വളരെ പെട്ടെന്ന് തന്നെ മലയാളികളുടെ പ്രിയപ്പെട്ട ഗായികയായി മാറിയ താരമാണ് സിത്താര കൃഷ്ണ കുമാർ. ഗായിക എന്നതിൽ ഉപരി മികച്ച ഒരു നർത്തകി കൂടിയായ സിത്താര കലോൽസവ വേദിയിൽ നിന്നുമാണ് പിന്നണി ഗാന രംഗത്തേക്ക് എത്തിയത്.
സോഷ്യൽ മീഡിയയിലും മിനി സ്‌ക്രീനിലും ഏറെ സജീവമാണ് സിത്താര. തന്റെ വിശേഷങ്ങളും മറ്റും സോഷ്യൽ മീഡിയയിലൂടെ ആരാധകരുമായി പങ്കുവെയ്ക്കാറുള്ള സിത്താര മിനിസ്‌ക്രീനിൽ സംഗീത റിയാളിറ്റി ഷോകളുടെ ജഡ്ജായും എത്താറുണ്ട്.
ഇപ്പോഴിതാ വിസ്മയ കേസുമായി ബന്ധപ്പെട്ട് തന്റെ അഭിപ്രായം തുറന്നു പറഞ്ഞിരിക്കുകയാണ് സിത്താര കൃഷ്ണകുമാർ. കേസിൽ പ്ര തിയായ ഭർത്താവ് കിരൺ കുമാറിന് പത്ത് വർഷം തടവും പന്ത്രണ്ടര ലക്ഷം രൂപ പിഴയും കോടതി ശിക്ഷ വിധിച്ചിരുന്നു. ഈ സാഹചര്യത്തിലാണ് ഗായികയുടെ പ്രതികരണം. ഡൂൾ ന്യൂസിന് നൽകിയ പ്രതികരണത്തിലാണ് സിത്താരയുടെ തുറന്നു പറച്ചിൽ.
സ്ത്രീകൾ സാമ്പത്തിക സ്വാതന്ത്ര്യം നേടേണ്ടത് അത്യാവശ്യമാണെന്നും സ്ത്രീകൾക്ക് തീരുമാനം എടുക്കാൻ ഉള്ള സാഹചര്യം ഉണ്ടാവണമെന്നും സിത്താര തുറന്നു പറയുന്നു. വിസ്മയയുടെ അമ്മ പറഞ്ഞത് പോലെ പെൺകുട്ടികൾ സ്വന്തം കാലിൽ നിൽക്കേണ്ടത് വളരെ പ്രധാനപെട്ടതാണ്. കുട്ടികൾ അവരുടെ തീരുമാനങ്ങൾ എടുക്കാനുള്ള സാഹചര്യത്തിലേക്ക് അവരുടെ കൈ പിടിച്ചു ഒപ്പം നിൽക്കുകയാണ് വേണ്ടത്.
ഒരാൾ മുന്നിൽ നടക്കാനോ അല്ലെങ്കിൽ പിന്നിൽ നിന്ന് ഉന്താൻ ആളോ അല്ല വേണ്ടത്. നമുക്ക് ഒപ്പം നടക്കാൻ ആണ് ആളുവേണ്ടത്. അങ്ങനെ ആളുകളുണ്ടാകുമ്പോൾ നമുക്ക് ധൈര്യം വരും. ഓരോ കാര്യങ്ങൾ പഠിക്കാനായി വിസ്മയയുടെ മരണം പോലെയുള്ള വാർത്തകൾക്ക് വേണ്ടി കാത്തിരിക്കരുത്. എന്റെ വിവാഹത്തിന് ഞാൻ സ്വർണം ധരിക്കുന്നില്ലെന്നത് എന്റെ തീരുമാനമായിരുന്നു.
എന്റെ അമ്മക്കും അച്ഛനും അതിൽ യാതൊരു പ്രശ്നവുമില്ലായിരുന്നു. എന്നിട്ടും കുടുംബക്കാർക്കിടയിൽ മുറുമുറുപ്പുകൾ ഉണ്ടായിരുന്നു. അത്തരം തീരുമാനങ്ങൾ കുട്ടികൾ എടുക്കേണ്ടതുണ്ട്. ഏറ്റവും പ്രധാനപ്പെട്ട കാര്യം സൗഹൃദമാണ്. ആര് തന്നെയായാലും തമ്മിൽ സൗഹൃദം വേണം. ഭാര്യാ ഭർത്താവ് എന്ന റിലേഷൻഷിപിൽ ഭാര്യ ഭർത്താവ് എന്നുള്ള ഒരു കണക്ഷനുണ്ട്. അതിനപ്പുറത്തേക്ക് സൗഹൃദവും വേണം.
സുഹൃത്ത് ബന്ധമാണ് ഒട്ടും ജഡ്ജ്‌മെന്റൽ അല്ലാത്ത അൺകണ്ടീഷണൽ ആയിട്ടുള്ള സ്നേഹം എന്ന് പറയുന്നത്. അതിൽ അധികാരമില്ല, ആരും ആരുടേയും മുകളിലാണെന്ന ചിന്തയില്ല. തുല്യരായി കാണാൻ സാധിക്കുന്നത് സുഹൃത്തുക്കൾക്കാണ്. അത് വളരെ പ്രധാനപെട്ടതാണ്. അപ്പോൾ നമുക്ക് എന്തും തുറന്നുപറയാൻ സാധിക്കും.
പ്രശ്നങ്ങൾ ചർച്ച ചെയ്യാൻ സാധിക്കും. പിന്നെ ഡൊമസ്റ്റിക് വയലൻസിന്റെ കാര്യത്തിലേക്ക് വരിക ആണെങ്കിൽ ആളുകൾ കാലങ്ങളായി കണ്ടീഷൻ ചെയ്യപ്പെട്ടിട്ടുണ്ട്. കുറെ ധാരണകളുടെ പുറത്താണ് ആളുകൾ ജീവിച്ചിരിക്കുന്നത്. ഇത് പുരാതനകാലം മുതൽ തുടങ്ങിയതാണ്.
ഭാര്യ എങ്ങനെ പെരുമാറണം, മകൾ എങ്ങനെ പെരുമാറണം, മകളുടെ കല്യാണം കഴിഞ്ഞാൽ ഫാമിലി വേറെയാണ് എന്നൊക്കെ ചിന്തയാണ്. കാരണം പെട്ടെന്ന് എല്ലാ ബന്ധങ്ങളും ഒഴിവാക്കി പുതിയ ഒരാളായി ജീവിക്കുക എന്നതൊക്കെ ഭയങ്കര ബുദ്ധിമുട്ടുള്ള കാര്യമാണത് എന്നും സിത്താര കൃഷ്ണകുമാർ വ്യക്തമാക്കുന്നു.
