സംവിധായകൻ ഫാസിലിന്റെ മകനും നടനുമായ ഫഹദ് ഫാസിൽ മലയാളത്തിലെ യുവതാരങ്ങളിൽ ശ്രദ്ധേയനായി തിളങ്ങിനിൽക്കുന്ന താരങ്ങളിൽ ഒരാളാണ്. പിതാവ് ഒരുക്കിയ കൈയ്യെത്തും ദൂരത്ത് എന്ന ചിത്രത്തിലൂടെ എത്തിയ നടന് വിജയ നായകനായി തുടക്കം കുറിക്കാൻ സാധിച്ചിരുന്നില്ല.
എങ്കിലും ചെറിയ ഇടവേളയ്ക്ക് ശേഷം വ്യത്യസ്തമാർന്ന സിനിമകളും കഥാപാത്രങ്ങളും ചെയ്തുകൊണ്ടുള്ള രണ്ടാം വരവിൽ ഫഹദ് മോളിവുഡിന്റെ അവിഭാജ്യ ഘടകമായി മാറിയത്. ഫഹദ് ഫാസിൽ ചിത്രങ്ങൾക്കായെല്ലാം വലിയ ആകാംക്ഷകളോടെ ആരാധകർ കാത്തിരിക്കാറുണ്ട്.
ട്രാൻസ് എന്ന ചിത്രമായിരുന്നു നടന്റേതായി ഒടുവിൽ തിയ്യേറ്ററുകളിലെത്തിയത്. ഫഹദിന്റേതായി അണിയറയിൽ ഒരുങ്ങുന്ന പുതിയ ചിത്രങ്ങൾക്കായെല്ലാം വലിയ പ്രതീക്ഷകളോടെയാണ് ആരാധകർ കാത്തിരിക്കുന്നത്. അതേസമയം ഫഹദ് ഫാസിലിനെ കുറിച്ച് നടൻ കുഞ്ചാക്കോ ബോബൻ പറഞ്ഞ കാര്യങ്ങളാണ് ഇപ്പോൾ സോഷ്യൽ മീഡിയയിൽ ചർച്ചയായിരിക്കുന്നത്.
ഒരു ചാനൽ പരിപാടിയിലാണ് പുതുതലമുറ നടൻമാരിലെ ഇഷ്ടക്കാരനെ കുറിച്ച് ചാക്കോച്ചൻ തുറന്നുപറഞ്ഞത്. ഫഹദ് ഫാസിലിനൊപ്പം മുൻപ് ടേക്ക് ഓഫ് എന്ന ചിത്രത്തിൽ കുഞ്ചാക്കോ ബോബൻ ഒരുമിച്ച് അഭിനയിച്ചിരുന്നു. ടേക്ക് ഓഫിൽ ക്ലൈമാക്‌സ് സീനിൽ മാത്രമാണ് ഇരുവരും ഒന്നിച്ചഭിനയിച്ചിരുന്നത്.
പാർവതിയും ചിത്രത്തിൽ പ്രധാന വേഷത്തിൽ അഭിനയിച്ചിരുന്നു. അതേസമയം ഫഹദിന്റെ പിതാവ് ഫാസിൽ സംവിധാനം ചെയ്ത അനിയത്തിപ്രാവിലൂടെയായിരുന്നു ചാക്കോച്ചൻ മലയാളത്തിലേക്ക് എത്തിയത്. പരിപാടിയിൽ ന്യൂജനറേഷൻ താരങ്ങളിൽ ആരെയാണ് ഇഷ്ടം എന്ന് ചോദിച്ചപ്പോൾ ആദ്യം ഫഹദിന്റെ പേരാണ് ചാക്കോച്ചൻ പറഞ്ഞത്.
നമ്മുടെ ആലപ്പുഴക്കാരൻ പയ്യനെ തന്നെയാണ് തനിക്ക് കൂടുതൽ ഇഷ്ടമെന്നാണ് ചോദ്യത്തിന് മറുപടിയായി ചാക്കോച്ചൻ പറഞ്ഞത്. ഷാനു ചെയ്ത കഥാപാത്രങ്ങളൊക്കെയും വെറൈറ്റി റോളുകളാണ്. അതെല്ലാം നന്നായി ചെയ്തിട്ടുണ്ട്. ഫഹദിനൊപ്പം തന്നെ നിവിൻപോളിയെയും ഇഷ്ടമാണ്. പെട്ടെന്ന് ഇംപ്രൂവ് ചെയ്തൊരു ആക്ടറാണ് നിവിൻ എന്നും ചാക്കോച്ചൻ പറഞ്ഞു.
കുഞ്ചാക്കോ ബോബനൊപ്പം നമിതാ പ്രമോദും അഭിമുഖത്തിൽ പങ്കെടുത്തിരുന്നു. നമിതയും തന്റെ ഇഷ്ടതാരം ഫഹദാണെന്ന് പറഞ്ഞു. അങ്ങനെ പ്രത്യേകിച്ച് ഒരു നടനൊപ്പം അഭിനയിക്കണമെന്ന് സ്വപ്നങ്ങളൊന്നുമില്ലെന്നും ഫഹദാണ് തന്റെ ഇഷ്ടതാരമെന്നും നമിത പറഞ്ഞു.
ഫഹദിനൊപ്പം മുൻപ് റോൾ മോഡൽസ് എന്ന ചിത്രത്തിൽ നമിത അഭിനയിച്ചിരുന്നു. റാഫി സംവിധാനം ചെയ്ത ചിത്രത്തിൽ ഫഹദ് ഫാസിലിന്റെ നായികയായാണ് നമിത അഭിനയിച്ചത്. ഹാസ്യത്തിന് പ്രാധാന്യം നൽകിയൊരുക്കിയ ചിത്രം തിയ്യേറ്ററുകളിൽ വിജയമായിരുന്നു.
ആലപ്പുഴ സ്വദേശികളാണ് കുഞ്ചാക്കോ ബോബനും ഫഹദ് ഫാസിലും. സിനിമകൾക്കൊപ്പം തന്നെ ജീവിതത്തിലും അടുത്ത സുഹൃത്തുക്കളാണ് ഇരുവരും. ഫഹദിനൊപ്പമുള്ള ചാക്കോച്ചന്റെ ഫോട്ടോകളെല്ലാം മുൻപ് ആരാധകർ ഏറ്റെടുത്തിരുന്നു.
