ദളപതി വിജയുടെ കരിയറിലെ മികച്ച വിജയമായി ബിഗിൽ മാറുമെന്ന് ഉറപ്പാണ്. ദീപാവലി റിലീസായി എത്തിയ ചിത്രത്തിന് മികച്ച വരവേൽപ്പാണ് ആരാധകർ ഒന്നടങ്കം നൽകിയത്. ഒരു വർഷത്തെ കാത്തിരിപ്പിന് വിരാമമിട്ടുകൊണ്ടാണ് ദളപതി ചിത്രം തിയ്യേറ്ററുകളിലേക്ക് എത്തിയത്.
തെറി,മെർസൽ തുടങ്ങിയ സിനിമകൾക്ക് ശേഷമാണ് വിജയ് അറ്റ്ലീ കൂട്ടൂകെട്ട് വീണ്ടും എത്തിയിരുന്നത്. ഇത്തവണ ഫുട്ബോൾ പ്രമേയമാക്കികൊണ്ടുളള ഒരു ചിത്രവുമായിട്ടാണ് ഈ കൂട്ടുകെട്ട് എത്തിയത്. 180 കോടി ബജറ്റിൽ നിർമിച്ച ചിത്രം 4 ദിവസം കൊണ്ട് നേടിയത് 150 കോടിക്ക് മുകളിലാണെന്ന് റിപ്പോർട്ടുകൾ.
ദീപാവലി റിലീസായി കാർത്തിയുടെ കൈദിക്കൊപ്പമാണ് വിജയ് ചിത്രവും തിയ്യേറ്ററുകളിലേക്ക് എത്തിയിരുന്നത്. ലോകമെമ്ബാടുമായി 4000ത്തിലധികം തിയ്യേറ്ററുകളിലാണ് സിനിമ റിലീസ് ചെയ്തിരുന്നത്. 10 ദിവസം കൊണ്ട് ചിത്രം 250 കോടി കടക്കുമെന്നാണ് സൂചന.
വിജയുടെ കരിയറിലെ എറ്റവും വലിയ വിജയചിത്രമാകാനുളള കുതിപ്പിലാണ് നിലവിൽ ബിഗിലെന്ന് അറിയുന്നു. ധനുഷിന്റെ അസുരന് പിന്നാലെയാണ് ബിഗിലും ഇപ്പോൾ 150 കോടി ക്ലബിലേക്ക് എത്തിയിരിക്കുന്നത്.
2019ൽ സാഹോയ്ക്ക് പിന്നാലെ ആദ്യ ദിനം കൂടുതൽ കളക്ഷൻ നേടിയ ചിത്രമായും ബിഗിൽ മാറിയിരുന്നു. ഓവർസീസ് മാർക്കറ്റിൽ 52 കോടിയോളം നേടിയ സിനിമ ഇന്ത്യയിൽ നിന്ന് നേടിയത് നൂറ് കോടിയോളമാണ്.
