മലയാളത്തിന്റെ കുഞ്ഞിക്ക ദുല്‍ഖര്‍ സല്‍മാനെ പറ്റിച്ചു കടന്നു കളഞ്ഞ പെണ്ണെന്ന പേരു ദോഷമുള്ള നടിയാണ് കാര്‍ത്തിക മുരളീധരന്‍. ത്രീ ഇഡിയറ്റസ്, പി.കെ തുടങ്ങീ ബോളിവുഡ് ചിത്രങ്ങളുടെ ഛായാഗ്രാഹകന്‍ സികെ മുരളീധരന്റെ മകളായ കാര്‍ത്തിക മുരളീധരന്‍ ജീവിതത്തിലല്ല സിനിമയിലാണ് ദുല്‍ഖറെ തേച്ചിട്ടു പോയത്. ദുല്‍ഖര്‍ സല്‍മാന്റെ കോമ്രേഡ് ഇന്‍ അമേരിക്ക (സിഐഎ) എന്ന ചിത്രത്തില്‍ ദുല്‍ഖറിന്റെ നായികയായെത്തിയ കാര്‍ത്തിക ദുല്‍ഖറെ പറ്റിച്ചു കടന്നു കളയുന്നു.
ഡിക്യുവിനെ തേച്ചിട്ട് പോയത് ശരിയായില്ലെന്നും എന്തിനാണ് തങ്ങളുടെ കുഞ്ഞിക്കയെ ചതിച്ചതെന്നുമാണ് കാര്‍ത്തികയോട് ആരാധകര്‍ക്ക് ചോദിക്കാനുള്ളത്. കാര്‍ത്തിക മുരളീധരന്റെ ഏറ്റവും പുതിയ ചിത്രമായ അങ്കിളില്‍ മമ്മൂട്ടിയ്ക്കൊപ്പം പ്രധാന വേഷത്തിലെത്തിയിരുന്നു. സി.ഐയില്‍ മകനൊപ്പമായിരുന്നെങ്കില്‍ ഇപ്പോല്‍ അച്ഛനൊപ്പമാണ് കാര്‍ത്തിക എത്തിയിരിക്കുന്നത്.
സിഐഎയില്‍ നിന്നും അങ്കിളില്‍ വളരെ വ്യത്യസ്തമായ വേഷമാണ് കാര്‍ത്തികയുടേത്. ചിത്രത്തിന്റെ പ്രമോഷനുമായി ബന്ധപ്പെട്ട് കാര്‍ത്തിക ഫെയ്സ്ബുക്ക് ലൈവില്‍ എത്തിയിരുന്നു. ഫെയ്സ്ബുക്ക് ലൈവിലെത്തിയ കാര്‍ത്തികയോടുള്ള കുഞ്ഞിക്കാ ഫാന്‍സിന്റെ ചോദ്യമായിരുന്നു മുകളില്‍ സൂചിപ്പിച്ചിട്ടുള്ളത്.
എന്തിനാണ് ഞങ്ങളുടെ കുഞ്ഞിക്കയെ ചതിച്ചതെന്ന ആരാധകരുടെ ചോദ്യത്തിന് സോറി താന്‍ മന:പൂര്‍വ്വം ചെയ്തതല്ലെന്നായിരുന്നു കാര്‍ത്തികയുടെ മറുപടി. കേരളത്തില്‍ എന്നല്ല ലോകത്തിലെ ഒരു പെണ്ണും ദുല്‍ഖര്‍ സല്‍മാനെ വിട്ടുപോകില്ല. പക്ഷേ താനെന്ത് ചെയ്യാനാ, എന്റെ തിരക്കഥാകൃത്ത് അങ്ങനെ എഴുതിപ്പോയി. സംവിധായകന്‍ പറയുന്നതല്ലേ ചെയ്യാന്‍ പറ്റൂ. അവരെ തേച്ചിട്ട് പോകാന്‍ കഴിയില്ലല്ലോ? കുഞ്ഞിക്കാ ഫാന്‍സിനോട് സോറി പറയുന്നു. ഇപ്രകാരമായിരുന്നു കാര്‍ത്തികയുടെ മറുപടി.
