മലയാളത്തിന്റെ താരരാജാവ് മോഹന്‍ലാലിനെ നായകനാക്കി ജീത്തു ജോസഫ് സംവിധാനം ചെയ്ത് ചരിത്ര വിജയം നേടിയ സിനിമകളാണ് ദൃശ്യം, ദൃശ്യം 2 എന്നിവ. മലയാള സിനിമയില്‍ ആദ്യമായി അമ്പതു കോടി കളക്ഷന്‍ നേടിയ ദൃശ്യം തമിഴ്, തെലുങ്കു, ഹിന്ദി, കന്നഡ, സിംഹളീസ്, ചൈനീസ് ഭാഷകളിലേക്ക് റീമേക്ക് ചെയ്തിരുന്നു.
മലയാളത്തിന് പുറമേ പുറത്തിറങ്ങിയ എല്ലാ ഭാഷകളിലും തകര്‍പ്പന്‍ വിജയമാണ് ഈ ചിത്രം നേടിയത്.ജീത്തു ജോസഫ് രചിച്ചു സംവിധാനം ചെയ്ത ഈ ചിത്രങ്ങള്‍ നേടിയ വിജയം ഭാഷയുടേയും ദേശത്തിന്റെയും അതിരുകള്‍ ഭേദിച്ചാണ് വിജയ കുതിപ്പ് നടത്തിയത്.
അങ്ങനെ ത്രില്ലര്‍ സിനിമകളുടെ രാജാവായി മാറുകയായിരുന്നു ജീത്തു ജോസഫ്. ജീത്തു ഏറ്റവും കൂടുതല്‍ വര്‍ക്ക് ചെയ്തത് മോഹന്‍ലാലിനൊപ്പമാണ്. അണിയറയില്‍ ഒരുങ്ങുന്ന പുതിയ ചിത്രവും മോഹന്‍ലാലിനൊപ്പമുള്ളതാണ്. റാം എന്ന് പേരിട്ടിരിക്കുന്ന ചിത്രത്തില്‍ തൃഷയാണ് നായിക.
ഇപ്പോഴിതാ കൗമുദി മൂവിസിന് ജീത്തു ജോസഫ് നല്‍കിയ അഭിമുഖമാണ് ഏറെ ശ്രദ്ധിക്കപ്പെടുന്നത്. മോഹന്‍ലാല്‍ തനിക്കൊപ്പം സിനിമകള്‍ ചെയ്യുന്നത് ചിത്രങ്ങളെല്ലാം വിജയിക്കുന്നതുകൊണ്ടല്ലെന്നും പരാജയപ്പെട്ട സിനിമകള്‍ ചെയ്ത സംവിധായകര്‍ക്കും അദ്ദേഹം അവസരം നല്‍കാറുണ്ടെന്നും ജീത്തു പറയുന്നു.
സിനിമയുടെ കഥ നല്ലതാണെന്ന് കണ്ടാല്‍ അദ്ദേഹം അത് ചെയ്യും. ഒത്തിരി സംവിധായകര്‍ക്കൊപ്പം അദ്ദേഹം തുടരെ തുടരെ വര്‍ക്ക് ചെയ്തിട്ടുണ്ടെന്നും തനിക്കൊപ്പം മാത്രമല്ലെന്നും ജീത്തു ജോസഫ് പറയുന്നു. റാം എന്ന സിനിമയെക്കുറിച്ചും അദ്ദേഹം സംസാരിച്ചു.
റിയലിസ്റ്റിക് ഫൈറ്റ് വെച്ചുള്ള ആക്ഷന്‍ സീനുകളാണ് ചിത്രത്തില്‍ ഒരുക്കിയിരിക്കുന്നതെന്നും നല്ല കഥയാണെന്നും നന്നായി ചെയ്യാനാവുമെന്ന വിശ്വാസമുണ്ടെന്നും ജീത്തു ജോസഫ് പറയുന്നു.
