മലയാളത്തിന്റെ കുടുംബ നായകൻ ജയറാമും തമിഴകത്തിന്റെ മക്കൾ ശെൽപം വിജയ് സേതുപതിയും പ്രധാനവേഷത്തിലെത്തുന്ന മാർക്കോണി മത്തായിയുടെ ട്രെയിലർ റിലീസ് ചെയ്തു. പ്രണയവും തമാശയും ജയറാം വിജയ് സേതുപതി നൃത്തരംഗവുമൊക്കെയുള്ള, ആകാംഷയുണർത്തുന്ന ട്രെയിലറാണിത്. ചിത്രം വളരെ രസകരമായിരിക്കുമെന്നാണ് ട്രെയിലർ നൽകുന്ന സൂചന.
റേഡിയോയിലൂടെ പാട്ടിനെ പ്രണയിച്ച സെക്യൂരിറ്റിക്കാരൻ മാർക്കോണി മത്തായിയുടെ കഥയാണ് ചിത്രം പറയുന്നത്. മത്തായിക്ക് റേഡിയോയുമായുള്ള പ്രണയമാണ് ആ കഥാപാത്രത്തിന് റേഡിയോ കണ്ടുപിടിച്ച മാർക്കോണിയുടെ പേരും ഒപ്പം ചേർത്തത്.
ജയറാമും മക്കൾ സെൽവനും മലയാളത്തിൽ ഒരു ചിത്രത്തിനായി ഒന്നിക്കുമ്പോൾ ആരാധകർക്ക് പ്രതീക്ഷയേറെയാണ്. ആത്മീയയാണ് ചിത്രത്തിലെ നായിക.സനൽ കളത്തിലാണ് ചിത്രം സംവിധാനം ചെയ്യുന്നത്.
സജൻ കളത്തിൽ ഛായാഗ്രഹണം നിർവഹിക്കുന്ന ഈ ചിത്രത്തിന്റെ തിരക്കഥയും സംഭാഷണവുമെഴുതുന്നത് സനിൽ കളത്തിൽ, റെജീഷ് മിഥില എന്നിവർ ചേർന്നാണ്. സത്യം സിനിമാസിന്റെ ബാനറിൽ പ്രേമചന്ദ്രൻ എ. ജിയാണ് ചിത്രം നിർമ്മിക്കുന്നത്. കണ്മണി രാജയാണ് ചിത്രത്തിന്റെ തമിഴ് ഡയലോഗുകൾ ചെയ്യുന്നത്.
അനിൽ പനച്ചൂരാൻ, ബി.കെ ഹരി നാരായണൻ എന്നിവരുടെ വരികൾക്ക് എം.ജയചന്ദ്രൻ സംഗീതം പകരുന്നു. അജു വർഗീസ്, ജോയ് മാത്യു, സുധീർ കരമന, മാമുക്കോയ, അനീഷ്,കലാഭവൻ പ്രജോദ്, ഇടവേള ബാബു, മല്ലിക സുകുമാരൻ, ശശി കലിംഗ, ടിനി ടോം തുടങ്ങി നിരവധി താരങ്ങൾ ചിത്രത്തിൽ അണിനിരക്കുന്നുണ്ട്.
