മലയാളത്തിന്റെ താരരാജാവ് മോഹൻലാലും സൂപ്പർ സംവിധായകൻ വിനയനും ഒന്നിച്ചുളള സിനിമ എന്നാരംഭിക്കുന്നു എന്ന വാർത്ത പുറത്തുവന്നിട്ട് നാളുകൾ ഏറെയായി. എന്നാൽ വിനയൻ ഇപ്പോൾ പത്തൊൻപതാം നൂറ്റാണ്ട് എന്ന ബിഗ് ബഡ്ജറ്റ് ചിത്രം ഒരുക്കുന്ന തിരക്കിലാണ്.
യുവനടൻ സിജു വിൽസൻ നായകനായി എത്തുന്ന ഈ ചിത്രം ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ ആണ് നിർമ്മിക്കുന്നത്. ഈ ചിത്രം പൂർത്തിയാക്കിയാൽ ഉടൻ മോഹൻലാൽ ചിത്രം ചെയ്യാൻ ആണ് വിനയന്റെ പ്ലാൻ എന്നാണ് പുറത്തു വരുന്ന സൂചന.
ഇപ്പോഴിതാ വിഷയത്തിൽ പ്രതികരണവുമായി വിനയൻ എത്തിയിരിക്കുകയാണ്. ഒരു പ്രേക്ഷകൻ വിനയന്റെ ഫേസ്ബുക്ക് പേജിൽ പങ്കുവെച്ച കമന്റിന് മറുപടി നൽകിയതാണ് അദ്ദേഹം. സാർ ലാലേട്ടനുമായുള്ള ചിത്രം എന്നാണ്? പ്ലീസ് ആൻസർ പ്ലീസ് എന്നാണ് ഒരു വ്യക്തി അദ്ദേഹത്തിന് കമന്റ് ചെയ്തത്.
ഉടനെ ഉണ്ടാകും എന്ന് വിനയന്റെ മറുപടിയും എത്തി. തന്റെ പുതിയ ചിത്രമായ പത്തൊമ്പതാം നൂറ്റാണ്ടിന്റെ ഒരു വീഡിയോ പങ്കുവെച്ചതിന് താഴെയാണ് കമന്റ് വന്നത്. മോഹൻലാലുമൊത്ത് ഒരു മെഗാ ഹിറ്റ് തന്നെ പ്രതീക്ഷിക്കുന്നു എന്നും കമന്റുകളുണ്ട്. അതേ സമയം പത്തൊമ്പതാം നൂറ്റാണ്ടിന്റെ വർക്കുകൾ പുരോഗമിക്കുകയാണ്.
പീരേഡ് ഡ്രാമയായ ചിത്രം ആറാട്ടുപുഴ വേലായുധ പണിക്കരുടെ കഥയാണ് പറയുന്നത്. അനൂപ് മേനോൻ, ചെമ്പൻ വിനോദ്, സുധീർ കരമന, സുരേഷ് ക്യഷ്ണ, ഇന്ദ്രൻസ്, രാഘവൻ, അലൻസിയർ, ശ്രീജിത് രവി, സുദേവ് നായർ, ജാഫർ ഇടുക്കി, മണികണ്ഠൻ, സെന്തിൽക്യഷ്ണ, ബിബിൻ ജോർജ്ജ്, വിഷ്ണു വിനയ് തുടങ്ങി ഒട്ടേറെ താരങ്ങളും നൂറിലധികം ജൂനിയർ ആർട്ടിസ്റ്റുകളും ചിത്രത്തിൽ അണിനിരക്കുന്നുണ്ട്.
ഷാജികുമാർ ഛായാഗ്രഹണം നിർവ്വഹിക്കുന്നു. റഫീഖ് അഹമ്മദിന്റെ വരികൾക്ക് എം ജയചന്ദ്രൻ സംഗീതം പകരുന്നു. കോ പ്രൊഡ്യൂസർ വിസി പ്രവീൺ, ബൈജു ഗോപാലൻ. എക്‌സിക്യൂട്ടീവ് പ്രൊഡ്യുസർ ക്യഷ്ണമൂർത്തി, പ്രൊജക്ട് ഡിസൈനർ ബാദുഷ, കലാസംവിധാനം അജയൻ ചാലിശ്ശേരി, എഡിറ്റിങ് വിവേക് ഹർഷൻ.
മേക്കപ്പ് പട്ടണം റഷീദ്, കോസ്റ്റും ധന്യാ ബാലക്യഷ്ണൻ, സൗണ്ട് ഡിസൈൻ സതീഷ്, പരസ്യകല ഓൾഡ് മോങ്ക്‌സ്, പ്രൊഡക്ഷൻ കൺട്രോളർ രാജൻ ഫിലിപ്പ്, ഇക്ബാൽ പാനായിക്കുളം. വാർത്ത പ്രചരണം എ എസ് ദിനേശ് എന്നിവരാണ് മറ്റ് അണിയറ പ്രവർത്തകർ.
അതേ സമയം മോഹൻലാൽ സിനിമയും ഒരു ബിഗ് ബഡ്ജറ്റ് പിരീഡ് ചിത്രം ആണെന്നാണ് സൂചന. രാവണൻ ആയാണ് വിനയൻ ചിത്രത്തിൽ മോഹൻലാൽ എത്തുക എന്ന സ്ഥിതീകരിക്കാത്ത റിപ്പോർട്ടുകൾ നേരത്തെ വന്നിരുന്നു. ഇപ്പോൾ തന്റെ ആദ്യ സംവിധാന സംരംഭമായ ബറോസ് ഒരുക്കുന്ന തിരക്കിൽ ആണ് മോഹൻലാൽ.
ഈ വർഷം ജൂലൈ മാസത്തോടെ ബറോസ് ഷൂട്ടിങ് പൂർത്തിയാക്കി, ശേഷം ജീത്തു ജോസഫ് ചിത്രം റാമിന്റെ ബാക്കി ചിത്രീകരണം പൂർത്തിയാക്കാൻ ആണ് മോഹൻലാലിന്റെ പ്ലാൻ. അതിനു ശേഷം പ്രിയദർശൻ ഒരുക്കുന്ന ബിഗ് ബഡ്ജറ്റ് സ്‌പോർട്‌സ് ചിത്രത്തിൽ ആണ് മോഹൻലാൽ അഭിനയിക്കുക. ഈ ചിത്രത്തിനായി മോഹൻലാൽ ബോക്‌സിങ് പരിശീലനവും ആരംഭിച്ചു കഴിഞ്ഞു.
ബി ഉണ്ണികൃഷ്ണൻ ചിത്രം ആറാട്ട്, പ്രിയദർശൻ ചിത്രം മരക്കാർ അറബിക്കടലിന്റെ സിംഹം എന്നിവയാണ് ഈ വർഷം റിലീസിന് തയ്യാറെടുക്കുന്ന മോഹൻലാൽ ചിത്രങ്ങൾ.
