മലയാളത്തിന്റെ താരരാജാവ് മോഹൻലാൽ വിഖ്യാത സാഹിത്യകാരൻ എംടിയുടെ രചനയിൽ അഭിനയിച്ച സിമികളെല്ലാം ക്ലാസ്സുകൾക്ക് ഒപ്പം സൂപ്പർ വിജയങ്ങൾ നേടിയവയുമായിരുന്നു. ഇരുവരും ഒന്നിച്ച പഞ്ചാഗ്നിയും സദയവും അമൃതം ഗമയയും താഴ് വാരവും അനുബന്ധവും, അഭയംതേടിയും ഉയരങ്ങളിലും എല്ലാം ഒന്നിനൊന്ന് മികച്ചവയായിരുന്നു
അതേ പോലെ മോഹൻലാലിനെ താരപദവിയിലേക്ക് എടുത്തുയർത്തുന്നതിൽ നിർണായക പങ്കുവഹിച്ച ചിത്രമായിരുന്നു എംടിയുടെ രചനയിൽ 1984ൽ പുറത്തിറങ്ങിയ ഉയരങ്ങളിൽ. ഇപ്പാഴിതാ എംടിയുടെ തിരക്കഥയിൽ മോഹൻലാൽ അവിസ്മരണീയമാക്കിയ ആ കഥാപാത്രം വീണ്ടും വരുന്നുവെന്നാണ് പുറത്തുവരുന്ന ചില സൂചനകൾ.
എംടി വാസുദേവൻ നായരുടെ തിരക്കഥയിൽ ഐവി ശശി സംവിധാനം ചെയ്ത ഉയരങ്ങളിൽ അന്ന് വൻ വിജയമായിരുന്നു. പ്രതിനായക കഥാപാത്രമായി മോഹൻലാൽ നിറഞ്ഞാടിയ ചിത്രം വർഷങ്ങൾക്ക് ശേഷം വീണ്ടും പ്രേക്ഷകരെ ത്രസിപ്പിക്കാനെത്തുകയാണ്.
വൈശാഖ് രാജൻ നിർമ്മിച്ച് ഐവി ശശിയുടെ അസോസിയേറ്റ് ആയിരുന്ന ജോമോൻ സംവിധാനം ചെയ്യുന്ന ചിത്രത്തിന് കഥയും തിരക്കഥയും ഒരുക്കുന്നത് എംടി തന്നെയാണ്. എന്നാൽ ഇത്തവണ ചിത്രത്തിന്റെ പേര് ‘ഉയരങ്ങളിൽ’ എന്നല്ല, ‘ഉയരങ്ങൾ’ എന്നാണ്.
അതേ സമയം ഇപ്പോൾ മലയാളത്തിലെ താരചക്രവർത്തിയായ മോഹൻലാൽ അന്നത്തെ ആ വില്ലൻവേഷം ഏറ്റെടുക്കാൻ സാധ്യത കുറവാണെന്നാണ് അറിയുന്നത്. അതു കൊണ്ട് തന്നെ മോഹൻലാൽ ചെയ്ത കഥാപാത്രത്തിനെ ആര് അവതരിപ്പിക്കുമെന്ന് ഇതുവരെ തീരുമാനമായിട്ടില്ല. എന്നാൽ ചിത്രത്തിലെ മറ്റ് താരങ്ങൾക്കായുള്ള തെരച്ചിലും തുടരുകയാണ്.
