മിനിസ്‌ക്രീൻ പ്രേക്ഷകരുടെ ഇഷ്ട പരമ്പരയാണ് കുടുംബവിളക്ക്. സീരിയൽ വിശേഷങ്ങൾ എത്ര പറഞ്ഞാലും തീരുന്നതല്ല. ടി ആർപി റേറ്റിങ്ങിൽ ഒന്നാം നിരയിൽ സ്ഥാനം ഉറപ്പിച്ച പരമ്പര തുടങ്ങിട്ട് രണ്ടുവർഷത്തോളമായി. വീട്ടമ്മയുടെ അതിജീവനത്തിന്റെ കഥപറയുന്ന പരമ്പരയിൽ ചലച്ചിത്രതാരം മീര വാസുദേവാണ് കേന്ദ്ര കഥാപാത്രമായി എത്തുന്നത്.
പരമ്പരയിലെ താരങ്ങളും പ്രേക്ഷകർക്ക് ഏറെ പ്രിയപ്പെട്ടവരാണ്. കുടുംബവിളക്കിൽ ശീതൾ എന്ന കഥാപാത്രത്തെ തുടക്കത്തിൽ അവതരിപ്പിച്ചത് പാർവതി വിജയ് ആയിരുന്നു. മൃദുല വിജയ് യുടെ സഹോദരിയായ പാർവതിക്ക് മികച്ച സ്വീകാര്യതയായിരുന്നു ലഭിച്ചത്. ഈ പരമ്പരയിൽ അഭിനയിച്ച് വരുന്നതിനിടയിലായിരുന്നു പാർവതി അരുണുമായി പ്രണയത്തിലായത്. അധികം വൈകാതെ തന്നെ ഇരുവരും വിവാഹിതരാവുകയായിരുന്നു. വിവാഹത്തോടെയായി അഭിനയത്തിൽ നിന്നും മാറുകയായിരുന്നു പാർവതി. തുടക്കത്തിലെ എതിർപ്പുകൾ മാറ്റി വീട്ടുകാർ ഇരുവരേയും സ്വീകരിച്ചിരുന്നു. മൃദുലയുടെ വിവാഹത്തിൽ പാർവതിയും അരുണും പങ്കെടുത്തിരുന്നു. കുഞ്ഞതിഥിയുടെ വരവിനായുള്ള കാത്തിരിപ്പിലാണ് തങ്ങളെന്ന് പാർവതി തുറന്ന് പറഞ്ഞിരുന്നു. ഇൻസ്റ്റഗ്രാമിലൂടെയായി പാർവതി പങ്കിടുന്ന വിശേഷങ്ങളെല്ലാം വൈറലായി മാറാറുണ്ട്.
കുടുംബവിളക്കിലെ സഹതാരമായ ആതിര മാധവിനെ കണ്ടുമുട്ടിയ സന്തോഷവും പാർവതി പങ്കിട്ടിരുന്നു. എന്റെ സ്വീറ്റിയോടൊപ്പമുള്ള മനോഹരനിമിഷങ്ങൾ എന്ന ക്യാപ്ഷനോടെയായാണ് പാർവതി ഫോട്ടോ പോസ്റ്റ് ചെയ്തത്. അരുണാണ് ചിത്രം പകർത്തിയതെന്നും പാർവതി കുറിച്ചിരുന്നു. പാർവതിയെപ്പോലെ തന്നെ കുഞ്ഞതിഥിയെ വരവേൽക്കാനുള്ള തയ്യാറെടുപ്പിലാണ് ആതിരയും. ഒന്നാം വിവാഹ വാർഷിക ദിനത്തിലായിരുന്നു ആതിര കുഞ്ഞതിഥിയുടെ വരവിനെക്കുറിച്ച് പറഞ്ഞത്. അഞ്ചാം മാസമാണെന്നും അഭിനയിക്കാൻ പറ്റുന്നിടത്തോളം അഭിനയിക്കുമെന്നും താരം പറഞ്ഞിരുന്നു.
ശാരീരികമായി ബുദ്ധിമുട്ടുകളുണ്ടെന്നും താൻ പരമ്പരയിൽ നിന്നും പിൻവാങ്ങുകയാണെന്നറിയിച്ചും ആതിര എത്തിയിരുന്നു. അഭിനയ രംഗത്ത് സജീവമല്ലെങ്കിലും സോഷ്യൽ മീഡിയയിലൂടെയായി ആതിരയും വിശേഷങ്ങൾ പങ്കിടുന്നുണ്ട്. കുടുംബവിളക്ക് താരങ്ങളുടെ കൂടിക്കാഴ്ചയിലെ ചിത്രങ്ങളും വിശേഷവും സോഷ്യൽ മീഡിയയിലൂടെ വൈറലായിക്കൊണ്ടിരിക്കുകയാണ്.
യൂട്യൂബ് ചാനലുമായും സജീവമാണ് ആതിര. തന്റെ ഹോം ടൂർ വീഡിയോയുമായി അടുത്തിടെ ആതിര എത്തിയിരുന്നു. ഡോക്ടർ അനന്യ ആയപ്പോൾ സ്റ്റെസത്കോപ്പ് കിട്ടി, എന്തേലും കേൾക്കാമൊന്ന് നോക്കിയത് കറക്റ്റായിട്ട് ഷൂട്ടിനിടയിൽ പകർത്തിയ എന്റെ പ്രിയപ്പെട്ട കെകെ മേനോന് നന്ദിയെന്നും കുറിച്ചുള്ള വീഡിയോയുമായും ആതിര എത്തിയിരുന്നു. വയറിൽ സ്റ്റെത്ത് വെച്ച് നോക്കുന്ന ആതിരയെയായാണ് വീഡിയോയിൽ കാണുന്നത്. പാർവതി വിജയിയും അമൃത നായരുമെല്ലാം ചിത്രത്തിന് താഴെ കമന്റുകളുമായെത്തിയിട്ടുണ്ട്.
