ഇക്കഴിഞ്ഞ മാർച്ച് 28ന് ആണ് ഏറെ കാത്തിരിപ്പിനൊടുവിൽബിഗ് ബോസ് മലയാളം നാലാം സീസൺ ആരംഭിച്ച. വളരെ അധികം ആവേശത്തിലാണ് ആരാധകർ തങ്ങളുടെ പ്രിയപ്പെട്ട ഷോ ഏറ്റെടുത്തിരിക്കുന്നത്. തീർത്തും വ്യത്യസ്തരായ 17 പേരുമായി ആരംഭിച്ച ഷോ തുടക്കത്തിൽ തന്നെ രസകരമായി മാറിയിരിക്കുകയാണ്. പ്രേക്ഷകർക്ക് സുപരിചിതരായവരും പരിചിതരല്ലാത്തവരും ഇത്തവണ ബിഗ് ബോസ് വീട്ടിലുണ്ട്.
ഇതിനോടകം തന്നെ ശ്രദ്ധ നേടാൻ ചിലർക്കൊക്കെ സാധിച്ചിട്ടുണ്ടെങ്കിലും പലരേയും വരും ദിവസങ്ങളിലായിരിക്കാം കൂടുതൽ അടുത്തറിയാൻ സാധിക്കുക. അതേസമയം രസകരമായൊരു വീക്കിലി ടാസ്‌ക്കിലൂടെയാണ് ഇത്തവണ ബിഗ് ബോസ് മലയാളം കടന്നു പോകുന്നത്. പാവ കൈവശം വെക്കുന്നവർ വീടിന് അകത്തും പാവയില്ലാത്തവർ പുറത്തുമായി തുടരുകയാണ്. ഇതുപ്രകാരം ലഭിച്ച പ്രത്യേക അധികാരം ഉപയോഗിച്ച് പാവയുള്ളവർക്ക് വീടിന് അകത്തേക്ക് പ്രവേശിക്കാൻ പുറത്തുള്ളവരിൽ നിന്നും രണ്ടു പേരെ തിരഞ്ഞെടുക്കാം.
ഇവർക്കിടയിൽ നടത്തുന്ന മത്സരത്തിൽ ജയിക്കുന്നയാൾക്കാണ് അകത്തേക്ക് പ്രവേശനം ലഭിക്കുക. ഇത് പ്രകാരം ഇന്നലെ ദിൽഷയും നിമിഷയും വീടിന് ഉളളിൽ പ്രവേശിച്ചിരിക്കുകയാണ്. ഇന്നും മത്സരം നടക്കുന്നുണ്ട്. ഇന്നത്തെ ഒരു മത്സരം അഖിലും ശാലിനിയും തമ്മിലായിരുന്നു. കോമഡി താരമായ അഖിൽ നേരത്തെ തന്നെ ബിഗ് ബോസ് വീട്ടിലെത്തുമെന്ന് വിലയിരുത്തപ്പെട്ട താരമാണ്. ആദ്യ ദിവസങ്ങളിൽ തന്നെ വീട്ടിലെ ജനപ്രീയ താരമായി മാറാനും അഖിലിന് സാധിച്ചിട്ടുണ്ട്. അതേസമയം പ്രേക്ഷകർക്ക് അത്ര പരിചിതയല്ല ശാലിനി നായർ.
തനി നാട്ടിൻ പുറത്തുകാരിയാണ് താനെന്നാണ് ശാലിനി പറയുന്നത്. പോയ വർഷത്തിലെ സൂര്യയെ പോലെയാണ് ശാലിനിയെന്നാണ് ചിലർ പറയുന്നത്. ശാലിനിയും അഖിലും തമ്മിലാണ് ഇന്നത്തെ ആദ്യത്തെ മത്സരം. ശക്തമായ മത്സരം തന്നെയായിരുന്നു ഇവർക്കിടയിൽ നടന്നത്. കപ്പിയിൽ തൂക്കിയിട്ട ഭാരമുളള സഞ്ചി ഉപയോഗിച്ച് ബ്ലോക്കുകൾ തകർക്കുക എന്നതായിരുന്നു ടാസ്‌ക്. ശക്തമായ മത്സരം തന്നെ ഇരുവരും കാഴ്ച വച്ചു. തുടക്കത്തിൽ തന്നെ അഖിൽ മേൽക്കൈ നേടിയിരുന്നു.
എന്നാൽ ഇതിനിടെ ശാലിനിയുടെ കപ്പിയിൽ കയർ കുടുങ്ങിയതോടെ താരത്തിന് മത്സരിക്കാൻ വയ്യാതെ വന്നു. എന്നാൽ ഈ പ്രശ്നം പരിഹരിക്കപ്പെടുന്നത് വരെ കളിക്കുന്നത് നിർത്തിയ അഖിൽ തന്റെ മാന്യത കൊണ്ട് കയ്യടി നേടി. പ്രശ്നം പരിഹരിച്ചതോടെ ശാലിനിയും ശക്തമായി തന്നെ മത്സരിച്ചു. തുടക്കത്തിൽ പലരും ദുർബലയായ മത്സരാർത്ഥിയാണെന്ന് കരുതിയിരുന്ന ശാലിനിയിൽ നിന്നും ശക്തമായ പ്രകടനമാണ് കണ്ടത്.
ടാസ്‌ക്കിന്റെ കാര്യത്തിൽ താൻ മോശക്കാരിയല്ലെന്നും പലരുടേയും ധാരണ ശരിയല്ലെന്നും ബോധ്യപ്പെടുത്താൻ ശാലിനിയ്ക്ക് സാധിച്ചിട്ടുണ്ട്. എന്നാൽ മത്സരത്തിന്റെ അന്തിമ വിജയി അഖിൽ തന്നെയായിരുന്നു. ഇതോടെ അഖിൽ വീടിന് അകത്തേക്കും ശാലിനി പുറത്തേക്കും പോയി. ഇന്നത്തെ രണ്ടാമത്തെ മത്സരം സുചിത്രയും ലക്ഷ്മി പ്രിയയും തമ്മിലായിരുന്നു. കഴിഞ്ഞ ദിവസം തന്നെ ലക്ഷ്മിയ്ക്കെതിരെ സുചിത്ര പടയൊരുക്കത്തിന് ശ്രമിക്കുന്നത് കണ്ടിരുന്നു.
അതിനാൽ ഈ മത്സരം വാശിയേറുന്നതായിരിക്കുമെന്നുറപ്പാണ്. മത്സരത്തിനിടെ ലക്ഷ്മി തളർന്നു വീഴുന്നതായാണ് പ്രൊമോ വീഡിയോ വ്യക്തമാക്കുന്നത്. തുടക്കത്തിൽ തന്നെ ടാസ്‌കുകളിൽ കയ്യടി നേടുകയാണ് ബിഗ് ബോസ്. കഴിഞ്ഞ വർഷത്തേക്കാൾ നല്ല ടാസ്‌കുകളാണ് ഇത്തവണ ഒരുക്കിയിരിക്കുന്നതെന്നും എന്നാൽ മത്സരാർത്ഥികൾ നല്ലത് കഴിഞ്ഞ തവണയാണെന്നായിരുന്നു ഒരാളുടെ കമന്റ്.
കഴിഞ്ഞ തവണ കണ്ടത് പോലെ കലോത്സവം ടാസ്‌കൊന്നുമല്ല വേണ്ടതെന്നും ഇതുപോലെ മത്സരമുണ്ടാകുന്ന ടാസ്‌കുകളാണ് വേണ്ടതെന്നുമാണ് ചിലർ പറയുന്നത്. അതേസമയം ബിഗ ബോസ് മലയാളം സീസൺ 4 ലെ ആദ്യത്തെ അടി ഇന്നായിരിക്കുമെന്നാണ് പ്രൊമോ വീഡിയോ കണ്ട ആരാധകർ പറയുന്നത്. നിലവിലെ ക്യാപറ്റനായ അശ്വിനും ഡോക്ടർ റോബിനും തമ്മിലായിരിക്കും ആദ്യത്തെ അടിയെന്നാണ് പ്രൊമോ വീഡിയോ സൂചിപ്പിക്കുന്നത്.
