വര്‍ഷങ്ങളായി മലയാള സിനിമയില്‍ സൂപ്പര്‍ഹിറ്റുകള്‍ ഒരുക്കി നിറഞ്ഞു നില്‍ക്കുന്ന സംവിധായകന്‍ ആണ് വിനയന്‍. ഇപ്പോഴിതാ വിനയന്‍ സംവിധാനം ചെയ്യുന്ന ഏറ്റവും പുതിയ ചിത്രമായ പത്തൊന്‍പതാം നൂറ്റാണ്ട് തിയ്യേറ്ററുകളിലെത്തിയിരിക്കുകയാണ്.
ചെറിയ ഇടവേളയ്ക്ക് ശേഷം വിനയന്‍ ഒരുക്കിയ ഈ ചിത്രത്തിന് മികച്ച പ്രതികരണമാണ് തിയ്യേറ്ററുകളില്‍ നിന്നും ലഭിച്ചുകൊണ്ടിരിക്കുന്നത്. നേരത്തെ മലയാള സിനിമയില്‍ നിന്നും വിലക്കുകള്‍ നേരിട്ടിരുന്നത് സംവിധായകന്റെ കരിയറിനെ ഏറെ ബാധിച്ചിരുന്നു.
വിനയന്‍ ഏറെ കാലത്തിന് ശേഷമാണ് വലിയ കാന്‍വാസില്‍ പത്തൊമ്പതാം നൂറ്റാണ്ട് പോലുള്ള സിനിമ ഒരുക്കിയത്. സംവിധായകന്റെ ഏറ്റവും ഉയര്‍ന്ന ബജറ്റില്‍ ഒരുക്കിയ ചിത്രത്തില്‍ സിജു വില്‍സണാണ് നായകന്‍. തിയ്യേറ്ററിലെത്തിയ ചിത്രം പ്രേക്ഷകര്‍ക്കൊപ്പമിരുന്നാണ് വിനയന്‍ കണ്ടത്.
ചിത്രം കണ്ടതിന് ശേഷം ഇനിയും ഇത്തരത്തിലുള്ള വലിയ ചിത്രങ്ങള്‍ ചെയ്യണമെന്നാണ് തന്റെ ആഗ്രഹമെന്ന് വിനയന്‍ മാധ്യമപ്രവര്‍ത്തകരോട് പറഞ്ഞു. നടന്‍ മോഹന്‍ലാലുമായിട്ട് ഒരു പടം ചെയ്യാന്‍ ആഗ്രഹിക്കുന്നുണ്ടെന്നും ഇപ്പോള്‍ ആ പടത്തിന്റെ ചര്‍ച്ച നടക്കുന്നുണ്ടെന്നും സംവിധായകന്‍ പറഞ്ഞു.
തന്റെ കരിയറിലെ മികച്ച ചിത്രമായിരുന്നു രാക്ഷസ രാജാവെന്നും അതിന് ശേഷം മമ്മൂക്കയ്ക്കു വേണ്ടിയുള്ള ഒരു കഥാപാത്രം തന്റെ മനസില്‍ ഉണ്ടെന്നും വിനയന്‍ കൂട്ടിച്ചേര്‍ത്തു.
