ഒരുകാലത്ത് ബോളിവുഡ് സിനിമയിലെ നായികയായി തിളങ്ങി നിന്നിരുന്ന നടിയാണ് റാണി മുഖര്‍ജി. ഒത്തിരി ആരാധകരാണ് താരത്തിനുള്ളത്. ഇപ്പോള്‍ സിനിമയില്‍ അത്രത്തോളം സജീവമല്ല താരം.
ഇപ്പോഴിതാ തന്റെ ജീവിതത്തിലുണ്ടായ ഒരു ദുരന്തം വെളിപ്പെടുത്തുകയാണ് താരം. കോവിഡ് കാലത്ത് തനിക്ക് ഗര്‍ഭഛിദ്രം സംഭവിച്ചതിനെ കുറിച്ചായിരുന്നു റാണി മുഖര്‍ജി തുറന്നുസംസാരിച്ചത്.
താന്‍ ആദ്യമായിട്ടാണ് ജീവിതത്തിലുണ്ടായ ദുരന്തം പുറംലോകവുമായി പങ്കുവെക്കുന്നതെന്ന് റാണി മുഖര്‍ജി പറയുന്നു. ഇന്നത്തെ കാലത്ത് നമ്മുടെ ജീവിതത്തിലെ എല്ലാസംഭവങ്ങളും പുറംലോകവുമായി പങ്കുവെക്കാന്‍ കഴിയില്ലെന്നും സിനിമ പ്രൊമോട്ട് ചെയ്യാനുള്ള അജണ്ടയായിട്ടേ പലരും അതിനെ കാണുകയുള്ളൂവെന്നും റാണി മുഖര്‍ജി പറയുന്നു.
താന്‍ 2020ല്‍ ആയിരുന്നു രണ്ടാമത്തെ കുഞ്ഞിനെ ഗര്‍ഭം ധരിച്ചത്. കോവിഡ് കാലമായതിനാല്‍ താന്‍ വീട്ടില്‍ തന്നെയായിരുന്നുവെന്നും എന്നാല്‍ അഞ്ചാംമാസത്തില്‍ തനിക്ക് കുഞ്ഞിനെ നഷ്ടപ്പെട്ടുവെന്നും ആ സംഭവം തന്നെ മാനസികമായി ഒത്തിരി തളര്‍ത്തിയെന്നും റാണി മുഖര്‍ജി പറയുന്നു.
ഇതിന് ശേഷമായിരുന്നു നിര്‍മ്മാതാവ് നിഖില്‍ അധ്വാനി മിസിസ് ചാറ്റര്‍ജി വേഴ്‌സസ് നോര്‍വെ യുടെ കഥയുമായി തന്നെ സമീപിക്കുന്നത്. കഥ കേട്ടപ്പോള്‍ താന്‍ ശരിക്കും ഞെട്ടിയെന്നും തന്റെ അവസ്ഥയുമായി അതിന് ബന്ധമുണ്ടായിരുന്നുവെന്നും കുട്ടിയെ നഷ്ടപ്പെട്ട അമ്മയുടെ അനുഭവമായിരുന്നുവെന്നും റാണി മുഖര്‍ജി പറയുന്നു.
