മൂട്ടി നായകനായ മധുരരാജ എന്ന ചിത്രം.
സകല റെക്കോര്‍ഡുകളും അട്ടിമറിച്ചാണ് വൈശാഖ് ചിത്രം മുന്നേറുന്നത്. ആദ്യ ദിനം 9.12 കോടി വേള്‍ഡ് വൈഡ് കളക്ഷന്‍ കരസ്ഥമാക്കിയ മധുരരാജ നാല് ദിവസങ്ങള്‍ കൊണ്ട് വേള്‍ഡ് വൈഡ് നേടിയത് 32.4 കോടി.
ഓരോ ദിവസവും തിയറ്ററുകളില്‍ കുടുംബ പ്രേക്ഷകര്‍ കൂടി വരുകയാണെന്നാണ് ലഭിക്കുന്ന റിപ്പോര്‍ട്ട്. വിഷുദിനത്തില്‍ ചിത്രത്തിന് മിക്ക തിയറ്ററുകളിലും തേര്‍ഡ് ഷോ കളിച്ചുവെന്നാണ് റിപ്പോര്‍ട്ട്.
നാലു ദിവസം കൊണ്ട് ചിത്രം മുടക്കുമുതലിന് മേല്‍ തിരിച്ചുപിടിച്ചുവെന്നാണ് മധുരരാജയുടെ അണിയറ പ്രവര്‍ത്തകര്‍ തന്നെ പുറത്തുവിട്ടിരിക്കുന്ന റിപ്പോര്‍ട്ട്.
ഇപ്പോള്‍ ഇതാ സാമൂഹ്യ മാധ്യമങ്ങളില്‍ നിറയുന്നത് അന്ന രാജന്റെ കിടിലം ലൊക്കേഷന്‍ വീഡിയോയാണ്.
ഭയന്ന് ഓടുമ്പോള്‍ തലയ്ക്കു മുകളിലൂടെ കുരച്ചു ചാടുന്ന വേട്ടനായയേയും വീഴുന്ന അന്നയേയും ആണ് വീഡിയോയില്‍ കാണാനാവുക.
സിനിമയുടെ ക്ലൈമാക്‌സിനോട് അടുത്തു വരുന്ന ഹൃദയഭേദകമായ സീനുകളിലൊന്നിന്റെ ചിത്രീകരണദൃശ്യമാണിത്. അന്ന രാജന്റെ ലിസി എന്ന കഥാപാത്രം അതീവ ദയനീയമായി വേട്ട നായ്ക്കളാല്‍ കൊലച്ചെയ്യപ്പെടുകയാണ് ചിത്രത്തില്‍.
പീറ്റര്‍ ഹെയ്ന്‍ ആണ് മധുരരാജയുടെ ആക്ഷന്‍ ഡയറക്ടര്‍. ചിത്രത്തിലെ സംഘട്ടനരംഗങ്ങള്‍ക്ക് മികച്ച പ്രതികരണമാണ് ലഭിച്ചുകൊണ്ടിരിക്കുന്നത്.
നായ്ക്കളെ ഉള്‍പ്പെടുത്തികൊണ്ടുള്ള ഉദ്വേഗജനകമായ രംഗങ്ങളുടെ ചിത്രീകരണവീഡിയോ പീറ്റര്‍ ഹെയ്‌നും കഴിഞ്ഞ ദിവസം സമൂഹമാധ്യമങ്ങളിലൂടെ പങ്കുവെച്ചിരുന്നു.
സ്റ്റണ്ട് മാസ്റ്ററുടെ തലക്കു മീതെ ചാടുകയും കയ്യില്‍ കടിച്ചുതൂങ്ങിനില്‍ക്കുന്ന നായ്കളുമൊക്കെയാണ് വിഡിയോയില്‍ നിറയുന്നത്.
