പൊലീസ് ഉദ്യോഗസ്ഥയുടെ വേഷത്തിലെത്തുന്ന കന്നട ചിത്രം ഝാന്‍സിയുടെ ചിത്രീകരണ തിരക്കുകളിലാണ് നടി റായ് ലക്ഷ്മി. എന്നാല്‍ ഇതിനിടെ വന്ന ചില തെറ്റായ വാര്‍ത്തകളോട് രൂക്ഷമായി പ്രതികരിച്ചിരിക്കുകയാണ് താരമിപ്പോള്‍.
റായ് ലക്ഷ്മി ഗര്‍ഭിണിയാണെന്ന തരത്തിലുള്ള പ്രചാരണങ്ങളാണ് സമൂഹമാധ്യമങ്ങളിലടക്കം ഉയര്‍ന്നത്. ഇതിനെതിരെ ശക്തമായി രംഗത്തെത്തിയിരിക്കുകയാണ് ലക്ഷമി. വാര്‍ത്തകളെല്ലാം അടിസ്ഥാനരഹിതമാണെന്ന് നടി പറഞ്ഞു.
‘ഞാന്‍ ഗര്‍ഭിണിയാണെന്ന തരത്തിലുള്ള പ്രചാരണങ്ങളാണ് ഇപ്പോള്‍ സോഷ്യല്‍ മീഡിയയിലൂടെ നടക്കുന്നത്. ഞാന്‍ മാങ്ങ കഴിക്കുന്നത് കണ്ടപ്പോളാണ് ഇത്തരത്തിലൊരു പ്രചാരണം വന്നത്. മാങ്ങ കഴിക്കുന്നവരെല്ലാം ഗര്‍ഭിണികളാണോ?
ഇത്തരത്തിലുള്ള അപവാദ പ്രചാരണം ഇനിയും അവസാനിപ്പിച്ചില്ലെങ്കില്‍ നിയമപരമായി നീങ്ങാനുള്ള തയ്യാറെടുപ്പിലാണ് ഞാന്‍’, താരം പറഞ്ഞു. ഇനിയും നിര്‍ത്തിയില്ലെങ്കില്‍ കോടതി കയറേണ്ടിവരും എന്ന മുന്നറിയിപ്പും ലക്ഷ്മി നല്‍കി.
തനിക്ക് ഒന്നിലധികം പ്രണയവും പ്രണയത്തകര്‍ച്ചകളും ഉണ്ടായിരുന്നുവെങ്കിലും അതിനര്‍ഥം തന്നെക്കുറിച്ച്‌ എന്തും സംസാരിക്കാം എന്നല്ലെന്നും താരം കൂട്ടിച്ചേര്‍ത്തു. ചില ആളുകള്‍ തന്നെക്കുറിച്ച്‌ അടിസ്ഥാന രഹിതമായ കാര്യങ്ങള്‍ പറഞ്ഞു പരത്തുകയാണെന്നും അതു കേട്ട് തന്നെ വിലയിരുത്തരുതെന്നും ലക്ഷ്മി പറഞ്ഞു.
