ശ്യാമപ്രസാദ് സംവിധാനം ചെയ്ത ഋതു എന്ന സിനിമയിലൂടെ മലയാളത്തിലേക്കെത്തിയ യുവ താരമാണ് ആസിഫലി. പിന്നീട് നിരവധി വ്യത്യസ്ത വേഷങ്ങൾ ചെയ്ത ആസിഫ് അലി മലയാളത്തിന്റെ പ്രിയ താരമായി മാറുകയായിരുന്നു.
ഇപ്പോഴിതാ ആസിഫലിയുടെ ഒരു വീഡിയോ സോഷ്യൽ മീഡിയയിൽ വൈറലാവുകയാണ്. മുണ്ടും ഷർട്ടും ധരിച്ച് ബൈക്ക് ഓടിച്ചു പോകുന്ന ഒരു ചെറുപ്പക്കാരൻ, ഒറ്റ നോട്ടത്തിൽ വിഡിയോ കണ്ടാൽ ഇങ്ങനെ മാത്രമേ തോന്നു.
ഒന്നൂടൊന്ന് സൂക്ഷിച്ചുനോക്കണം ആ നാടൻ പയ്യൻ മലയാളത്തിന്റെ പ്രിയതാരം ആസിഫ് അലിയാണെന്ന് മനസിലാകാൻ. ഈരാറ്റുപേട്ടയിലൂടെയാണ് ആസിഫ് പഴയൊരു ആർഎക്‌സ് ഹണ്ട്രണ്ട് ബൈക്കുമായി എത്തിയത്.
അപ്രതീക്ഷിതമായി യുവതാരത്തെ കണ്ട ചിലർ അമ്പരന്ന് നോക്കുന്നതും വിഡിയോയിൽ കാണാം.
സിനിമാ ഷൂട്ടിങ്ങിന്റെ ഭാഗമായിട്ടായിരുന്നു ആസിഫിന്റെ ഈ ബൈക്ക് സഫാരി. വിഡിയോ കൃത്യമായി നോക്കിയാൽ ആസിഫിന് മുന്നിലായി ഒരു കാർ കാണാം.
കാറിന്റെ പിൻഭാഗത്ത് കാമറയും ഷൂട്ടിങ് സംഘവും ഉണ്ട്. ഈരാറ്റുപേട്ടയിൽ ചിത്രീകരണം പുരോഗമിക്കുന്ന ജിബു ജേക്കബിൻറെ എല്ലാം ശരിയാകും എന്ന സിനിമയുടെ ചിത്രീകരണമായിരുന്നു ഇത്. വെള്ളിമൂങ്ങ, മുന്തിരിവള്ളികൾ തളിർക്കുമ്പോൾ, ആദ്യരാത്രി എന്നി ചിത്രങ്ങൾക്കു ശേഷം ജിബു ജേക്കബ് സംവിധാനം ചെയ്യുന്ന ചിത്രമാണിത്.
രജിഷ വിജയൻ ആണ് നായിക. ഷാരിസ്, നെബിൻ, ഷാൽബിൻ എന്നിവർ ചേർന്നാണ് ചിത്രത്തിന്റെ രചന നിർവ്വഹിച്ചിരിക്കുന്നത്. അനുരാഗ കരിക്കിൻ വെള്ളം എന്ന സൂപ്പർഹിറ്റിന് രജീഷ വിജയൻ ആസിഫ് അലിയുടെ നായകയാകുന്നു എന്ന പ്രത്യേകതയും ഈ സിനിമയ്ക്കുണ്ട്.
