മഹേഷ് നാരായണൻ സുപ്പർഹിറ്റായ ടേക്ക് ഓഫ് എന്ന ചിത്രത്തിന് ശേഷം സംവിധാനം ചെയ്യുന്ന ഫഹദ് ഫാസിൽ ബിഗ് ബജറ്റ് ചിത്രം മാലിക്കിൽ ലുക്ക് കൊണ്ട് ഞെട്ടിച്ച് നിമിഷ സജയനും. റോസ്ലിൻ എന്ന കഥാപാത്രമായിട്ടാണ് നിമിഷ ചിത്രത്തിൽ എത്തുന്നത്.
നരച്ച മുടിയും വട്ട കണ്ണടയുമായി ഉള്ള വയസായ ലുക്കിൽ ആണ് താരം എത്തുന്നത്. തൊണ്ടിമുതലും ദൃക്സാക്ഷിയും എന്ന സിനിമയ്ക്ക് ശേഷം ഫഹദും നിമിഷയും ഒരുമിക്കുന്ന സിനിമയാണിത്. 27 കോടിയോളം മുതൽമുടക്കുള്ള ചിത്രത്തിന് വേണ്ടി ഫഹദ് ഫാസിൽ 20 കിലോയോളം ഭാരം കുറച്ചിരുന്നു.
ആന്റോ ജോസഫ് ഫിലിം കമ്പനിയുടെ ബാനറിൽ ആന്റോ ജോസഫാണ് ചിത്രം നിർമ്മിക്കുന്നത്. ജോജു ജോർജ്, ദിലീഷ് പോത്തൻ, സലിംകുമാർ ,ഇന്ദ്രൻസ്,വിനയ് ഫോർട്ട്, നിമിഷ സജയൻ, പതിനെട്ടാം പടിയിലൂടെ ശ്രദ്ധേയനായ ചന്ദുനാഥ് എന്നിവർ മുഖ്യവേഷങ്ങളിലെത്തുന്നു.
മലയാളിയായ ബോളിവുഡ് ക്യാമറമാൻ സനു ജോൺ വർഗീസ് ആണ് ചിത്രത്തിന്റെ ഛായാഗ്രഹണം. സംഗീതം ഒരുക്കിയിരിക്കുന്നത് സുഷിൻ ശ്യാമാണ്. ബാഹുബലി സ്റ്റണ്ട് ഡയറക്ടർ ആയിരുന്ന ലീ വിറ്റേക്കറാണ് ചിത്രത്തിന്റെ സംഘട്ടനം ഒരുക്കുന്നത് എന്നതും ശ്രദ്ധേയമാണ്.
അതേ സമയം ഫഹദ് ഫാസിലിന്റേതായി അവസാനം പുറത്തിറങ്ങിയ ട്രാൻസ് തകർപ്പൻ വിജയമായിരുന്നു നേടിയത്. അൻവർ റഷീദ് സംവിധാനം ചെയ്ത ട്രാൻസ് മികച്ച വിജയം നേടി മുന്നേറുമ്പോൾ കൊറോണ മൂലം തീയ്യറ്ററുകൾ അടച്ചത് കനത്ത തിരിച്ചടിയുമായിരുന്നു.
