മലയാളത്തിന്റെ താര രാജാക്കൻമാരാണ് മമ്മൂട്ടിയും മോഹൻലാലും. നിരവധി സിനിമകളിൽ ഒന്നിച്ചഭിനയിട്ടിച്ചുള്ള ഇവരുടെ സൗഹൃദവും ഏറെ പ്രസസ്തമാണ്. ഇപ്പോഴിതാ മോഹൻലാലിന്റെ സിനിമയ്ക്ക് മമ്മൂട്ടി കഥനൽകിയ സംഭവമാണ് വൈറലാകുന്നത്.
മലയാളസിനിമാ ചരിത്രത്തിലെ ഏറ്റവും മികച്ച ചിത്രങ്ങളിലൊന്നായിരുന്നു കമലദളം. മോഹൻലാലിന്റെയും ലോഹിതദാസിന്റെയും സിബി മലയിലിന്റെയും കരിയറിലെ ഏറ്റവും മികച്ചത് എന്നുപറയാവുന്ന അഞ്ച് ചിത്രങ്ങളുടെ കൂട്ടത്തിൽ കമലദളവും ഉണ്ടാകും.
എന്നാൽ, ഈ സിനിമയുടെ കഥ മമ്മൂട്ടി നൽകിയ ഒരു സ്പാർക്കിൽ നിന്നാണ് ഉണ്ടായതെന്ന് പറഞ്ഞാൽ വിശ്വസിക്കുമോ എന്നാൽ സത്യമാണത്. കഥയാലോചിച്ച് തലപുകച്ചിരുന്ന ലോഹിതദാസിന് മമ്മൂട്ടിയാണ് കമലദളത്തിന്റെ സ്പാർക്ക് നൽകുന്നത്.
ആ സംഭവം ഇങ്ങനെ
മോഹൻലാലിന്റെ നിർമ്മാണക്കമ്പനിയായ പ്രണവത്തിന് വേണ്ടി ഹിസ് ഹൈനസ് അബ്ദുള്ളയും ഭരതവും ചെയ്തുകഴിഞ്ഞ സമയം. അടുത്ത പ്രൊജക്ടും ചെയ്യുന്നത് സിബിമലയിൽ ലോഹിതദാസ് ടീം തന്നെയാണ്. എന്നാൽ കഥ ഒന്നുമായിട്ടില്ല.
അങ്ങനെയിരിക്കെ ഒരുദിവസം മമ്മൂട്ടിയുമായി ലോഹി ഫോണിൽ സംസാരിക്കുമ്പോൾ പ്രണവത്തിന്റെ പുതിയ മോഹൻലാൽ സിനിമയുടെ കഥയെന്തായി? എന്ന് മമ്മൂട്ടി ചോദിക്കുന്നു. അബ്ദുള്ളയിൽ ഹിന്ദുസ്ഥാനിയും കർണാട്ടിക് സംഗീതവും പരീക്ഷിച്ചു. ഭരതത്തിൽ ശുദ്ധ കർണാടക സംഗീതമായിരുന്നു പശ്ചാത്തലം.
അടുത്തത് ഏത് പിടിക്കുമെന്നാണ് ആലോചിക്കുന്നത് എന്ന് ലോഹിതദാസ് മമ്മൂട്ടിയോട് പറഞ്ഞു. അടുത്തത് കഥകളി പിടിക്ക് എന്ന് അലക്ഷ്യമായി മമ്മൂട്ടി മറുപടി നൽകി. മമ്മൂട്ടിയുടെ കഥകളി പിടിക്ക് എന്ന അലസവാചകം പക്ഷേ ലോഹിതദാസിൽ പെട്ടെന്നുണർത്തിയത് കലാമണ്ഡലത്തിന്റെ സ്മരണകളാണ്. അത് ആ പശ്ചാത്തലത്തിലുള്ള കമലദളത്തിന്റെ കഥയിലേക്കുള്ള ആദ്യ സ്പാർക്കുമായി മാറി.
