മലയാളത്തിലെ സൂപ്പര്‍ഹിറ്റ് സംവിധായകന്‍ വിനയന്‍ മണിക്കുട്ടനെ നായകനാക്കി ഒരുക്കിയ ബോയ്ഫ്രണ്ട് എന്ന ചിത്രത്തിലൂടെ അഭിനയ രംഗത്തേക്ക് എത്തി പിന്നീട് തെന്നിന്ത്യന്‍ സിനിമാ ആരാധകരുടെ പ്രിയങ്കരിയായി മാറിയ നടിയാണ് ഹണി റോസ്. പത്താം ക്ലാസില്‍ പഠിക്കുന്ന സമയത്ത് ആയിരുന്നു ആദ്യമായി ഹണി ചിത്രത്തിലേക്ക് കടന്ന് വന്നത്.
ബോയ്ഫ്രണ്ടിന്റെ തകര്‍പ്പന്‍ വിജയത്തിന് പിന്നാലെ താരത്തെ തേടി നിരവധി അവസരങ്ങള്‍ എത്തുകയായിരുന്നു. നിരവധി സിനിമകളില്‍ ചെറുതും വലുതുമായി വേഷങ്ങള്‍ ചെയ്ത് പോന്നിരുന്ന നടിക്ക് അനൂപ് മേനോന്‍, ജയസൂര്യ എന്നിവര്‍ നായകരായി എത്തിയ ട്രിവാന്‍ഡ്രം ലോഡ്ജ് ചിത്രത്തിലെ ധ്വനി നമ്പ്യാര്‍ എന്ന കഥാപാത്രം വലിയ ഒരു ബ്രേക്ക് തന്നയാണ് നല്‍കിയത്. താരത്തിന്റെ കരിയറില്‍ തന്നെ വലിയ ചലനങ്ങള്‍ സൃഷ്ടിച്ച ചിത്രമായിരുന്നു ട്രിവാന്‍ഡ്രം ലോഡ്ജ്.
ഇതോടു കൂടി സൂപ്പര്‍ താരങ്ങളായ മമ്മൂട്ടിയുടെയും മോഹന്‍ലാലിന്റെയും നിരവധി ചിത്രങ്ങള്‍ അടക്കമുള്ള സൂപ്പര്‍താരചിത്രങ്ങള്‍ ഹണി റോസിനെ തേടി എത്തി. മോഹന്‍ലാല്‍ നായകനായ മോണ്‍സ്റ്റര്‍ ആണ് താരത്തിന്റെ ഏറ്റവും ഒടുവില്‍ പുറത്തിറങ്ങിയ മലയാള ചിത്രം. വൈശാഖ് സംവിധാനം ചെയ്ത ചിത്രത്തില്‍
ഭാമിനി ലെസ്ബിയന്‍ കഥാപാത്രത്തെ അവതരിപ്പിച്ച് താരം ഏറെ കൈയ്യടി നേടി.
സോഷ്യല്‍ മീഡിയയില്‍ ഏറെ സജീവമായ ഹണി റോസ് ഉദ്ഘാടന വേദികളിലേയും പ്രിയതാരമാണ്. തന്റെ വിശേഷങ്ങളും ഉദ്ഘാടന ചിത്രങ്ങളും ഒക്കെ താരം സോഷ്യല്‍ മീഡിയയിലൂടെ ആരാധകരുമായി പങ്കുവെയ്ക്കാറുണ്ട്. ഇപ്പോഴിതാ തെന്നിന്ത്യയിലാകെ സജീവമാവുകയാണ് ഹണി റോസ്. തെലുങ്ക് ചിത്രമായ വീര സിംഹ റെഡ്ഡിയാണ് ഹണിയുടെ പുതിയ ചിത്രം.
ചിത്രത്തില്‍ തെലുങ്ക് സൂപ്പര്‍ സ്റ്റാര്‍ നന്ദമൂരി ബാലകൃഷ്ണയാണ് ചിത്രത്തില്‍ നായകന്‍. ഈ ചിത്രത്തില്‍ ലാലും പ്രധാന വേഷത്തിലെത്തുന്നുണ്ട്. ശ്രുതി ഹാസന്‍, വരലക്ഷ്മി ശരത്കുമാര്‍, ദുനിയ വിജയ്, പി രവി ശങ്കര്‍, ചന്ദ്രിക രവി തുടങ്ങി വന്‍ താര നിരയും ഈ ചിത്രത്തിലുണ്ട്.
ഇപ്പോഴിതാ ചിത്രത്തിന്റെ പ്രീ റിലീസ് പരിപാടി വൈറലാവുകയാണ്. പ്രീ റിലീസിനെത്തിയ ഹണി റോസ് സംസാരിക്കുന്ന വീഡിയോയാണിപ്പോള്‍ സോഷ്യല്‍ മീഡിയയില്‍ വൈറലാകുന്നത്. ഹണിയും വീഡിയോ ഇന്‍സ്റ്റഗ്രാമിലൂടെ പങ്കുവച്ചിട്ടുണ്ട്. വേദിയില്‍ നിന്ന് അതിമനോഹരമായാണ് ഹണി തെലുങ്ക് സംസാരിക്കുന്നത്. ചിത്രത്തിന്റെ അണിയറപ്രവര്‍ത്തകര്‍ക്ക് നന്ദിയും ഹണി തെലുങ്കില്‍ തന്നെയാണ് പറയുന്നത്.
താരത്തിന്റെ മനോഹരമായ തെലുങ്ക് കേട്ട് അമ്പരന്നിരിക്കുകയാണ് മലയാളികള്‍ അടക്കുമുള്ള ആരാധകര്‍. നിങ്ങള്‍ വളരെ നന്നായി തെലുങ്ക് സംസാരിക്കുന്നു, തെലുങ്ക് നടിമാര്‍ പോലും ഇത്ര നന്നായി സംസാരിക്കാറില്ല തീര്‍ച്ചയായും നിങ്ങള്‍ അഭിനന്ദനം അര്‍ഹിക്കുന്നു എന്നുമൊക്കെ ആരാധകര്‍ വീഡിയോയ്ക്ക് കമന്റായി രേഖപ്പെടുത്തുന്നു.
വീര സിംഹ റെഡ്ഡി സംവിധാനം ചെയ്യുന്നത് ഗോപിചന്ദ് മലിനേനി ആണ്. ജനുവരി 12 ന് ചിത്രം തീയേറ്ററുകളിലെത്തും. ഇന്നലെയാണ് ചിത്രത്തിന്റെ ട്രെയ്ലര്‍ അണിയറപ്രവര്‍ത്തകര്‍ പുറത്തുവിട്ടത്. മൈത്രി മൂവി മേക്കേഴ്‌സാണ് ചിത്രം തീയേറ്ററുകളിലെത്തിക്കുക.
