ഒരുകാലത്ത് മലയാള സിനിമയിലെ സൂപ്പർനായിക ആയിരുന്നു ദിവ്യ ഉണ്ണി. നിരവധി സൂപ്പർഹിറ്റ് സിനിമകളിൽ നായിക ആയിട്ടുള്ള ദിവ്യ ഉണ്ണിക്ക് ആരാധകരും ഏറെയാണ്. നീയെത്ര ധന്യ എന്ന ചിത്രത്തിലൂടെ ബാലതാരമായി ആയിരുന്നു ദിവ്യ ഉണ്ണിയുടെ സിനിമാ അരങ്ങേറ്റം. പിന്നീട് പൂക്കാലം വരവായി, ഓ ഫാബി തുടങ്ങിയ ചിത്രങ്ങളിലും ദിവ്യ ബാലതാരമായെത്തി.
മലയാളത്തിന്റെ താരരാജാക്കൻമാരായ മമ്മൂട്ടിക്കും മോഹൻലാലിനും ഒക്കെ നായികയായിട്ടുള്ള താരം കൂടിയാണ് ദിവ്യ ഉണ്ണി. തൊണ്ണൂറുകളിൽ മഞ്ജു വാര്യർക്ക് ഒപ്പം തന്നെ ശ്രദ്ധിക്കപ്പെട്ട നായികയായിരുന്നു താരം. പതിനാലാം വയസ്സിൽ കല്യാണ സൗഗന്ധികം എന്ന ചിത്രത്തിലൂടെ നായികയായും ദിവ്യ ഉണ്ണി അരങ്ങേറ്റം കുറിച്ചു. നടി എന്നതിലുപരി മികച്ചൊരു നർത്തകി കൂടെയാണ് ദിവ്യ.
ഇപ്പോളിതാ കൗതുകകരമായ ഓർമ പങ്കുവയ്ക്കുകയാണ് ദിവ്യ ഉണ്ണി. സുരേഷ് ഗോപിയ്ക്ക് ഒപ്പമുള്ള ഒരു പഴയ ഫോട്ടോയാണ് ദിവ്യ ഉണ്ണി പങ്കുവച്ചിരിക്കുന്നത്. കുഞ്ഞു ദിവ്യയെ ആണ് ചിത്രത്തിൽ കാണാനാവുക. ഞങ്ങളുടെ പൊന്നേത്ത് അമമ്പലത്തിൽ സുരേഷ് ഏട്ടൻ വന്നപ്പോൾ പകർത്തിയ ചിത്രം എന്ന ക്യാപ്ഷനോടെയാണ് ദിവ്യ ചിത്രം പോസ്റ്റ് ചെയ്തിരിക്കുന്നത്.
വർഷങ്ങൾക്കു ശേഷം പ്രണയവർണങ്ങൾ, മാർക്ക് ആന്റണി എന്നീ ചിത്രങ്ങളിൽ അതേ സുരേഷ് ഗോപിയുടെ നായികയായി എത്തിയത് ദിവ്യ ആയിരുന്നു. അതേ സമയം മലയാളത്തിൽ ശ്രദ്ധേയമായ നിരവധി കഥാപാത്രങ്ങളെ അവതരിപ്പിച്ച ദിവ്യ വിവാഹത്തോടെ സിനിമയിൽ നിന്നും ബ്രേക്ക് എടുക്കുകയായിരുന്നു.
യുഎസ് നഗരമായ ഹൂസ്റ്റണിൽ ശ്രീപാദം സ്‌കൂൾ ഓഫ് ആർട്‌സ് എന്ന പേരിൽ നൃത്തവിദ്യാലയം നടത്തുകയാണ് ദിവ്യാ ഉണ്ണി ഇപ്പോൾ. ആദ്യ വിവാഹ ബന്ധം വേർപ്പെടുത്തിയ ദിവ്യ 2018 ഫെബ്രുവരി നാലിന് ഹൂസ്റ്റണിൽ വച്ച് വീണ്ടും വിവാഹിതയായിരുന്നു.
മുംബൈ മലയാളിയായ അരുൺ കുമാർ മണികണ്ഠനാണ് ദിവ്യയുടെ ഭർത്താവ്. ഈ ബന്ധത്തിൽ ഐശ്വര്യ എന്നൊരു മകളും ഈ ദമ്പതികൾക്കുണ്ട്. ദിവ്യയുടെ ആദ്യ വിവാഹത്തിലെ രണ്ടു കുട്ടികളും ദിവ്യയ്ക്ക് ഒപ്പമാണ്.
