മലയാളത്തിന്റെ യുവതാരം നിവിൻ പോളി നായകനാവുന്ന പുതിയ ചിത്രത്തിന്റെ ലൊക്കേഷനിൽ നിന്ന് ഭക്ഷണം കവർന്നു. മട്ടന്നൂരിനു സമീപമുള്ള കാഞ്ഞിലേരിയിലെ ലൊക്കേഷനിൽ നിന്നാണ് പൊറാട്ടയും ചിക്കനും മോഷണം പോയത്. നിവിൻ നായകനാവുന്ന പടവെട്ട് എന്ന ചിത്രത്തിന്റെ ലൊക്കേഷനിലാണ് സംഭവം.
കാറിലെത്തിയ നാലംഗ സംഘമാണ് അഭിനേതാക്കൾക്കും അണിയറ പ്രവർത്തകർക്കും കഴിക്കാൻ തയ്യാറാക്കി വെച്ചിരുന്ന ഭക്ഷണം കവർന്നത്. 80ഓളം പേർക്ക് കഴിക്കാനുള്ള ഭക്ഷണമാണ് മോഷ്ടിക്കപ്പെട്ടത്. കാറിലെത്തിയ സംഘം ഭക്ഷണം കവരുന്നത് സമീപവാസിയായ അമൽ എന്ന യുവാവ് മൊബൈൽ ക്യാമറയിൽ പകർത്തിയിരുന്നു.
ഇത് ശ്രദ്ധയിൽപ്പെട്ട കാറിലെത്തിയ സംഘം ഇയാളെ മർദ്ദിച്ച ശേഷം കടന്നുകളയുകയായിരുന്നു. പരിക്കേറ്റ അമലിനെ കൂത്തുപറമ്പ് ആശുപത്രിയിൽ പ്രവേശിപ്പിച്ചു. സംഭവത്തിൽ മാലൂർ പോലീസ് അന്വേഷണം ആരംഭിച്ചു. നവാഗതനായ ലിജു കൃഷ്ണ ലിജു കൃഷ്ണ രചനയും സംവിധാനവും നിർവഹിച്ച് നിവിൻ പോളിയെ നായകനാക്കി ഒരുക്കുന്ന ‘പടവെട്ട് ‘ നടൻ സണ്ണിവെയ്ൻ ആണ് നിർമ്മിക്കുന്നത്.
